កីឡាករ Donny van de Beek របស់ក្រុម Ajax Amsterdam ដណ្តើមបានគ្រាប់បាល់សម្រាប់ជ័យជំនះ១-០លើក្រុម Spursនៅការប្រកួតជើងទី១វគ្គពាក់កណ្តាលផ្តាច់ព្រ័ត្រ Champions League របស់ពួកគេកាលពីថ្ងៃអង្គារ។
ការស៊ុតបាល់របស់កីឡាករវ៧យ២២ឆ្នាំម្នាក់នេះ បានកើតមានឡើងនៅនាទី១៥ ដើម្បីធ្វើឲ្យក្រុម Ajaxទទួលបានគ្រាប់បាល់ក្រៅទឹកដីដ៏សំខាន់ និងទុកឲ្យក្រុម Spursប្រឈមនឹងការងារលំបាកបំផុតនៅក្នុងទីក្រុង Amsterdam បើសិនជាពួកគេចង់ឡើងទៅវគ្គផ្តាច់ព្រ័ត្រជាលើកដំបូង នៅការប្រកួតក្លិបបាល់ទាត់កំពូលអឺរ៉ុបមួយនេះ។
ក្រុម Ajax ដែលបានទម្លាក់ក្រុម Real Madrid និងក្រុម Juventusតាមផ្លូវរបស់ពួកគេឡើងមកដល់វគ្គពាក់កណ្តាលផ្តាច់ព្រ័ត្រ Champions Leagueជាលើកដំបូង ចាប់តាំងពីឆ្នាំ១៩៩៧នោះ បានបង្កការងារច្រើនដល់ក្រុមម្ចាស់ផ្ទះ ជាពិសេសនៅក្នុងតង់ទី១តែម្តង ពេលដែលពួកគេវាយសម្រុកដូចទឹកបាក់ទំនប់នោះ។
ក្រុម Spurs ចាប់ផ្តើមលេងល្អឡើងវិញ ក្រោយពេលសម្រាកតង់ទី១ ប៉ុន្តែក្រុម Ajaxលេងការពារបានល្អ ដើម្បីបន្តការនាំមុខរបស់ពួកគេ ហើយពួកគេស្ទើតែរកបានគ្រាប់បាល់ទី២ទៅហើយ ពេលដែលការស៊ុតបាល់របស់កីឡាករ David Neres ត្រូវចំរបារទី។
ក្រុម Ajaxរបស់លោក Erik ten Hag ចាប់ផ្តើមលេងការប្រកួតដោយមានទំនុកចិត្តខ្ពស់ និងកម្លាំងពលំខ្លាំងក្លា ជាហេតុធ្វើឲ្យក្រុម Spursស្ទើរតែពុំអាចទ្រាំទ្រនឹងការវាយលុករបស់ពួកគេ។
ក្រុម Ajaxបានបង្ហាញយ៉ាងច្បាស់ក្នុងការប្រកួតមួយនេះ នូវសមត្ថភាពរបស់ពួកគេដែលអាចយកឈ្នះក្រុម Real Madridនិងក្រុម Juventus កាលពី២ជុំមុន៕
Source: Kampuchea Thmey Daily
0 Comments