ភ្នំពេញ ៖ ស្រី្តម្នាក់ដែលជាកម្មការិនីរោងចក្រ មានអាយុដល់ទៅ៣២ឆ្នាំទៅហើយ បែរជាដើរចេញពីផ្ទះបាត់ខ្លួនដោយគ្មានមូលហេតុរួចមិនអាចទាក់ទងតាមទូរស័ព្ទបានទៀតផង ធ្វើឲ្យបងប្អូន ប្ដី និងកូនជ្រួលច្របល់មកប្ដឹងនគរបាលប៉ុស្ដិ៍ចោមចៅទី៣ ឲ្យជួយអន្តរាគមន៍កាលពីវេលាម៉ោង១រសៀលថ្ងៃទី២ ខែឧសភា ឆ្នាំ២០១៩។
ស្ដ្រីដែលបាត់ខ្លួននោះមានឈ្មោះ ឈន ស្រីអូន អាយុ៣២ឆ្នាំ មុខរបរកម្មការនីរោងចក្រ ស្បែកជើង យីងដុង ស្នាក់នៅផ្ទះជួលភូមិអង្គសង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើត នៅភូមិព្រៃបាយ ឃុំពេជសារ ស្រុកកោះអណ្តែត ខេត្តតាកែវ មានប្តីឈ្មោះ ណែត រួមទាំងកូនប្រុស២នាក់ មានស្រុកកំណើតនៅខេត្តកំពង់ចាម។
តាមប្រភពពីបងស្រីបង្កើត របស់នាងដែលបានមកប្ដឹងសមត្ថកិច្ច បានឲ្យដឹងថា នៅមុនពេលដែលបាត់បាត់ខ្លួន ប្អូនស្រីខ្លួន បានប្រាប់បងថា ទៅទិញថ្នាំពេទ្យមួយភ្លែតស្រាប់តែបាត់រហូតមិនដឹងទៅណាមកណាហើយទាក់ទងតាមទូរស័ព្ទមិនបានទៀតផង។ ដូច្នេះទើបបងស្រីរបស់នាងដែលមកដល់ប៉ុស្ដិ៍នគរបាលបាន សំណូមពរ បើមានបងប្អូនណាដែលបានស្គាល់ជួយប្រាប់ឲ្យនាងមកផ្ទះវិញផង ពិសេសសាមីខ្លួនបើបានឃើញដំណឹងនេះហើយ សូមវិលត្រឡប់មកផ្ទះវិញផង ពីបងប្អូន រួមទាំងប្តីនិងកូនមានការព្រួយបារម្ភណាស់ ។
ចំពោះករណីបែបនេះ គេមានការសង្ស័យថា នាងអាចចាញ់បោកការលួងលោមរបស់គេ ទៅតាមគេ ក្នុងការបោកប្រាស់យកខ្លួនប្រាណក៏មាន ឬម្យ៉ាងទៀតអាចនាងមានទំនាក់ទំនងស្នេហាជាមួយអ្នកណាម្នាក់តាមការទំនាក់ទំនងគ្នា តាមទូរស័ព្ទក្ដី តាមឆាតហ្វេសប៊ុកអីជាដើម ព្រោះសម័យនេះ សម្បូរករណីបែបនេះកើតមានខ្លាំងណាស់៕
Source: Kampuchea Thmey Daily
0 Comments