លោក ស៊ុំ វណ្ណា អតីតគ្រូបង្វឹករបស់ក្រុមវេស្ទើនភ្នំពេញ ដែលកំពុងតែ ធ្វើការជាគ្រូជំនួយរបស់លោកគ្រូបង្គោល Leonardo Vitorino ដែលជាជនជាតិប្រេស៊ីល ក្នុងក្លិបភ្នំពេញក្រោន បានបញ្ចប់វគ្គសិក្សាគ្រូបង្វឹកកម្រិត AFC “A” License កាលពីពេលថ្មីៗដោយជោគជ័យ ខណៈលោកត្រូវបានសហព័ន្ធកីឡាបាល់ទាត់កម្ពុជា បញ្ជូនឱ្យទៅចូលរួមវគ្គបណ្តុះបណ្តាលគ្រូបង្វឹកបាល់ទាត់កម្រិតទ្វីបអាស៊ី មួយនៅរាជធានីបាងកក ប្រទេសថៃ។
គ្រូបង្វឹកខាងលើបានបញ្ជាក់ថា វគ្គបណ្តុះបណ្តាលនេះត្រូវបានរៀបចំឡើងដោយសហព័ន្ធកីឡាបាល់ទាត់អន្តរជាតិហៅកាត់ថា FIFA និងសហការជាមួយសហព័ន្ធកីឡាបាល់ទាត់ទ្វីបអាស៊ី AFC ក្នុងគោលបំណងដើម្បីឲ្យអ្នកចូលរួមទាំងអស់ ពោលគឺគ្រូឧទ្ទេសទាំងអស់មានសមត្ថភាពគ្រប់គ្រាន់ក្នុងការហ្វឹកហាត់គ្រូជំនាន់ក្រោយបានត្រឹមកម្រិត C និង D Licence នៅតំបន់អាស៊ី ដែលបានធ្វើឡើងចាប់ពីថ្ងៃទី២៩ ខែមេសា ដល់ថ្ងៃទី៣ ខែឧសភា ឆ្នាំ២០១៩ថ្មីៗនេះ។
បន្ទាប់ពីត្រឡប់មកចូលរួមក្នុងវគ្គបណ្តុះបណ្តាលខាងលើ លោក ស៊ុំ វណ្ណា បានលើកឡើងថា «ខ្ញុំពិតជាមានអារម្មណ៍រីករាយណាស់ ហើយបន្ទាប់ពីចប់វគ្គនេះទៅខ្ញុំមានការយល់ដឹងច្រើនជុំវិញការហ្វឹកហាត់គ្រូបាល់ទាត់ទាក់ទងនឹងបញ្ហាផ្សេងៗដូចជា វិធីសាស្ត្រនៃការហ្វឹកហាត់ ការរៀបចំគម្រោងនៃហ្វឹកហាត់ ការលើកទឹកចិត្ត ការទំនាក់ទំនង ការរៀបចំការប្រកួត ការវិភាគផ្សេងៗនៃការលេងបាល់ទាត់ និងសកម្មភាពផ្សេងៗទៀតនៅលើទីលាន ជាមួយកីឡាករ។ ចំនេះដឹងនេះជាអ្វីដែលថ្មីសម្រាប់ខ្ញុំ ហើយខ្ញុំក៏មានជំនឿចិត្តខ្លួនឯងថានឹងយកចំនេះដឹងទាំងនេះមកធ្វើការហ្វឹកហាត់គ្រូៗក្នុងការចូលរួមវិស័យបាល់ទាត់នៅកម្ពុជា»។
លោកបន្តថា វគ្គបណ្ដុះបណ្ដាលនេះ មានគ្រូឧទ្ទេសចូលរួមចំនួន២២នាក់ ហើយវាគឺជារបកគំហើញថ្មីមួយទៀតរបស់ FIFA ដើម្បីធ្វើការបណ្តុះបណ្តាលវិស័យបាល់ទាត់នៅក្នុងតំបន់អាស៊ី ពាក់ព័ន្ធទៅនឹងធនធានគ្រូបង្វឹក ដែលតម្រូវឲ្យធ្វើការសិក្សាក្នុងរយៈពេលបួនដំណាក់កាល។
លោក ស៊ុំ វណ្ណា កាន់បរិញ្ញាប័ត្រអប់រំកាយ និង កីឡា ពីប្រទេសគុយបា កាលពីឆ្នាំ២០០៩។ លោកធ្លាប់ធ្វើជាគ្រូជំនួយក្លឹបបៀលប្រាយ ពីឆ្នាំ២០១៣-២០១៥ មុននឹងបន្តទៅកាន់តំណែងជាគ្រូធំក្លិបមជ្ឈមណ្ឌលកំចាត់មីនកម្ពុជា (ស៊ីម៉ាក់) កាលពីរដូវកាល២០១៥-២០១៦ ហើយបានជួយឲ្យក្លឹបនេះឡើងវគ្គពាក់កណ្តាលផ្តាច់ព្រ័ត្រពានរង្វាន់សម្តេចតេជោ ហ៊ុន សែន ផងដែរ។ លោកបានចុះកិច្ចសន្យាជាផ្លូវការដឹកនាំក្រុមវេស្ទើន កាលពីដើមរដូវកាល ឆ្នាំ២០១៧ ខណៈនៅឆ្នាំនោះដែរ លោកបានបញ្ចប់វគ្គសិក្សាគ្រូបង្វឹកផ្នែកអាជ្ញាប័ណ្ណ B (AFC B License)។ នៅរដូវកាលកន្លងទៅលោកនៅទំនេរ ដោយដឹកនាំក្រុមក្រៅផ្លូវការមួយចំនួនបណ្តោះអាសន្នផងដែរ៕
Source: Kampuchea Thmey Daily
0 Comments