សាលារៀនរដ្ឋនៅក្នុងប្រទេសស្រីលង្កាបានចាប់ផ្ដើមការសិក្សាឡើងវិញកាលពីថ្ងៃចន្ទស្របពេលមានការរឹតបន្តឹងសន្តិសុខបន្ទាប់ពីការបំផ្ទុះគ្រាប់បែកអំឡុងពិធីបុណ្យ Easter ថ្ងៃអាទិត្យប៉ុន្តែឪពុកម្ដាយដែលមានការព្រួយបារម្ភជាច្រើននាក់នៅតែទុកកូនៗរបស់ពួកគេនៅផ្ទះដោយសារតែការភ័យខ្លាចអំពីការវាយប្រហារបន្ថែមទៀតដោយពួកសកម្មប្រយុទ្ធឥស្លាម។
ពីរសប្ដាហ៍បន្ទាប់ពីការបំផ្ទុះគ្រាប់បែកអត្តឃាតនៅសណ្ឋាគារនិងព្រះវិហារបានសម្លាប់មនុស្សចំនួន២៥៧នាក់, ទាហានបានធ្វើយុទ្ធនាការសន្តិសុខនៅតាមសាលារៀនកាលពីថ្ងៃអាទិត្យ។ សាលារៀនថ្នាក់ចាប់ពីពាក់កណ្ដាលទៅថ្នាក់ខ្ពស់បានចាប់ផ្ដើមជាថ្មីកាលពីថ្ងៃចន្ទហើយថ្នាក់ទាបបានធ្វើតាមនេះដែរនៅពេលល្ងាច។
ថ្វីបើមានសន្តិសុខយ៉ាងតឹងរ៉ឹងនិងការល្បាតយោធាក៏ដោយ បន្ទប់រៀនភាគច្រើនគឺសឹងតែគ្មានសិស្សសោះកាលពីថ្ងៃចន្ទ។ យ៉ាងណាក្តី សាលារៀនឯកជនរួមទាំងស្ថាប័នកាតូលិកផងដែរនៅតែបន្តបិទ។ នាង Sujeeva Dissanayake ដែលកូនប្រុសរបស់នាងរៀននៅមហាវិទ្យាល័យ Asoka ក្នុងទីក្រុង Colombo បាននិយាយថា “ខ្ញុំបានសម្រេចចិត្តមិនបញ្ជូនកូនប្រុសរបស់ខ្ញុំទៅសាលារៀនរហូតដល់ប្រទេសនេះវិលត្រលប់មករកភាពធម្មតាឡើងវិញ”។
នៅឯមហាវិទ្យាល័យភូមិន្ទដែលជាសាលារដ្ឋក្នុងទីក្រុង Colombo, ជាធម្មតាកន្លែងចតឡានគឺពោរពេញទៅដោយយានជំនិះប៉ុន្តែឥឡូវនេះគឺទទេ។មន្ត្រីសាលាម្នាក់បាននិយាយថា មានតែប្រហែល៥ភាគរយប៉ុណ្ណោះក្នុងចំណោមសិស្ស៦,០០០នាក់របស់សាលានេះដែលបានវិលត្រលប់ចូលរៀនវិញ។ ចំណែកនៅសាលារៀនហិណ្ឌូមួយក្នុងទីក្រុង Batticaloa លើឆ្នេរសមុទ្រភាគខាងកើតដែលកន្លែងកើតហេតុមួយនៃការបំផ្ទុះគ្រាប់បែកក្នុងព្រះវិហារ, ឪពុកម្ដាយបានជួយឆែកឆេរកាបូបស្ពាយនៅច្រកចូល។ នៅខាងក្នុង សិស្សបានអង្គុយនៅតុឆ្ងាយពីបង្អួចចំហៀង។
កងកម្លាំងសន្តិសុខកំពុងប្រុងប្រយ័ត្នខ្ពស់បន្ទាប់ពីមានរបាយការណ៍សម្ងាត់ថា ពួកសកម្មប្រយុទ្ធអាចបើកការវាយប្រហារមុនពេលចាប់ផ្ដើមពិធីបុណ្យរ៉ាម៉ាឌនដែលនឹងត្រូវចាប់ផ្ដើមនៅថ្ងៃចន្ទនេះសាលាមូស្លីមនឹងត្រូវបិទទ្វារសម្រាប់ថ្ងៃបុណ្យនេះ៕ REUTERS
Source: Kampuchea Thmey Daily
0 Comments