ក្លិបបាល់ទាត់ភ្នំពេញក្រោន ម្ចាស់ជើងឯកពានរង្វាន់លីគកំពូលកម្ពុជា៦សម័យកាល បានប្រកាសចែកផ្លូវជាមួយលោក Leonardo Vitorino ជនជាតិប្រេស៊ីល ដែលជាអតីតគ្រូបង្វឹកបាល់ទាត់ក្រុមជម្រើសជាតិកម្ពុជា នៅព្រឹកថ្ងៃអង្គារ ទី៧ ខែឧសភា ឆ្នាំ២០១៩ នេះក្រោយដឹកនាំចាប់ផ្តើមមិនសូវបានល្អក្នុងដើមរដូវកាលលីគកំពូលកម្ពុជា (Metfon Cambodian League) ឆ្នាំ២០១៩ នេះ។
យោងតាមសេចក្តីជូនដំណឹងរបស់ក្លិបភ្នំពេញក្រោន បានបញ្ជាក់ថា «ក្លិបនិងលោកគ្រូបង្វឹក Leonardo Vitorino បានសម្រេចឯកភាពគ្នាបញ្ចប់កុងត្រាជាផ្លូវការក្រោយការដឹកនាំក្រុមបានត្រឹមសប្តាហ៍ទី៦ នៃលីគកំពូលកម្ពុជាឆ្នាំ២០១៩នេះ។ លោកដឹកនាំក្រុមភ្នំពេញក្រោន ក្នុងការប្រកួតផ្លូវការដែលសរុបទាំងអស់មានចំនួន៧លើក (ការប្រកួតក្នុងពានរង្វាន់ Leo Pre-Season មួយលើក) ដោយក្នុងនោះប្រកួតឈ្នះចំនួន២លើក និងប្រកួតចាញ់ចំនួន៥លើក។ ក្លិបបាល់ទាត់ភ្នំពេញក្រោន សូមអរគុណចំពោះការខិតខំប្រឹងប្រែងក្នុងការដឹកនាំ ក៏ដូចជាបង្វឹកក្រុមកីឡាករក្នុងក្លិបហើយយើងក៏សូមជូនពរដល់លោក Leonardo Vitorino ឲ្យទទួលបានជោគជ័យនៅក្នុងការបំពេញភារកិច្ចនាពេលអនាគតខាងមុខ»។ ដំណាលគ្នានេះដែរ ក្រោយការចាកចេញរបស់គ្រូបង្វឹករូបនេះក្រុមភ្នំពេញក្រោន មិនទាន់បង្ហាញសមសភាពគ្រូបង្វឹកថ្មីនៅឡើយនោះទេ។
នេះជាការបញ្ចប់ការងារនៅប្រទេសកម្ពុជា ជាលើកទី២ក្នុងនាមជាគ្រូបង្វឹករបស់លោក Leonardo ខណៈកាលពីលើកដំបូងលោកធ្លាប់ដឹកនាំក្រុមជម្រើសជាតិកម្ពុជាចន្លោះពីខែមីនា ដល់ចុងខែតុលា ឆ្នាំ២០១៧ មក កាលនោះក្រុមកម្ពុជា បានត្រឹមស្គាល់ជ័យជម្នះ១លើក ក្នុងចំណោម៧ប្រកួត ក្នុងនោះបានចាញ់ឥណ្ឌា ៣ទល់២ ហើយបន្តចាញ់ហ្សកដានី ៧ទល់០ ចាញ់ឥណ្ឌូណេស៊ី ២ទល់០ តែឈ្នះអាហ្វហ្គានីស្ថាន ១ទល់០ ចាញ់វៀតណាម ២ទល់១ ចាញ់ឥណ្ឌូណេស៊ី លើកទី២ លទ្ធផល ៣ទល់១ និងចុងក្រោយចាញ់វៀតណាម ៥ទល់០។
លោក Leonardo Vitorino ធ្លាប់មានបទពិសោធន៍ការងារជាមួយក្រុម Selection of Australia U-15 នៅឆ្នាំ១៩៩៤ ហើយនៅឆ្នាំជាមួយនោះដែរ លោកបានដឹកនាំក្រុមជម្រើសជាតិ U-17 របស់សហរដ្ឋអាមេរិក រហូតដល់ឆ្នាំ១៩៩៧ ខណៈនៅឆ្នាំ១៩៩៨ លោកបានដឹកនាំក្រុម Botafogo FR នៅប្រទេសអ៊ីតាលី ហើយនៅឆ្នាំ ២០០១ លោកបានដឹកនាំក្រុម Trinidad and Tobago Selection។ ចន្លោះឆ្នាំ២០០២ ដល់២០០៥ លោកបានដឹកនាំក្រុម Santos Angola F.C នៅប្រទេសអង់កូឡា ក្នុងទ្វីបអាហ្វ្រិក ហើយឆ្នាំ២០០៥ដល់២០០៦ បានត្រឡប់ទៅដឹកនាំក្រុមLa Sierra នៅសហរដ្ឋអាមេរិក នៅឆ្នាំ២០០៦ ដែលដឹកនាំក្រុមEstrela do Norte F.C នៅស្រុកកំណើត មុនចេញទៅក្រុមMacaé EC និងក្រុមAmerica FC-RJ នៅឆ្នាំបន្ទាប់។
នៅឆ្នាំ២០០៧ ដល់២០១៣ លោកបានដឹកនាំក្លិបda Al Gharafa នៅប្រទេសកាតារ ហើយចាប់ពីឆ្នាំ២០១៣ ដល់២០១៤ ដឹកនាំក្រុមEl Jaish ក្នុងប្រទេសកាតារដែរ។ ចាប់ពីឆ្នាំ២០១៣ ដល់២០១៦ បានចូលទៅធ្វើការជានាយកបច្ចេកទេសផងនិងជាគ្រូដឹកនាំក្រុម B ផងនៅក្លិប Buriram United របស់ថៃ និងចុងក្រោយនៅឆ្នាំ២០១៦ បានដឹកនាំក្រុម Lanexang United របស់ឡាវ មុនមកដល់ប្រទេសកម្ពុជា ក្នុងនាមជាគ្រូបង្វឹកក្រុមជម្រើសជាតិ។ ក្រោយចាកចេញពីប្រទេសកម្ពុជា លោកទទួលបានការងារថ្មីនៅស្រុកកំណើតដោយធ្វើជានាយកបច្ចេកទេសនៅក្លិបCeará Sporting Club សមាជិកពានរង្វាន់លីគកំពូលប្រេស៊ីល ក្នុងឆ្នាំ២០១៨នេះ ៕
Source: Kampuchea Thmey Daily
0 Comments