ភ្នំពេញ ៖ ប្រតិភូកងទ័ពជើងអាកាសសហរដ្ឋអាមេរិក ដឹកនាំដោយលោកចនហ្វីលីបាន(John Philiban) មេបញ្ជាការរងកងទ័ពជើងអាកាសសហរដ្ឋអាមេរិក បានជួបសំណេះសំណាលជាមួយ លោកនួន ផារត្ន័ អភិបាលរងរាជធានីភ្នំពេញ នារសៀលថ្ងៃទី៦ឧសភា ក្នុងគោលបំណងស្វែងយល់ពីការគ្រប់គ្រង និងការអភិវឌ្ឍន៍រាជធានីភ្នំពេញ។
គណៈប្រតិភូបានលើកឡើងនូវសំណួរជាច្រើនពាក់ព័ន្ធនឹងប្រជាសាស្ត្រ ការគ្រប់គ្រងប្រជាពលរដ្ឋ,សេវាសាធារណៈ,ហេដ្ឋារចនាសម្ព័ន្ធ ការដឹកជញ្ជូនជាដើម។
លោក នួន ផារត្ន័ បានជម្រាបជូនភ្ញៀវពីលក្ខណៈទូទៅនៃភូមិសាស្ត្ររាជធានីភ្នំពេញដែលមានផ្ទៃក្រឡា៦៩២,៤៦គីឡូម៉ែត្រការ៉េ ស្មើនឹង០,៣៨%នៃផ្ទៃដីសរុបទូទាំងប្រទេស មានប្រជាជនរស់នៅអចិន្ត្រៃយ៍២លាននាក់ និងប្រជាជនស្នាក់នៅបណ្តោះអាសន្នមានប្រមាណ៨សែននាក់ ចែកចេញជា១៤ខណ្ឌ,១០៥សង្កាត់ និង៩៥៣ភូមិ។ ជាទីក្រុងមានលក្ខណៈចម្រុះបែបទេសចរណ៍វប្បធម៌ប្រវត្តិសាស្ត្រងាយស្រួលក្នុងការរស់នៅ។
លោកអភិបាលរងបានបញ្ជាក់ថា ស្របពេលដែលកំណើនប្រជាពលរដ្ឋកើនឡើងជាលំដាប់ពីមួយឆ្នាំទៅមួយឆ្នាំបញ្ហាគួរ ឲ្យកត់សំគាល់ជាច្រើនបានក្លាយជាកង្វល់សំរាប់រដ្ឋបាលរាជធានីភ្នំពេញមានជា អាទិ៍ សំរាម,បរិស្ថាន,ចរាចរណ៍,ធនធានមនុស្ស,លូបង្ហូរទឹក,ការដឹកជញ្ជូនក្នុងទី ក្រុង។
ទន្ទឹមនេះ បញ្ហាសណ្តាប់ធ្នាប់ សន្តិសុខក៏កាន់តែប្រឈមជាមួយនឹងនិន្នាការចំណាក់ស្រុកពីជនបទមកទីក្រុងភ្នំពេញផងដែរ ដែលរដ្ឋបាលរាជធានីភ្នំពេញកំពុងខិតខំដោះស្រាយដោយការទទួលខុសត្រូវ៕
Source: Kampuchea Thmey Daily
0 Comments