កីឡាករ Lionel Messi បានជួយឲ្យក្រុម Barcelonaបោះជំហានយ៉ាងវែងឆ្ពោះទៅរកវគ្គផ្តាច់ព្រ័ត្រ Champions Leagueជាមួយនឹង២គ្រាប់របស់គាត់ អំឡុងជ័យជំនះ៣-០លើក្រុម Liverpoolនៅការប្រកួតជើងទី១ វគ្គពាក់កណ្តាលផ្តាច់ព្រ័ត្ររបស់ពួកគេ កាលពីថ្ងៃពុធ ដើម្បីធ្វើឲ្យគ្រាប់បាល់របស់គាត់ជាមួយក្រុមយក្សអេស្ប៉ាញមួយនេះ កើនឡើងដល់៦០០គ្រាប់។
គ្រាប់បាល់ទី៦០០របស់ខ្សែប្រយុទ្ធសញ្ជាតិអាហ្សង់ទីនម្នាក់នេះ បានកើតមានឡើង ពេលដែលគាត់ស៊ុតបាល់ពីន័យ Free-kickកោង ចូលទៅក្នុងសំណាញ់ទីបានសម្រេច។
ក្រុម Barcelonaបានក្តោបក្តាប់ឱកាសរបស់ពួកគេជាមួយនឹង៣គ្រាប់ ខណៈដែលក្រុម Liverpoolបានខ្ជះខ្ជាយឱកាសរបស់ពួកគេទៅវិញ។
អតីតខ្សែប្រយុទ្ធ Luis Suarez របស់ក្លិប Liverpool បានរំឭកក្រុមភ្ញៀវជាមួយនឹងការឆ្កឹះបាល់យ៉ាងអស្ចារ្យបំផុត នៅនាទី២៦ នៅក្នុងទឹកដី Nou Camp ជាមួយនឹងការទម្លុះខ្សែការពារក្រុម Liverpool ដើម្បីពេនមួយជើងពីការបញ្ជូនបាល់របស់កីឡាករ Jordi Alba ចូលទៅក្នុងសំណាញ់ទីបានសម្រេច។
ប្រធានក្រុមBarcelonaកីឡាករ Messiរកបានគ្រាប់បាល់ដ៏សំខាន់នៅយប់នោះ នៅនាទី៧៥ ជាមួយនឹងការទប់បាល់នឹងដើមទ្រូងពីបាល់ផ្លាត់ត្រូវបង្គោលទី រួចឆ្កឹះមួយជើង ចូលសំណាញ់ទីបានសម្រេច ក្រោយកីឡាករ Suarez ស៊ុតបាល់ត្រូវចំរបារទីរួចមកនោះ ដោយប្រើជង្គង់របស់គាត់។
កីឡាករម្នាក់នេះ បានបន្ថែមគ្រាប់បាល់ទី៣សម្រាប់ក្រុម Barcelona និងជួយឲ្យពួកគេរកបានគុណសម្បត្តិដ៏ធំធេង មុនការប្រកួតជើងទី២នៅក្នុងទឹកដី Anfield នាថ្ងៃអង្គារសប្តាហ៍ក្រោយ ជាមួយនឹងការស៊ុតបាល់ពិន័យចូលសំណាញ់ទីបានសម្រេចនៅនាទី៨២។
កីឡាករ Messiបាននិយាយប្រាប់ក្រុមអ្នកសារព័ត៌មានថា ៤គ្រាប់នឹងប្រសើរជាង៣គ្រាប់ ប៉ុន្តែនេះគឺជាលទ្ធផលល្អបំផុតមួយសម្រាប់ពួកយើង៕
Source: Kampuchea Thmey Daily
0 Comments