កាលពីថ្ងៃអង្គារកន្លងទៅ ជើងឯក Grand Slam ៣ជំនាន់កីឡាករ Stan Wawrinka បានលើកឡើងពីការអំពាវនាវរបស់កីឡាករ Andy Murray ឲ្យលោក Justin Gimelstob ចុះចេញពីតំណែងរបស់លោកនៅក្នុងគណៈក្រុមប្រឹក្សាភិបាលសមាគមអាជីពតឺន្នីស ក្រោយជនជាតិអាមេរិកម្នាក់នេះ ត្រូវបានគេកាត់ទោស បន្ទាប់ពីការចោទប្រកាន់ពីបទបង្កហិង្សា។
ជើងឯក Australian Open, US Open និង Wimbledon ម្នាក់នេះ បានសរសេរលើ Twitterថា កីឡាករត្រូវការបញ្ចេញមតិរបស់ពួកគេ។ លោក Justin Gimelstob ត្រូវបានគេកាត់ទោសពីបទបង្កហឹង្សា។ វាមិនអាចទៅរួចនោះទេឲ្យនរណាម្នាក់លើកលែងទោសទង្វើបែបហ្នឹង និងគាំទ្រវានោះ។ ទោះក្នុងមុខជំនួញ ឬក្នុងកីឡា យើងមិនអាចពិភាក្សាពីវាបាននោះទេ។
ទោះបីជាយ៉ាងណាក៏ដោយ លោក Gimelstob ដែលខ្លួនលោកផ្ទាល់ធ្លាប់ជាកីឡាករវាយតឺន្នីសអាជីពដែរនោះ មិនឆ្លើយសារភាពមិនតវ៉ាចំពោះការចោទប្រកាន់ណាមួយនោះឡើយ ហើយរូបលោក ត្រូវបានគេកាត់ទោសឲ្យបម្រើការងារសហគមន៍រយៈពេល៦០ម៉ោង និងការព្យួរទោសដោយមានលក្ខខណ្ឌរយៈ៣ឆ្នាំ ដោយតុលាការក្រុងឡូសអាន់ជឺឡេស កាលពីថ្ងៃទី២២ ខែមេសា កន្លងទៅ។
កីឡាករ Murray បាននិយាយប្រាប់កាសែតអង់គ្លេស Sunday Telegraph កាលពីចុងសប្តាហ៍មុនថា លោកមិនយល់ឃើញថា លោក Justin Gimelstob គួរតែអាចបន្តនៅកាន់តំណែងរបស់លោកនៅ ATP ទៀតទេ។
សូមបញ្ជាក់ថា លោក Gimelstob វ័យ៤១ឆ្នាំ បានឡើងតុលាការ បន្ទាប់ពីឧប្បត្តិហេតុកាលពីខែតុលា ឆ្នាំកន្លងទៅ ដែលមើលឃើញគាត់រងចោទប្រកាន់ថា បានវាយប្រហារមកលើអតីតមិត្តភ័ក្តិ Randall Kaplan ហើយនិង ភរិយា និងកូនស្រីអាយុ២ឆ្នាំរបស់ពួកគេនៅថ្ងៃបុណ្យ Halloween៕
Source: Kampuchea Thmey Daily
0 Comments