អ្នកប្រដាល់ទាំងពីរនាក់នេះ បានឆ្លងកាត់ការប្រកួតជម្រុះអស់ចំនួន៨ប្រកួតម្នាក់ ទម្រាំបានមកដល់វគ្គផ្ដាច់ព្រ័ត្រនេះ។ ក្នុងការប្រកួតពាក់កណ្ដាលផ្ដាច់ព្រ័ត្រថៃ ប៊ុនហានគេបានវាយឈ្នះផន ប៊ុនម៉ៅ អ្នកប្រដាល់ក្លិបបូរីរាជសីហ៍មានរិទ្ធក្នុងទឹកទី២។ ចំណែកធា នុរាជវិញ គេវាយឈ្នះកែវ វិរៈ អ្នកប្រដាល់ក្លិបគុជសាកីឡាដោយពិន្ទុ។
ថៃ ប៊ុនហាន ធ្លាប់វាយឈ្នះធា នុរាជ ម្តងហើយ ក្នុងការប្រកួតជម្រុះដោយឈ្នះទាំងវេទនា។ កាលណោះ ធា នុរាជ គេបានវាយសម្រុកខ្លាំងណាស់ទៅលើប៊ុនហាន ប៉ុន្តែមិនអាចយកឈ្នះប៊ុនហានបាន ព្រោះប៊ុនហានគេមិនត្រឹមតែមានការវាយលុកខ្លាំងនោះទេ ការការពាររបស់គេ ក៏ល្អផងដែរ។ ទោះជាយ៉ាងនេះក្តី សម្រាប់ការប្រកួតផ្តាច់ព្រ័ត្រលើកនេះ ធា នុរាជគេបានត្រៀមខ្លួនបានយ៉ាងល្អ ដើម្បីយកឈ្នះថៃ ប៊ុនហាន វិញ និងយកខ្សែក្រវាត់គូបូតាឲ្យបាន។ នេះបើតាមលោកធា នុរាជ គេអះអាងឲ្យដឹង។
ប៉ុន្តែយ៉ាងណា ថៃ ប៊ុនហានមិនងាយស្រួលនឹងបង្ក្រាបនោះទេ។ គេមានកណ្តាប់ដៃខ្លាំង ស្នៀតទាត់ក៏ខ្លាំងដែរ ហើយមានចិត្តប្រដាល់ធំថែមទៀត។ ប៉ុន្តែការប្រកួតលើកនេះ ប៊ុនហាន ក៏ត្រូវតែមានការប្រុងប្រយ័ត្នខ្ពស់ដែរទើបបាន ពិសេសបើអាចទប់ស្នៀតកណ្តាប់ដៃ និងស្នៀតទាត់របស់ធា នុរាជបាន ទើបមានសង្ឃឹមឈ្នះ បើមិនដូច្នោះទេគឺពិបាកហើយ ព្រោះនុរាជខ្លាំងនឹងស្នៀតដៃនិងជើងនេះឯង។
ចាំមើល រវាងថៃ ប៊ុនហាន និង ធា នុរាជ ជួបគ្នាក្នុងការប្រកួតផ្តាច់ព្រ័ត្រនេះ តើនរណាឈ្នះ នរណាជាម្ចាស់ខ្សែក្រវាត់ជើងឯកគូបូតាទម្ងន់៦៥គីឡូក្រាមនោះ ? គួរបញ្ជាក់ថា អ្នកដែលឈ្នះបានខ្សែក្រវាត់នេះ នឹងទទួលបានប្រាក់រង្វាន់លុយសុទ្ធ២.៥០០ដុល្លារអាមេរិក ឯអ្នកចាញ់ដែលបានលេខ២នោះ ទទួលបាន១.៥០០ដុល្លារអាមេរិក។
ចំពោះការប្រកួតដណ្តើមចំណាត់ថ្នាក់លេខ៣វិញនោះ គឺរវាងកែវ វិរៈ អ្នកប្រដាល់ក្លឹបគុជសាកីឡា និង ផន ប៊ុនម៉ៅ អ្នកប្រដាល់ក្លឹបបូរីរាជសីហ៍មានរិទ្ធ ។ ពីរនាក់នេះ ក៏ធ្លាប់ប៉ះគ្នាក្នុងវគ្គជម្រុះម្តងដែរហើយ ដោយវិរៈឈ្នះប៊ុនម៉ៅក្នុងទឹកទី៣។
សម្រាប់ការជួបគ្នាលើកនេះ ពុំមាននរណាហ៊ានអះអាងថា ផន ប៊ុនម៉ៅ ឈ្នះកែវ វិរៈ នោះឡើយ ។ ចាំមើល តើចំណាត់ថ្នាក់លេខ៣ បានទៅលើកែវ វិរៈ ឬក៏ផន ប៊ុនម៉ៅ ? ។ ចំណាត់ថ្នាក់លេខ៣នេះ នឹងទទួលបាន១.០០០ដុល្លារអាមេរិក ហើយលេខ៤បាន៦០០ដុល្លារអាមេរិក ។
ព្រឹត្តិការណ៍កក្រើកមួយទៀតនៅក្នុងថ្ងៃផ្តាច់ព្រ័ត្រខ្សែក្រវាត់គូបូតានេះដែរ គឺការប្រកួតរវាងឡៅ ស៊ីណាត អ្នកប្រដាល់ក្លិបកងពលតូចទ័ពឆ័ត្រយោង៩១១ និង ឡុង សុភី អ្នកប្រដាល់ក្លឹបសាលវ័ន្តកីឡា ដើម្បីដណ្តើមពានគូបូតាប្រចាំខែ ដែលមានរង្វាន់១.០០០ដុល្លារ គឺអ្នកឈ្នះបាន៧០០ដុល្លារ និងអ្នកចាញ់បាន៣០០ដុល្លារ។
អ្នកប្រដាល់ជើងខ្លាំងទាំងពីរនាក់នេះ ធ្លាប់ប៉ះគ្នាចំនួន៤ដងមកហើយ តាំងពីឆ្នាំ២០០៨ ដល់ឆ្នាំ២០១៣ ។ ក្នុងការជួបគ្នា៤ដងនេះ ឡៅ ស៊ីណាតឈ្នះបាន៣ដង និងចាញ់សុភីម្តង ក្នុងការជួបគ្នាលើកចុងក្រោយនោះ ។ ចាំមើល ការជួបគ្នាលើកនេះ តើអ្នកណាជាអ្នកឈ្នះ ?៕
0 Comments