ព្រះសង្ឃមួយអង្គរងការបាញ់ប្រហារត្រូវដៃបន្ទាប់ពីពេលដែលប៉ូលិសបានប្រើឧស្ម័នបង្ហូរទឹកភ្នែក និងបើកការបាញ់ប្រហារនៅពេលមានការប៉ះទង្គិចគ្នាមួយ ជាមួយនឹងជនជាតិទីបេត៍នៅពីខាងក្រៅស្ថានីយប៉ូលិសមួយកន្លែងនៅភាគខាងលិចខេត្ដស៊ីជន់ ដែលមានព្រំដែនជាមួយនឹងទឹកដីនៃប្រទេសទីបេត៍នោះ។ នេះជាការលើកឡើងរបស់ចលនា Free Tibet ដែលមានស្នាក់ការនៅអង់គ្លេស តាមរយៈសេចក្ដីប្រកាសព័ត៌មានមួយ។ ក្រុមនេះមិនបាននិយាយទេថា តើអំពើហិង្សានោះកើតមាននៅពេលណា? ហើយប៉ូលិសនៅក្នុងតំបន់វិញ ក៏មិនអាចស្វែងរកការធ្វើអត្ថាធិប្បាយបានឡើយ។
សកម្មជនសិទ្ធិមនុស្សនិយាយថា ប្រទេសចិន បានជាន់ឈ្លីទៅលើសេរីភាពជំនឿសាសនា ព្រមទាំងវប្បធម៌នៅក្នុងទឹកដីទីបេត៍ ដោយប្រទេសនេះបានគ្រប់គ្រងយ៉ាងតឹងតែង ចាប់តាំងពីកងទ័ពរំដោះប្រជាជនបានដណ្ដើមកាន់កាប់ដោយងាយៗទៅលើតំបន់ទីបេត៍នេះនៅឆ្នាំ១៩៥០។ ដោយឡែកប្រទេសចិនវិញបានបដិសេធការទិតៀនបែបនេះដោយនិយាយថា ខ្លួនកាន់កាប់ដឹកនាំទឹកដីទីបេត៍ ជាការបញ្ចប់ភាពជាកញ្ចះគេ ដោយនាំយកមកវិញនូវការអភិវឌ្ឍ និងការប្រយុទ្ធប្រឆាំងនឹងភាពក្រីក្រក្នុងតំបន់។
រីឯពលរដ្ឋទីបេដែលស្ថិតនៅក្នុងទឹកដីទីបេត៍វិញ ព្រមទាំងផ្នែកជាច្រើនទៀតនៃប្រទេសចិន បានធ្វើការប្រឆាំងតវ៉ាក្នុងរយៈពេលប៉ុន្មានឆ្នាំមកនេះ ព្រោះតែមិនពេញចិត្ដជាមួយនឹងការគ្រប់គ្រងរបស់ចិន ដោយសុខចិត្ដដុតខ្លួនឯងស្លាប់បន្ទាប់ពីចាក់សាំងស្រោចលើខ្លួននោះ។ នៅឆ្នាំ២០១២ មានជនជាតិទីបេត៍លើសពី៨០នាក់ បានធ្វើការប្រឆាំងតវ៉ាយ៉ាងខ្លាំងក្លា ដោយភាគច្រើននៃចំនួននោះត្រូវបានគេជឿថា ស្លាប់ទៅហើយ។ ស្ដ្រីម្នាក់អាយុ២០ឆ្នាំ បានចាក់ប្រេងស្រោចខ្លួន ហើយដុតភ្លើងស្លាប់កាលពីថ្ងៃចន្ទ នៅឯស្រុកណាហ្គាបា ស្ថិតនៅក្នុងខេត្ដស៊ីជន់។ កាលពីសប្ដាហ៍កន្លងមកនេះ បុរសម្នាក់អាយុ៣៤ឆ្នាំ ក៏បានស្រោចសាំងលើខ្លួនដុតសម្លាប់នៅពីខាងមុខស្ថានីយប៉ូលិសមួយ នៅភាគខាងលិចខេត្ដហ្គង់ស៊ូ។ សម្ដេចសង្ឃដាឡៃឡាម៉ា មេដឹកនាំដួងព្រលឹងនៃទឹកដីទីបេបានភៀសព្រះកាយទៅកាន់ប្រទេសឥណ្ឌា បន្ទាប់ពីការងើបប្រឆាំងតវ៉ានឹងការដឹកនាំរបស់ប្រទេសចិនក្នុងឆ្នាំ១៩៥៩រងបរាជ័យមកនោះ៕
0 Comments