បាត់ដំបង ៖ ស្នូរសំឡេងផ្ទុះធុងហ្គាស៍រថយន្តហាក់បីដូចជាសំឡេងផ្ទុះគ្រាប់បែក ដែលធ្វើឲ្យមានការភ្ញាក់ផ្អើលកាលពីវេលាម៉ោង៤ល្ងាច នាថ្ងៃទី១២ ខែមករា ឆ្នាំ២០១៥ ត្រង់ចំណុចក្នុងយានដ្ឋាន ប៊ុនធាងហ្គាស៍ ស្ថិតក្នុងភូមិរំចេក៥ សង្កាត់រតនៈ ក្រុងបាត់ដំបង ខណៈដែលក្រុមជាងកំពុងធ្វើការជួសជុលរថយន្តឲ្យអតិថិជន និងបង្កឲ្យមនុស្សចំនួនពីរនាក់បានរងរបួសផងដែរ។
ក្រោយពេលចុះត្រួតពិនិត្យដល់កន្លែងកើតហេតុលោក គឹម ប៊ុនធឿន នាយការិយាល័យ
បង្ការពន្លត់អគ្គីភ័យនៃស្នងការដ្ឋាននគរបាលខេត្តបានលើកឡើងថា មុនពេលកើតហេតុមានអតិថិជនម្នាក់បានយករថយន្តម៉ាកកាមរី93 ពណ៌សំបកឪឡឹក ពាក់ស្លាកលេខបាត់ដំបង2A 5818យកមកឲ្យយានដ្ឋាននេះជួសជុល។
លោកនាយការិយាល័យបានបន្តថា នៅពេលជួសជុលនោះគឺមានម្ចាស់យានដ្ឋានឈ្មោះ
ឃាង ប៊ុនធាង អាយុ៣២ឆ្នាំ ជាអ្នកជួសជុលផ្ទាល់ដៃ ព្រមទាំងមានកូនជាងមួយចំនួនទៀតនៅជួយ
ក្បែរនឹងរថយន្តនេះផងដែរ ក៏ស្រាប់តែធុងហ្គាស៍ដែលបំពាក់នៅក្នុងឃ្លុបខាងក្រោយរថយន្តបានផ្ទុះឡើងដូចសំឡេងផ្ទុះគ្រាប់បែក ដែលធ្វើឲ្យកញ្ចក់ និងតួរថយន្តផ្នែកខាងក្នុងត្រូវបានបែកខ្ទេចខ្ទី
ព្រមទាំងមានអណ្ដាតភ្លើងឆាបឆេះឡើងយ៉ាងសន្ធោសន្ធៅផងដែរ ដែលធ្វើឲ្យកូនជាងម្នាក់ឈ្មោះ
ជាន ស៊ីណា ភេទប្រុស អាយុ២១ឆ្នាំរងរបួសយ៉ាងធ្ងន់ធ្ងរដែលត្រូវដឹកបញ្ជូនទៅសង្គ្រោះនៅឯមន្ទីរពេទ្យ ចំណែកមេជាងដែលជាម្ចាស់យានដ្ឋានក៏រងរបួសបន្តិចបន្តួចដែរ។
ជាសំណាងល្អព្រោះនៅពេលដែលរថយន្តពន្លត់អគ្គីភ័យរបស់ស្នងការដ្ឋាននគរបាលខេត្ត
ចេញដំណើរទៅដល់គឺម្ចាស់យានដ្ឋានបានប្រើប្រាស់បំពង់ឧស្ម័នចំនួនពីរធុងបាញ់ពន្លត់បានទាន់ពេលវេលាដែលធ្វើឲ្យអណ្ដាតភ្លើងរលត់ស្ងប់ស្ងាត់ទៅវិញ និងមិនអាចរាលដាលទៅទីដទៃទៀតបានឡើយ។
នៅចំពោះមុខសមត្ថកិច្ចម្ចាស់យានដ្ឋានបានរៀបរាប់ថា ការផ្ទុះធុងហ្គាស៍នេះគឺដោយសារ
តែមានការឆ្លងចរន្តអគ្គិសនីនៅក្នុងរថយន្តពេលដែលក្រុមជាងកំពុងជួសជុល។ ដោយឡែកបើតាមការសន្និដ្ឋានពីមជ្ឈដ្ឋាននានាបាននិយាយថា អាចមានជាងណាមួយទៅជួសជុលត្រង់ចំណុចធុងហ្គាស៍ ទើបបណ្ដាលឲ្យផ្ទុះឡើងបែបនេះបើត្រឹមឆ្លងចរន្តគឺវាមិនងាយនឹងផ្ទុះនោះទេ ព្រោះធុងហ្គាស៍
វាមានភាពរឹងមាំនិងក្រាស់ណាស់ ចំណែកទុយោក៏សុទ្ធតែស្ពាន់ទាំងអស់ ដូច្នេះនេះគឺជាកំហុស
បច្ចេកទេសរបស់ក្រុមជាងទាំងស្រុង នេះបើម្ចាស់រថយន្តប្ដឹងគឺម្ចាស់យានដ្ឋានត្រូវតែចេញសំណង
ទាំងស្រុងដោយគ្មានការប្រកែកតវ៉ាឡើយ៕
សោ និយមរ័ត្ន
0 Comments