លោកអភិបាលខេត្តប្រតិកម្មអ្នកយកសំរាមទៅចាក់ចោលតាមចិញ្ចើមផ្លូវកៅស៊ូ ខាងកើតស៊ីម៉ាក់ អាជ្ញាធរមូលដ្ឋានទប់ស្កាត់មិនទាន់បាន
កំពង់ឆ្នាំង ៖ នៅតាមចិញ្ចើមផ្លូវកៅស៊ូប្រវែងប្រមាណ៥០០ម៉ែត្រ នៅខាងកើតបន្ទាយស៊ីម៉ាក់ក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ត្រូវបានគេយកសំរាមទៅចាក់ចោលយ៉ាងអនាធិបតេយ្យជាយូរខែមកហើយ បញ្ហានេះបានធ្វើឲ្យលោកអភិបាលខេត្តកំពង់ឆ្នាំង មានប្រតិកម្ម លើកឡើងក្នុងវេទិកាសាធារណៈមួយនាពេលថ្មីៗនេះនៅក្នុងសាលាក្រុងកំពង់ឆ្នាំង។
មកដល់ពេលនេះការចាក់សំរាមមកដល់ពេលនេះកាន់តែកើនឡើងរាល់ថ្ងៃ គេពុំទាន់ឃើញអាជ្ញាធរមូលដ្ឋានធ្វើការទប់ស្កាត់បាននោះឡើយ។
នៅក្នុងវេទិកានោះលោក ឈួរ ច័ន្ទឌឿន អភិបាលខេត្តកំពង់ឆ្នាំងបានលើកឡើងថា តាមលោកដឹងសំរាមទាំងនោះត្រូវបានប្រជាពលរដ្ឋមួយចំនួននៅក្នុងក្រុងកំពង់ឆ្នាំង បានវេចខ្ចប់ដាក់ការុង ឬស្បោងផ្លាស្ទីកដែលជាសំរាមតាមផ្ទះយកទៅបោះចោលទីនោះនៅពេលយប់ លោកឆ្ងល់ថាសេវាប្រមូលសំរាមក្នុង១ខែៗថ្លៃតែ៥ពាន់ទៅ១ម៉ឺនរៀលប៉ុណ្ណោះ ហេតុអ្វីក៏ពួកគាត់ មិនព្រមបង់ឲ្យក្រុមហ៊ុនប្រមូលសំរាម បែរជាសុខចិត្តលួចយកសំរាមទៅបោះចោលយ៉ាងអនាធិបតេយ្យបែបនេះទៅវិញ ដែលធ្វើឲ្យប៉ះពាល់យ៉ាងធ្ងន់ធ្ងរដល់បរិស្ថាន អនាម័យ និង សុខមាលភាពប្រជាពលរដ្ឋ ក៏ដូចជាប៉ះពាល់ដល់សោភណភាពទីក្រុងផងដែរ។
លោកអភិបាលខេត្តបានសំណូមពរដល់អាជ្ញាធរមូលដ្ឋាន ក៏ដូចជាសមត្ថកិច្ចពាក់ព័ន្ធ ប្រជាពលរដ្ឋ ត្រូវរួមគ្នាសហការទប់ស្កាត់ និងលុបបំបាត់ភាពអនាធិបតេយ្យខាងលើនេះ ដោយរក ឲ្យឃើញអ្នកយកសំរាមទៅបោះចោល និងចាប់ផាកពិន័យឲ្យបានម៉ឺងម៉ាត់ ដើម្បីអោយពួកគេបញ្ឈប់សកម្មភាពលួចយកសំរាមទៅបោះចោលនៅចំណុចខាងលើ និងចំណុចផ្សេងៗមួយចំនួនទៀតនៅក្នុងក្រុងកំពង់ឆ្នាំង។
ទាក់ទងនឹងបញ្ហាខាងលើនេះនៅព្រឹកថ្ងៃទី១២ ខែមករា ឆ្នាំ២០១៥ លោក សិដ្ឋ សុខរិន ចៅ សង្កាត់ប្អេរ បានបញ្ជាក់អោយដឹងថា ចំពោះសំរាមនៅចំណុចខាងលើនេះ កន្លងមកលោកបានឲ្យប្រជាការពារប្រមូលដុតចោលអស់មួយចំនួនហើយ និងអោយប្រជាការពារចាំឃ្លាំមើល ចាប់អ្នកលួចយកសំរាមមកបោះចោលនៅទីនេះ ដើម្បីធ្វើការផាកពិន័យ និងធ្វើកិច្ចសន្យាបញ្ឈប់ ការយកសំរាមមកបោះចោលនៅទីនោះ។ ដើម្បីលើកទឹកចិត្តដល់ប្រជាការពារ នៅក្នុងកិច្ចការ ខាងលើនេះ លោកនឹងផ្តល់ជារង្វាន់អោយ ប្រសិនបើចាប់បានអ្នកសំរាមទៅបោះចោលម្នាក់ លោកឲ្យរង្វាន់លើកទឹកចិត្ត៤ម៉ឺនរៀល។
លោកចៅសង្កាត់បានឲ្យដឹងទៀតថា សំរាមទាំងនោះមួយចំនួនចេញពីតាមផ្ទះប្រជាពលរដ្ឋមួយចំនួននៅតាមមូលដ្ឋានផ្សេងៗនៅក្នុងក្រុងកំពង់ឆ្នាំង និងមួយចំនួនទៀតជាសំរាម របស់អាជីវករលក់ដូរនៅក្នុងផ្សារលើនិងផ្សារក្រោម។ លោកគិតថាថ្ងៃណាមួយប្រជាការពារ នឹង វែកមុខអ្នកយកសំរាមយកមកចោលនៅទីនោះជាមិនខានឡើយ៕
ឈៀង ថារិទ្ធ
0 Comments