ភ្នំពេញ ៖ មួយរយៈចុងក្រោយនេះនៅក្នុងភូមិសាស្ត្រ ខណ្ឌចំការមនមានអំពើឆក់ ប្លន់ បានកើតឡើងស្ទើររាល់ថ្ងៃ ពិសេសអំពើភ្ជង់គំរាមប្លន់នៅពេលយប់បានកើតឡើងមិនសូវលុះពេលឡើយ ហើយសមត្ថកិច្ចមិនដែលបង្ក្រាបបានមួយករណីណានៅឡើយទេ។
ជាក់ស្ដែងកាលពីវេលាម៉ោង១១និង៤០នាទីយប់ថ្ងៃទី១ ខែមករា ឆ្នាំ២០១៥ នៅចំណុចខាងលិចវត្តទួលទំពូង តាមបណ្តោយផ្លូវលេខ១៥៥ ស្ថិតក្នុងសង្កាត់ទួលទំពូងទី១ ខណ្ឌចំការមន នារីម្នាក់ក្នុងចំណោម២នាក់ ត្រូវបានក្រុមចោរមួយក្រុមប្រដាប់ដោយកាំភ្លើងខ្លីមួយដើមធ្វើសកម្មភាពភ្ជង់ប្លន់គំរាមបាញ់យកម៉ូតូ តែមិនបានសម្រេចបានត្រឹមតែ កាបូបលុយ និងទូរស័ព្ទចំនួន៣គ្រឿងរួចគេចខ្លួនបាត់ដោយសុវត្ថិភាព។
នារីរងគ្រោះទាំង២នាក់ត្រូវបានគេស្គាល់ ទី១. ឈ្មោះ ចែម ស្រីនួន អាយុ១៧ឆ្នាំ ស្នាក់នៅផ្ទះជួលម្តុំកន្លែងកើតហេតុ និងទី២.ឈ្មោះ ធី ស្រីឡែន អាយុ១៨ឆ្នាំ ស្នាក់នៅផ្ទះជួលនៅចំការដូង។ម៉ូតូដែលក្រុមចោរប្លន់មិនបានសម្រេចម៉ាក អាយខនពណ៌ត្រួយចេក ពាក់ស្លាកលេខភ្នំពេញ1X2496។
បើតាមសម្តីនារីរងគ្រោះបានឲ្យដឹងថា នៅមុនពេលកើតហេតុពួកគេទាំងពីរនាក់បានជិះម៉ូតូឌុបគ្នាចេញពីខួបកំណើតមិត្តភ័ក្ដិនៅក្លឹបកម្សាន្តថប។ ក្រោយពីចប់ពិធីខួបកំណើត ពួកគេបានជិះម៉ូតូឌុបគ្នាមកផ្ទះវិញ ខណៈនោះស្រាប់តែមានជនសង្ស័យ២នាក់ជិះម៉ូតូឌ្រីមសេ១២៥មួយគ្រឿងតាមនាងពីក្រោយ រហូត ប៉ុន្តែស្មានថាជិះតាមផ្លូវធម្មតា។ លុះមកដល់ចំណុចខាងលិចវត្តទួលទំពូង តាមបណ្ដោយផ្លូវលេខ១៥៥ ស្ថិតក្នុងសង្កាត់ទួលទំពូងទី១ ខណ្ឌចំការមន ក៏ស្រាប់តែពួកគេបានជិះវ៉ា និងស្ទាក់នៅពីមុខម៉ូតូពួកនាង រួចក៏បានដកកាំភ្លើងខ្លីមួយដើមគំរាមបាញ់ និងបានឲ្យពួកនាងចុះពីលើម៉ូតូ ប៉ុន្តែរូបនាង ដែលជិះពីក្រោយ ហើយស្តាយសម្បត្តិផ្ទាល់ខ្លួននោះ ក៏មិនព្រមឲ្យ រួចបានដកសោចេញពីម៉ូតូ។ ប្រការនេះធ្វើឲ្យជនសង្ស័យមានការខឹងសម្បាក៏ស្ទុះដកកាំភ្លើងខ្លី វាយក្បាលនារីរងគ្រោះបណ្តាលឲ្យបែក ហូរឈាមស្រោចពេញខ្លួនតែម្តង។
នារីរងគ្រោះបន្តថា បន្ទាប់ពីវាយក្បាលខ្លួនរួចមកពួកគេបានកញ្ឆក់យកកាបូប និងទូរស័ព្ទដៃចំនួន៣គ្រឿងរបស់នាង រួចក៏ឡើងម៉ូតូជិះគេចខ្លួនបាត់តែម្តង ហើយរូបនាងបានរត់ស្រែកឲ្យគេជួយទាំងដៃខ្ទប់ក្បាលដើម្បីទប់ឈាមដែលកំពុងហូរ។ ភ្លាមៗនោះប្រជាពលរដ្ឋក៏បានទំនាក់ទំនងទៅកម្លាំងអាវុធហត្ថខណ្ឌចំការមនដើម្បីចុះមកធ្វើការអន្តរាគមន៍ ប៉ុន្តែនៅនៅពេលនោះគេមិនឃើញមានសមត្ថកិច្ចប៉ូលិសមូលដ្ឋានណាម្នាក់ចុះទៅកន្លែងកើតហេតុឡើយ។ ដោយយប់ជ្រៅពេក និងមានរបួសផងនារីរងគ្រោះមិនបានទៅដាក់ពាក្យបណ្ដឹងនោះទេ ចាំពេលព្រឹក។
សូមបញ្ជាក់ថា មួយរយៈពេលចុងក្រោយនេះនៅក្នុងភូមិសាស្ត្រខណ្ឌចំការមនមានករណីប្លន់ប្រដាប់អាវុធកើតឡើងជាបន្តបន្ទាប់ ហើយប្រជាពលរដ្ឋបានសំណូមពរដល់លោកស្នងការនគរបាលក្រុងភ្នំពេញមានវិធានការ ពង្រឹង នៅក្នុងមូលដ្ឋាននេះផង ព្រោះអីលោកអធិការ បច្ចុប្បន្នហាក់មិនមានសមត្ថភាពទប់ស្កាត់ និងបង្ក្រាបបទល្មើសដែលកំពុងកើតឡើងឡើយ ខណៈដែលប្រជាពលរដ្ឋកំពុងរស់នៅក្នុងភាពភ័យខ្លាច ដោយសារតែនៅក្នុងមូលដ្ឋានរបស់ខ្លួនមិនមានសុវត្ថិភាពនោះ៕
0 Comments