ភ្នំពេញ ៖ នាព្រឹកថ្ងៃទី៥ ខែមករា ឆ្នាំ២០១៥ ការិយាល័យនគរបាលកម្រិតធ្ងន់នៃស្នងការរាជធានីភ្នំពេញបានបង្ហាញមុខចោរប្លន់ចំនួន២នាក់ រួមនឹងវត្ថុតាងមួយចំនួនដល់អ្នកសារព័ត៌មានបន្ទាប់ពីសមត្ថកិច្ចធ្វើការស្រាវជ្រាវតាមចាប់មុខសញ្ញាដេញចាប់ប្រផាត់ប្រភីងបាញ់ស្លាប់ម្នាក់ និងបាន០២នាក់ ហើយយកមកស្នងការក្រុងដើម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់។
លោក អេង សោភា នាយការិយាល័យនគរបាលកម្រិតធ្ងន់នៃស្នងការរាជធានីភ្នំពេញ ក្នុងឱកាសដែលធ្វើសន្និសីទកាសែតបង្ហាញមុខក្រុមចោរប្លន់ប្រដាប់អាវុធនោះ បានឱ្យដឹងថា ដោយទទួលបានបទបញ្ជាពីអគ្គស្នងការនគរបាលជាតិ និងជាស្នងការរាជធានីភ្នំពេញ លោក ជួន ណារិន្ទស្នងការរងទទួលផែនយុត្តិធម៌នគរបាលការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញបានស្រាវស្រាវរហូតឈានដល់ការបង្ក្រាបបក្ខពួក២នាក់ និងបាញ់ស្លាប់ម្នាក់ ដោយសារបាញ់តដៃសមត្ថកិច្ច កាលពីថ្ងៃទី១ ខែមករា ឆ្នាំ២០១៥ នៅសង្កាត់ព្រៃស ខណ្ឌដង្កោ។
លោក នាយការិយាល័យបន្តថា ការស្រាវជ្រាវបង្ក្រាបក្រុមចោរប្លន់ ដោយទទួលជោគជ័យចំនួន២នាក់ និងបាញ់ស្លាប់ម្នាក់ កាលពីវេលាម៉ោង១៦ល្ងាច ថ្ងៃទី១ ខែមករា ឆ្នាំ២០១៥ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ គី ធើន ហៅភួរ អាយុ២៧ឆ្នាំ ដកហូតបានអាវុធខ្លី១ដើម និងគ្រាប់ជាង១០គ្រាប់ ស្ថិតក្នុងសង្កាត់ស្ទឹងមានជ័យខណ្ឌមានជ័យ ក្រោយមកនាំក្រុមចោរទាំងនោះមកម្តុំលូ៥សង្កាត់ស្ទឹងមានជ័យ ឆែកឆេរបន្ទប់ជួលក៏ឃាត់ខ្លួនជនសង្ស័យម្នាក់ទៀត ឈ្មោះ សូត្រ យ៉ា ហៅយ៉ាន អាយុ៣០ឆ្នាំ មានទីលំនៅស្នាក់នៅផ្ទះជួលម្តុំលូ៥ សង្កាត់ស្ទឹងមានជ័យ ហើយចំណែកបក្ខពួកម្នាក់ទៀតពេលឃើញសមត្ថកិច្ចយើងក៏បាញ់មកលើសមត្ថកិច្ច ហើយរត់គេចខ្លួនបាត់។ លោក អេង សោភា បន្តថា ក្រោយពីរត់គេចខ្លួន ជននេះបានទៅភ្ជង់ប្លន់ម៉ូតូសង់កូរ៉េពីឈ្មោះ ស៊ុំ រស់ នៅតាមផ្លូវ ហើយជិះរត់ទៅដល់ផ្លូវលំមុខរោងចក្រប្រាយស្កាយ ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ផ្ដួលចោល រួចទៅភ្ជង់ប្លន់ម៉ូតូមួយគ្រឿងទៀតម៉ាកសេ១២៥ ពណ៌ខ្មៅ សេរី២០១២ ពីឈ្មោះ ហោ ឌីណា ហើយជិះរត់គេចខ្លួនបានមួយសន្ទុះផ្ដួលចោលទៀតហើយ គេចខ្លួន ខណៈដែលសមត្ថកិច្ចដេញកិតៗប្រផាត់ប្រភីង ជនសង្ស័យបានបាញ់មកលើសមត្ថកិច្ចជាច្រើនគ្រាប់ទៀត ពេលនោះសមត្ថកិច្ចបាញ់ការពារខ្លួនវិញ បណ្ដាលឱ្យជនសង្ស័យដេកស្លាប់នៅវាលស្រែ ភូមិកំរៀង សង្កាត់ព្រែវែង ខណ្ឌដង្កោ ហើយកម្លាំងបានដកហូតបានអាវុធមួយដើម។
លោកបន្តថា ជនសង្ស័យដែលស្លាប់មាន ឈ្មោះ ខេង ពិសិដ្ឋ ហៅឃល អាយុ៣១ឆ្នាំ មានស្រុកកំណើតខេត្តកំពង់ស្ពឺ មានទីលំនៅនិងមុខរបរមិនពិតប្រាកដ ហើយជននេះមានដីកាចាប់ខ្លួន លេខ២៤៨ តព្រ ចុះថ្ងៃទី៦ ខែឧសភា ឆ្នាំ២០១៤ ពីបទប្លន់សម្លាប់មានស្ថានទម្ងន់ទោស និងទទួលផលចោរកម្ម កាលពីថ្ងៃទី៣០ ខែមករា ឆ្នាំ២០១៤ កន្លងទៅ និងធ្វើសកម្មភាពប្លន់ម៉ូតូជាច្រើនលើកក្នុងរាជធានីភ្នំពេញ។ សមត្ថកិច្ចបានឱ្យដឹងទៀតថា ក្រុមបក្ខពួកចោរប្លន់ទាំង៣នាក់នេះ ធ្លាប់ធ្វើសកម្មភាពប្លន់ក្នុងរាជធានីភ្នំពេញយ៉ាងកក្រើកកន្លងមកមាន២១លើក។
សមត្ថកិច្ចបានបន្តថា មុនពេលឃាត់ជនសង្ស័យទាំងនេះ សមត្ថកិច្ចបានធ្វើការស្រាវជ្រាវយ៉ាងយកចិត្តទុកដាក់បំផុតទើបទទួលបានលទ្ធផលនេះ។ បច្ចុប្បន្នក្រុមចោរប្លន់២នាក់នេះសមត្ថកិច្ចកំពុងធ្វើការសួរនៅស្នងការរាជធានីភ្នំពេញ និងកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់។ ដោយឡែកបក្ខពួកផ្សេងទៀត សមត្ថកិច្ចកំពុងតែស្រាវជ្រាវបន្តដើម្បីចាប់ខ្លួនយកមកផ្ដន្ទាទោសតាមផ្លូវច្បាប់៕
ឌីរៀ
0 Comments