ភ្នំពេញ ៖ ក្នុងរយៈពេលប្រមាណជាបីម៉ោងប៉ុណ្ណោះ នៅក្នុងភូមិសាស្ត្រខណ្ឌចំការមនមានករណី ភ្ជង់គំរាមប្លន់យកម៉ូតូចំនួនពីរលើកកើតឡើងផ្ទួនៗគ្នា ដោយមិនរំខានដំណេកមន្ត្រីណាម្នាក់ឡើយ។
អំពើប្លន់លើកទី១-កាលពីវេលាម៉ោង២២នឹង០០នាទីយប់ ថ្ងៃទី០៤ ខែមករា ឆ្នាំ២០១៥ ស្ថិតនៅតាមបណ្តោយផ្លូវលេខ៤៤៦ ខាងកើតផ្សារទួលទំពូងជាង១០០ម៉ែត្រ ស្ថិតក្នុងសង្កាត់ទួលទំពូងទី១ ខណ្ឌចំការមន។ សាក្សីបានឲ្យដឹងថា នៅមុនពេលកើតហេតុគេឃើញបុរសម្នាក់ជាអ្នករត់ម៉ូតូឌុបបានជិះម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខ ដោយឌុបជនសង្ស័យធ្វើដំណើរតាមបណ្តោយផ្លូវលេខ១៤៣ ក្នុងទិសដៅពីត្បូងទៅជើង លុះដល់ចំណុចកែងផ្លូវលេខ៤៤៦ ស្រាប់តែជនសង្ស័យបានដកកូនកាំបិតចុងស្រួចមួយដើមចេញពីចង្កេះភ្ជង់គំរាមអារកបុរសជាអ្នករត់ម៉ូតូឌុប។ ដោយបុរសអ្នករត់ម៉ូតូឌុបមានស្មារតីរឹងមាំក៏បានច្រានជនសង្ស័យធ្លាក់ពីលើម៉ូតូ ហើយស្រែកថា ចោរៗទើបជនសង្ស័យភ័យតក់ស្លុតរត់គេចខ្លួនតាមបណ្តោយផ្លូវលេខ៤៤៦ រហូតជិតដល់ផ្សារទួលទំពូង តែត្រូវប្រជាពលរដ្ឋដែលកំពុងអង្គុយជជែកគ្នានៅមុខផ្ទះឃើញ ក៏នាំគ្នាស្ទាក់ព័ន្ធវាយស្ទើរស្លាប់។ ប្រជាពលរដ្ឋបានបន្តថា បន្ទាប់ពីមានហេតុការណ៍នេះ ពួកគាត់បានរាយការណ៍ជូនសមត្ថកិច្ចនគរបាលខណ្ឌចំការមន មួយសន្ទុះក្រោយមកទើបឃើញសមត្ថកិច្ចមកដល់។
ករណីប្លន់លើកទី២-កាលពីវេលាម៉ោង១នឹង៣០នាទីរំលងអាធ្រាត្រ ឈានចូលថ្ងៃទី៥ ខែមករា ឆ្នាំ២០១៥ នៅចំណុចមុខភោជនីយដ្ឋានម្លប់មានត្រីឆ្ងាញ់ តាមបណ្តោយផ្លូវ២៩៤ ស្ថិតក្នុងសង្កាត់ទន្លេបាសាក់ ខណ្ឌចំការមន។ ក្រុមចោរមានគ្នា៥នាក់ ប្រដាប់ដោយកាំភ្លើងខ្លី៣ដើម បានធ្វើសកម្មភាពភ្ជង់ប្លន់យកគ្រឿងអលង្ការមួយចំនួន និងម៉ូតូមួយគ្រឿងពីយុវជនម្នាក់បានសម្រេច។ ជនរងគ្រោះមានឈ្មោះ សុវណ្ណាណូ ភេទប្រុស អាយុ២៣ឆ្នាំ មានទីលំនៅម្តុំផ្សារអូរឫស្សី ស្ថិតក្នុងសង្កាត់អូរឫស្សី ខណ្ឌ៧មករា ហើយម៉ូតូដែលត្រូវបានក្រុមចោរភ្ជង់យកទៅបាត់នោះម៉ាក អ៊ឹមអេសអ៊ិច ពណ៌ស ពាក់ស្លាកលេខភ្នំពេញ 1CP-2197 ព្រមទាំងគ្រឿងអលង្ការមួយចំនួន ទូរស័ព្ទដៃ និងកាបូបលុយផងដែរ។ ជនរងគ្រោះបានឱ្យដឹងថា នៅមុនពេលកើតហេតុរូបគេរួមជាមួយនឹងមិត្តភក្ដិជាច្រើននាក់បាននាំគ្នាចូលទៅក្នុងក្លឹបកំសាន្ត អស៊ីអេ លុះម៉ោងប្រមាណជា១នឹង១៥នាទីរូបគេបានចេញពីក្លឹបមុនគេ ដោយសារតែមាននារីស្រស់ស្អាតម្នាក់ដែលទើបតែស្គាល់គ្នានៅក្នុងក្លឹបកំសាន្តនោះ បានពឹងឱ្យរូបគេជូននាងទៅផ្ទះនៅម្តុំវាលដេញ។ លុះមកដល់ចំណុចកើតហេតុខាងលើ ក៏ស្រាប់តែមានជនសង្ស័យមួយក្រុមមានគ្នាចំនួន៥នាក់ ជិះម៉ូតូ៣គ្រឿង ម៉ាកទ្រីមសេ១២៥ សេរ៉ុស និងស្ទេប ប្រដាប់ដោយកាំភ្លើងខ្លី៣ដើម បានធ្វើសកម្មភាពភ្ជង់ និងបានឱ្យរូបគេចុះពីលើម៉ូតូ និងបានដោះយកគ្រឿងអលង្ការមួយចំនួនទូរស័ព្ទដៃ និងកាបូបលុយ រួចពួកគេបានជិះគេចខ្លួនបាត់តែម្តង។ សូមរំលឹកថា មួយរយៈពេលកន្លងមកនេះ នៅក្នុងភូមសាស្ត្រខណ្ឌចំការមនមានអំពើបាញ់ប្លន់មិនលួសពេលឡើយ ចំណែកឯសមត្ថកិច្ចហាក់មិនដែលមានវិធានការបង្ក្រាបឬទប់ស្កាត់បាននោះទេ៕
ឌួងវិរះជ័យ
0 Comments