បន្ទាយមានជ័យ ៖ បុរសមិនស្គាល់អត្តសញ្ញាណម្នាក់ ត្រូវបានជនមិនស្គាល់មុខវាយធ្វើទារុណកម្មស្ទើរស្លាប់ស្ទើររស់ ហើយយកខ្សែគោចងដៃដឹកយកមកប្លុងចោលនៅស្ពានទី២ទាំងយប់។ ការប្រទះឃើញជនមិនស្គាល់អត្តសញ្ញាណ ត្រូវគេវាយធ្វើបាបយកមកប្លុងបោលនោះនៅវេលាម៉ោង១១យប់ថ្ងៃទី៣១ ខែមករា ឆ្នាំ២០១៥ នៅចំណុចផ្លូវជាតិលេខ៦ខាងកើតស្ពានទី២ ស្ថិតនៅភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ លោក សុខ ថៃ មេប៉ុស្តិ៍ព្រះពន្លាបានសួនាំទើបដឹងថាជននោះមានឈ្មោះ ចឺម ចន្ថា ភេទប្រុស អាយុ២០ឆ្នាំ រស់នៅភូមិក្សំក្សាណ ឃុំលើកដែក ស្រុកកៀនស្វាយ ខេត្តកណ្តាល។ លោកបាននិយាយបន្តថា នៅម៉ោង១១យប់នោះ មានប្រជាពលរដ្ឋធ្វើដំណើរឆ្លងកាត់ទីនោះបានប្រទះឃើញជននោះនៅខាងកើតស្ពានទី២ដេកស្តូកស្តឹង ពេលនោះប្រជាពលរដ្ឋបានរាយការណ៍ទៅប្រធានភូមិនិងសមត្ថកិច្ចឲ្យចុះមកពិនិត្យ។ លុះព្រឹកម៉ោង៨គេឃើញមានសមត្ថកិច្ចមួយក្រុមមានអាវុធហត្ថ និងនគរបាលមួយក្រុមចុះមកត្រួតពិនិត្យបុរសនោះដៃជាប់ទៅដោយចំណងខ្សែគោចងយ៉ាងជាប់ ចំណែកមុខត្រូវគេវាយឡើងខ្ទេចខោអាវជាប់សុទ្ធតែឈាម។ បើតាមការសន្និដ្ឋានរបស់សមត្ថកិច្ចបានឲ្យដឹងថា បុរសនេះប្រហែលដើរយករបស់របរគេយកមកហូប ព្រោះប្រហែលដាច់បាយជាច្រើនថ្ងៃទើបម្ចាស់ទ្រព្យគេវាយធ្វើបាបស្ទើរស្លាប់រស់ ហើយចងដៃយ៉ាងតឹងដឹកយកមកទម្លាក់ចោលនៅស្ពានទី២យ៉ាងដូច្នេះ។ ដោយសារតែមានការវាយធ្វើបាបខ្លាំងពេកទើបសមត្ថកិច្ចសួនាំទៅ បុរសនោះនិយាយគ្មានដឹងខុសត្រូវហើយ ដោយសារតែបុរសនោះរងរបួសខ្លាំងពេក ទើបប្រធានភូមិដឹកយកទៅមន្ទីរពេទ្យធ្វើការសង្គ្រោះជីវិត។ នៅក្នុងហេតុការណ៍នោះដែរ សមត្ថកិច្ចកំពុងស៊ើបអង្កេតរកជនដៃដល់ដែលបានវាយធ្វើបាបបុរសនោះ សមត្ថកិច្ចបាននិយាយថា បើទោះបីបុរសនោះយកទ្រព្យបន្តិចបន្តួចយកមកហូបក៏មិនត្រូវវាយធ្វើបាបគ្នាដល់ថ្នាក់ស្ទើរស្លាប់រស់ ហើយចងដៃគ្នាយកទៅប្លុងចោលយ៉ាងនេះដែរ៕
គង្គា
0 Comments