កំពង់ឆ្នាំង ៖ សមត្ថកិច្ចនៅក្នុងស្នងការនគរបាលខេត្តកំពង់ឆ្នាំងបានទម្លាយលិខិតកត់ឈ្មោះនិងលេខទូរស័ព្ទមួយរបស់អ្នកដឹកឈើប្រណិតដែលរកឃើញនៅក្នុងរថយន្តដឹកឈើម្រះព្រៅជ្រកក្រោមគ្រឿងសង្ហារិម ដែលត្រូវសមត្ថកិច្ចចាប់បានកាលពីព្រឹកថ្ងៃទី២៦ ខែមករា ឆ្នាំ២០១៥ វេលាម៉ោង៩និង១០នាទី នៅចំណុចស្ពានលោកតា ជួន ស័ក្ត៥ ស្ថិតនៅក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។ លិខិតនេះគេទើបតែទម្លាយឲ្យដឹងនៅថ្ងៃទី៣០ ខែមករា ដែលនៅក្នុងលិខិតនោះមានកត់ត្រាឈ្មោះនិងលេខទូរស័ព្ទសមត្ថកិច្ចជិត៥០នាក់ ដែលអ្នកដឹកឈើទុកទូរស័ព្ទបង់លុយពួកសមត្ថកិច្ចទាំងនោះជាថ្នូរនិងការបិតភ្នែកបិតមិនចាប់បទល្មើសព្រៃឈើ នៅតាមផ្លូវជាត់លេខ៥ ពីស្រុកវាលវែងដល់ខេត្តកណ្តាល។
សមត្ថកិច្ចបានឲ្យដឹងថា ពេលស្ទាក់ចាប់បានរថយន្តនេះ ម្ចាស់ឈើនិងអ្នកបើកបររថយន្តបានចុះរត់ ទាំងប្ដីនិងប្រពន្ធពីលើរថយន្តគេចខ្លួនបាត់ បន្សល់ទុករថយន្តសាំយ៉ុង ពណ៌ទឹកប្រាក់ ពាក់ស្លាក់លេខភ្នំពេញ2D-2820 បានដឹកគ្រឿងសង្ហារិម ដោយមានបង្កប់ឈើម្រះព្រៅបានធ្វើដំណើរពីតំបន់វាលវែងឆ្លងកាតខេត្តកំពង់ឆ្នាំងឆ្ពោះទៅក្រុងភ្នំពេញ។ នៅក្នុងរថយន្តនោះមានគ្រឿងសង្ហារិម,គ្រែ១កំប្លេ,តុបាយធ្វើពីគល់ដើមធ្នង់ចំនួន២,តុបាយគល់ដើមម្រះព្រៅចំនួន១សន្លឹក, និងប្រភេទឈើម្រះព្រៅចំនួន២សន្លឹក ដែលមានបណ្តោយ១,៦០ម៉ែត្រ ទទឹង១ម៉ែត្រ កំរាស់១តឹក២ហ៊ុន។
គួរបញ្ជាក់ថា លិខិតនេះត្រូវបានមន្ត្រីនគរបាលម្នាក់លួចបញ្ចេញឲ្យដឹង ដែលនៅក្នុងបញ្ជីឈ្មោះកត់លេខទូរស័ព្ទនោះ មានតួនាទីរបស់មន្ត្រីជំនាញរដ្ឋបាលព្រៃឈើ និងសមត្ថកិច្ចមួយចំនួនដែលឈរជើងតាមដងផ្លូវជាតិលេខ៥ ចាប់តាំងពីស្រុកវាលវែង រហូតដល់ខេត្តកណ្តាលមានចំនួនជិត៥០នាក់ ដើម្បីងាយស្រួលទាក់ទងបង់លុយឲ្យនៅពេលពួកគេដឹកបទល្មើសឆ្លងកាត់កន្លែងនិមួយៗ។ ប៉ុន្តែនៅក្បាលលើនៃលិខិតនេះ ត្រូវបានគេបិតឈ្មោះនិងលេខទូរស័ព្ទអស់ចំនួន៦នាក់ ទំនងឈ្មោះទាំង៦នាក់នោះជាអ្នកធំ ឬអ្នកដែលគេស្គាល់ ទើបអ្នកបង្ហាញបញ្ជីឈ្មោះនេះជួយបិតឈ្មោះឲ្យ ប៉ុន្តែការលួចបិតឈ្មោះជនពុករលួយបែបនេះវាក៏ជាការឃុបឃិតជាមួយជនល្មើសដែរ តាមច្បាប់អ្នកប្រព្រឹត្ត និងអ្នកឃុបឃិត គឺមានទោសដូចគ្នាមិនគួរលេងសើចបែបនេះឡើយ។
ប្រជាពលរដ្ឋបាននិយាយថា បើគ្មានការឃុបឃិតបើកដៃពីមន្ត្រីពុករលួយបំផ្លាញជាតិទាំងអស់នោះទេ បទល្មើសព្រៃឈើក៏មិនអាចដឹកឆ្លងកាត់ទៅលក់បានដែរ ហើយបើពួកជនល្មើសដឹកលក់មិនបានអ្នកកាប់បំផ្លាញព្រៃឈើក៏គ្មានដែរ។ ចំពោះអំពើពុករលួយដែលមានការសូកប៉ាន់ជាលក្ខណៈប្រព័ន្ធបែបនេះ បានបង្កឲ្យព្រៃឈើរបស់ជាតិហិនហោចខ្ទេចខ្ទី ដែលជារឿងមិនត្រូវអត់អោនឲ្យឡើយ។
លិខិតកត់លេខនិងឈ្មោះទូរស័ព្ទរបស់សមត្ថកិច្ចពុករលួយខាងលើនេះគឺជាភស្តុតាងមួយយ៉ាងសំខាន់ណាស់របស់ស្ថាប័នអយ្យការតុលាការ និងអង្គភាពប្រឆាំងអំពើពុករលួយ ប្រជាពលរដ្ឋរង់ចាំមើលថាមានភស្តុតាងប៉ុណ្ណឹងហើយ តើតុលាការខេត្ត និងលោកប្រធានអង្គភាពប្រឆាំងអំពើពុករលួយអាចចាប់ខ្លួនមន្ត្រីពុករលួយបំផ្លាញជាតិទាំងអស់ខាងលើនេះបានដែរឬទេ ការប៉ាន់ស្មានរបស់ប្រជាពលរដ្ឋថា មានសង្ឃឹមតិចណាស់ សម័យទន្សោងគោព្រៃដូចសព្វថ្ងៃនេះ៕
ឈៀង ថារិទ្ធ
0 Comments