កំពង់ឆ្នាំង ៖ អំណោយមនុស្សធម៌ដែលដឹកនាំលោក ថោង ចំរើន ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តកំពង់ឆ្នាំង នៅព្រឹកថ្ងៃទី២៩ ខែមករា ឆ្នាំ២០១៥ បាននាំយកទៅចែកជូនគ្រួសារពិការក្រីក្រ និងចាស់ជរាគ្មានទីពឹងចំនួន៥គ្រួសារនៅស្រុកសាមគ្គីមានជ័យ ពិធីនេះមានការចូលរួមពីអាជ្ញាធរភូមិ/ឃុំ លោកអភិបាលរងស្រុក និងសភាពសហព័ន្ធយុវជនស្រុកសាមគ្គីមានជ័យផងដែរ។ លោក ថោង ចំរើន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបាននិយាយឲ្យដឹងថា ដោយមានការអំពាវនាវពីរូបលោកចំពោះគ្រួសារជនពិការក្រីក្រខាងលើនេះ លាង សេង ប្រធានមន្ទីរអភិវឌ្ឍន៏ជនបទខេត្តកំពង់ឆ្នាំងបានឧបត្ថម្ភទឹកប្រាក់ផ្ទាល់ខ្លួនចំនួន១លានរៀលឲ្យលោកៗបានយកទៅចាត់ចែងទិញគ្រឿងឧបភោគបរិភោគជូនគ្រួសារពិការទាំង៥គ្រួសារ ដែលរស់នៅក្នុងភូមិចំនួន៣ ក្នុងឃុំសេដ្ឋី ស្រុកសាមគ្គីមានជ័យ។ ក្នុងនោះ៣គ្រួសារនៅក្នុងភូមិថ្លុកឬស្សី មាន១-ឈ្មោះ ញ៉េច ថុង ភេទប្រុស អាយុ៤២ឆ្នាំ ពិការភ្នែកទាំង២ , ២-ឈ្មោះ អ៊ុច ញឹង ភេទស្រី អាយុ៧៤ឆ្នាំ ពិការជើងស្តាំ , ៣-ឈ្មោះ ញ៉េម ម៉ុន ភេទស្រី អាយុ៧៤ឆ្នាំ ពិការជើងស្តាំ , ៤-ឈ្មោះ ញឹម ប៉ាត ភេទប្រុស អាយុ៥៤ឆ្នាំ ពិការភ្នែកទាំង២រស់នៅភូមិពារាជ្យ និង៥-ឈ្មោះ មាស ធន ភេទស្រី អាយុ៥៨ឆ្នាំ ពិការភ្នែកទាំង២ រស់នៅភូមិចំការស្វាយ។ ក្នុងមួយគ្រួសារៗទទួលបានអង្ករ២០គីឡូក្រាម មី១កេះ ទឹកត្រី១យួរ ទឹកស៊ីអ៊ីវ១យួរ ត្រីខ១២កំប៉ុង ប្រេងឆា១ដប (ចំណុះ១លីត្រ) ប៊ីចេង១កញ្ចប់ និងថវិកា១២ម៉ឺនរៀល។
លោក សោម ម៉េង អភិបាលរងស្រុកសាមគ្គីមានជ័យបានថ្លែងអំណរគុណថា ជំនួសមុខឲ្យក្រុមគ្រួសារពិការក្រីក្រខាងលើ លោកសូមថ្លែងអំណរគុណចំពោះលោកប្រធានមន្ទីរសង្គមកិច្ចខេត្ត ដែលបាននាំអំណោយទាំងនេះមកចែកជូនគ្រួសារខាងលើ ពិសេសសូមថ្លែងអំណរគុណដល់លោក លាង សេង ប្រធានមន្ទីរអភិវឌ្ឍន៍ជនបទខេត្ត ដែលបានចំណាយថវិកាផ្ទាល់ខ្លួនផ្តល់អំណោយមនុស្សធម៌ដើម្បីរួមចំណែកជាមួយប្រមុខរាជរដ្ឋាភិបាល និងកាកបាទក្រហមកម្ពុជាជួយដល់គ្រួសារពិការក្រីក្រ និងសូមជូនពរអោយអស់លោកជួបតែនឹងសេចក្តីសុខ មានអាយុវណ្ណៈ សុខៈ និងពលៈ ជារៀងរហូតតទៅ៕ ( ឈៀង ថារិទ្ធ )
0 Comments