ភ្នំពេញ ៖ ថ្លែងក្នុងកិច្ចប្រជុំស្ដីពីលទ្ធផលការងារត្រួតពិនិត្យគ្រឿងញៀនឆ្នាំ២០១៤ និងទិសដៅការងារឆ្នាំ២០១៥ កាលពីរសៀលថ្ងៃទី២៩ ខែមករា ឆ្នាំ២០១៥នៅក្រសួងមហាផ្ទៃលោកឧត្តមសេនីយ៍ឯក មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ថាក្នុងឆ្នាំ២០១៤សមត្ថកិច្ចបង្ក្រាបបទល្មើសគ្រឿងញៀនបានចំនួនសរុប១.៣៣៧ករណី ឃាត់ខ្លួនជនសង្ស័យបានជាង៣.០០០នាក់ ដែលចំនួននេះបើប្រៀបធៀបទៅនឹងឆ្នាំ២០១៣ គឺមានការកើនឡើងប្រមាណជិត៦០ភាគរយ។
លោកបន្តថា គិតរហូតមកដល់ពេលនេះសមត្ថកិច្ចបានបង្ក្រាប និងរឹបអូសនូវសារធាតុគីមីចម្រុះបានចំនួនជិត៣០តោន ដែលនាំចូលដោយខុសច្បាប់ តាមច្រកនៅក្នុងខេត្តជាប់ព្រំដែន និងបានដកហូតគ្រឿងញៀនប្រភេទកូកាអ៊ីន ហេរ៉ូអ៊ីន ព្រមទាំងមានសារធាតុគីមីផ្សំជាច្រើនទៀតដើម្បីនាំយកមកផលិត និងកែច្នៃឱ្យទៅជាផលិតផលគ្រឿងញៀនសំយោគ។ ការបង្ក្រាបបទល្មើសគ្រឿងញៀន និងការទទួលបានលទ្ធផលយ៉ាងធំធេងនេះ គឺផ្ដើមចេញពីកិច្ចសហការល្អជាមួយក្រសួង-ស្ថាប័ន និងសមត្ថកិច្ចគ្រប់លំដាប់ថ្នាក់ក្នុងការចូលរួមពង្រឹងការត្រួតពិនិត្យ និងការអនុវត្ដច្បាប់ប្រកបដោយប្រសិទ្ធភាព សំដៅកាត់បន្ថយការនាំចូល ការផលិត ការផ្គត់ផ្គង់ និងការចែកចាយ គ្រឿងញៀននៅក្នុងប្រទេសកម្ពុជា។ លោកបានឱ្យដឹងទៀតថា ចំពោះសំណុំរឿងបទល្មើសគ្រឿងញៀន ដែលស្ថិតក្នុងដែនសមត្ថកិច្ចរបស់សាលាដំបូងរាជធានី-ខេត្តមានចំនួនសរុប៥៦៤សំណុំរឿង ក្នុង នោះសំណុំរឿងជម្រះក្ដីរួចមាន៣៣០ សំណុំរឿងកំពុងសាកសួរមាន២០៤សំណុំរឿង និងមិនទាន់ចាត់ការមាន១៦សំណុំរឿង។
លោកបន្តទៀតថា ដើម្បីដោះស្រាយបញ្ហាប្រឈមនិងទប់ស្កាត់បទល្មើសគ្រឿងញៀនសម្រាប់ឆ្នាំ២០១៥នេះ អាជ្ញាធរជាតិប្រយុទ្ធប្រឆាំងគ្រឿងញៀនបានដាក់ទិសដៅ និងរៀបចំផែនការ ក្នុងការជំរុញផ្សព្វផ្សាយអប់រំតាមគ្រប់រូបភាព ដោយសហការជាមួយក្រសួង-ស្ថាប័ន និងវិស័យឯកជន សំដៅកាត់បន្ថយតម្រូវការ និងចេះបដិសេធគ្រឿងញៀនគ្រប់ពេលវេលា និងគ្រប់ទីកន្លែង។
ជាមួយគ្នានេះ អាជ្ញាធរគ្រឿងញៀនក៏ចាត់វិធានការគ្រប់បែបយ៉ាងតាមផ្លូវច្បាប់ និងរដ្ឋបាល ដើម្បីប្រឆាំងការផលិត ការដាំដុះ ការចម្រាញ់ ការចរាចរ ជួញដូរ ការស្ដុកទុក និងការការប្រើប្រាស់គ្រឿងញៀន ចាប់ពីរូបភាពតូចតាចរហូតដល់រូបភាពធំៗ ដើម្បីពង្រឹងគុណភាពនៃការអនុវត្ដច្បាប់ ឱ្យតឹងរ៉ឹងបំផុត៕
ឌួងវិរះជ័យ
0 Comments