កំពត ៖ រមណីយដ្ឋានកំសាន្តទឹកមួយនេះធ្លាប់មានការគាំទ្រច្រើន ហើយមានកំណើតយូរឆ្នាំជាងគេក្នុងទឹកដីខេត្តកំពត។ រមណីយដ្ឋានទឹកឈូ គឺជាជ្រោះមួយដែលកើតឡើងពីការប្រសព្វគ្នានៃបណ្ដាជ្រោះជាច្រើនទៀតដែលមកពីប្រជុំភ្នំដំរី ហើយការប្រសព្វនេះ បានមកបញ្ចប់តំបន់ទឹកឈូរួចហូរជាមួយព្រែកកំពង់បាយ (ព្រែកកំពត) ហូរធ្លាក់ចុះទៅសមុទ្រ។ ទឹកឈូមានចម្ងាយ៨គីឡូម៉ែត្រពីទីក្រុងកំពតក្នុងភូមិស្នំប្រាំពីរ ឃុំម៉ាក់ប្រាង្គ ស្រុកកំពត ខេត្តកំពត។
ទឹកឈូធម្មជាតិនេះ រំលេចទៅដោយខ្សែទឹកហូរមានភាពក្រវៀចក្រវៀនទៅតាមជម្រាលភ្នំទាំងឡាយបង្កើននូវសោភ័ណភាពស្រស់ត្រកាលជាធម្មជាតិពិតៗដែលជាខ្សែទឹកហូរកាត់ព្រៃព្រឹក្សាខួបប្រាំង និងខួបវស្សា។ នៅតាមដងផ្លូវទៅកាន់រមណីយដ្ឋានទឹកឈូពោរពេញទៅដោយចំការដំណាំផ្លែឈើហូបផ្លែរាប់ពាន់ហិកតា ហើយដំណាំបង្កើនចំណូលគឺជាដំណាំធូរេននេះតែម្តង។ ដំណាំធូរេនបានផ្តល់នូវកិត្តិយសមុខមាត់ដល់ខេត្តកំពតថា ជាខេត្តមានផ្លែធូរេនមានរសជាតិផ្អែមឆ្ងាញ់ពិសា ក្រៅពីនោះក៏មានដំណាំម្នាស់ សាវម៉ាវ ក្រូច ទៀប ម៉ាក់ប្រាំងជាច្រើនទៀត។
ភូមិសាស្ត្រនៃរមណីយដ្ឋានទឹកឈូបានផ្តល់ឱកាសនូវការសាងសង់វារីអគ្គិសនី និងមានអំណោយផលដល់រមណីយដ្ឋានធម្មជាតិ ដោយទឹកហូរថ្លាត្រជាក់ជាទីងូតទឹកកម្សាន្តនៃភ្ញៀវទេសចរណ៍ទាំងក្នុងស្រុក និងបរទេស ហើយក៏ជាប្រភពទឹកជាតម្រូវការប្រជាពលរដ្ឋក្នុងស្រុកកំពតផងដែរ៕ កញ្ញា វ៉ាត.
0 Comments