បន្ទាយមានជ័យ ៖ មន្ត្រីរាជការ រដ្ឋបាលខេត្តបន្ទាយមានជ័យ និងពលរដ្ឋបានចូលរួមឆ្លងឆ្នាំសកលឆ្នាំ២០១៥នេះ សូមឲ្យបានផ្តល់នូវការរួបរួមសាមគ្គីឯកភាពគ្នាបានសេចក្តីសុខ សប្បាយរីករាយរីកចម្រើន រុងរឿងថែមទៀតនៅក្នុងខេត្ត និងប្រទេសក្នុងឆ្នាំថ្មីសកល២០១៥នេះ។ ជាពិសេសគឺសូមឲ្យពលរដ្ឋទាំងអស់មានជីវភាពធូរធារក្នុងមូលដ្ឋានខេត្ត និងក្នុងប្រទេសសូមឲ្យអភិវឌ្ឍន៍ឈានឡើងទៀត។
លោក គោស៊ុំ សារឿត អភិបាលខេត្តបន្ទាយមានជ័យអមដោយអភិបាលរងនិងប្រធានមន្ទីរ អង្គភាព មេបញ្ជាការនៃបញ្ជាការដ្ឋាន ស្នងការនៃស្នងការដ្ឋានរបស់លោកបានចេញមកថ្លែងលើវេទិកាក្នុងបរិវេណសាលាខេត្តនារាត្រីថ្ងៃទី៣១ ខែធ្នូ ឆ្នាំ២០១៤ ដោយកត់សម្គាល់លទ្ធផលការងារលើគ្រប់វិស័យឆ្នាំ២០១៤កន្លង ក្នុងខេត្តតាមគោលនយោបាយនិងយុទ្ធសាស្ត្រចតុកោណដំណាក់កាលទី៣នៃរាជរដ្ឋាភិបាល និងតាមការទទួលខុសត្រូវតាមមុខនាទីភារកិច្ច ដែលបានវិជ្ជមាន ល្អប្រសើរយ៉ាងច្រើន។
លោកថ្លែងបន្តថា ផ្លែផ្កាទាំងនេះគឺកើតឡើងពីការខិតខំនិងចូលរួមរបស់អ្នកទាំងឡាយ។ ប៉ុន្តែយើងនៅសេសសល់បញ្ហាប្រឈមមួយចំនួនដែលចាំបាច់ត្រូវបន្តដោះស្រាយនៅឆ្នាំថ្មី។ ហើយក៏ថែមការងារថ្មីចំពោះមុខនិងនៅអនាគតជាច្រើនទៀត។
លោកប្ដេជ្ញាអនុវត្តការងារក្នុងនាមរដ្ឋបាលខេត្តដែលមានគណនេយ្យភាពចំពោះក្រុមប្រឹក្សាខេត្ត និងទទួលខុសត្រូវចំពោះច្បាប់ថ្នាក់លើនិងពលរដ្ឋ។ នៅមុនពិធីអបអរបញ្ចប់នៅរំលងអាធ្រាត្រម៉ោង១ចូលថ្ងៃទី១ ខែមករា ឆ្នាំ២០១៥ គេឃើញមានការជូនពរ ជូនបាច់ផ្កាគ្នារបស់លោក អ៊ុងអឿន ប្រធានក្រុមប្រឹក្សាខេត្ត លោកអភិបាលខេត្តនិងសមាជិកពិធីបានពិសារអាហារ ច្រៀងរាំកំសាន្ត។ ក្នុងពិធីនោះក៏មានការចូលរួមពីប្រតិភូក្រុមគ្រូពេទ្យចម្រុះជាតិសាសន៍ "បេសកកម្មអង្គរសហរដ្ឋអាមេរិក:ROJECT ANGKOR,USA"ចំនួន៩០នាក់ ដែលត្រូវមកពិគ្រោះពិនិត្យ និងព្យាបាលជំងឺជូនប្រជាពលរដ្ឋនៅក្នុងខេត្តបន្ទាយមានជ័យដោយឥតគិតលុយ ចាប់ពីថ្ងៃទី២ ខែមករា ឆ្នាំ២០១៥ ដល់ថ្ងៃទី៦ ខែមករា ឆ្នាំ២០១៥ ខាងមុខនេះ និងចូលរួមឆ្លងឆ្នាំសកលក្នុងខេត្តបន្ទាយមានជ័យនេះទៀតផងដែរ៕គង្គា
0 Comments