ព្រះសីហនុ ៖ ដោយសារកំណើនភ្ញៀវទេសចរណ៍ដ៏ច្រើនលើសលុបនៅលើទឹកដីខេត្តព្រះសីហនុនាឧកាសឆ្លងឆ្នាំសកល២០១៤ ឈានចូលឆ្នាំ២០១៥ ដោយគិតចាប់ពីថ្ងៃទី២៩ ទៅដល់ថ្ងៃទី៣១ ខែធ្នូឆ្នាំ២០១៤នេះ បើតាមការសង្កេតមើលឃើញថា នៅតាមដងផ្លូវសាធារណៈជាច្រើនត្រូវបានកកស្ទះចរាចរណ៍ជាអន្លើៗ រីឯនៅតាមទីប្រជុំជនផ្សារឬតាមតំបន់កម្សាន្តផ្សេងៗកន្លែងណាក៏ដូចកន្លែងណាដែរ សុទ្ធសឹងតែមានភ្ញៀវទេសចរណ៍យ៉ាងច្រើនកុះករ ជាពិសេសគឺតំបន់ឆ្នេរអូរឈើទាលតែម្តង។
ទីតាំងតំបន់ឆ្នេរអូរឈើទាលដែលជាកន្លែងរៀបចំពិធីបុណ្យឆ្លងឆ្នាំ២០១៤ ចូលឆ្នាំ២០១៥រយៈពេល៣ថ្ងៃ គឺចាប់ពីថ្ងៃទី២៩ ខែធ្នូ ឆ្នាំ២០១៤ រហូតដល់ថ្ងៃទី៣១ ខែធ្នូ ក៏មានការរៀបចំពិធីផ្សេងៗដូចបណ្ដាឆ្នាំមុនៗផងដែរដូចជា ការរៀបចំការប្រគួតកីឡាបាល់ទាត់ បាល់ទះ.ការសំដែងសិល្បៈក្រុមជនពិការ.ការប្រគំតន្ត្រីក្រុមដារាល្បីៗច្រៀងរាំកម្សាន្ត រួមនិងការតាំងពិព័រណ៍ស្តង់លក់ទំនិញគ្រប់សារពើចំនួនជិត១០០ស្តង់ទៀតផង។ ដើម្បីចូលរួមចំណែកលើកស្ទួយវិស័យទេសចរណ៍កម្សាន្តសប្បាយរីករាយ។ ក្រៅពីវត្តមានភ្ញៀវទេសចរណ៍ដ៏ច្រើនកុះករក៏គេសង្កេតឃើញថា តាមបណ្តោយផ្លូវនិមួយៗមានកងកម្លាំងប្រដាប់អាវុធប៉ូលិស និងប៉េអិមជាច្រើនដាក់តាមចំណុចគោលដៅឈរជើងការពារសន្តិសុខសុវត្ថិភាពដល់ភ្ញៀវទេសចរណ៍ផងដែរ។
លោក នូ សុផល ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា បើយើងចាប់គិតពីថ្ងៃទី២៩ ខែធ្នូ ឆ្នាំ២០១៤ រហូតមកដល់ថ្ងៃទី៣១ ខែធ្នូ ឆ្នាំ២០១៤ ឆ្លងចូលឆ្នាំ២០១៥ ភ្ញៀវទេសចរណ៍ដែលបានចូលមកលេងកម្សាន្តមានចំនួនជា១១ម៉ឺននាក់ ហើយចំនួននេះបើធ្វើការប្រៀបធៀបទៅនិងឆ្នាំកន្លងទៅគឺប្រហាក់ប្រហែលគ្នា។ ហើយសម្រាប់នៅតាមសណ្ឋាគារក៏ដូចជាផ្ទះសំណាក់ក៏មានភ្ញៀវស្នាក់នៅពេញៗបន្ទប់ផងដែរ ចាប់ពីថ្ងៃទី២៩រហូតមក។
គួររំលឹកផងដែរថា ក្រុងព្រះសីហនុខេត្តព្រះសីហនុបច្ចុប្បន្នមានសណ្ឋាគារតូចធំចំនួន៥៦កន្លែង និងផ្ទះសំណាក់មានចំនួន២២១កន្លែង សរុបរួមទាំង(សណ្ឋាគារនិងផ្ទះសំណាក់)មានបន្ទប់សំរាប់បម្រើភ្ញៀវស្នាក់នៅប្រមាណ៥ពាន់បន្ទប់ និងភោជនីយដ្ឋានមានចំនួន៨១កន្លែងផងដែរ៕កោះពស់)
0 Comments