បន្ទាយមានជ័យ ៖ ប្រជាពលរដ្ឋទាំងក្មេងចាស់ ទាំងប្រុសស្រីនៅខេត្តបន្ទាយមានជ័យក្នុងមួយថ្ងៃជាង១០០នាក់ បាននាំគ្នាសម្រុកមកព្យាបាលនិងធ្វើការដកធ្មេញនៅមន្ទីរពេទ្យបង្អែក ក្រុងសិរីសោភ័ណ ការដកធ្មេញនេះដោយក្រុមគ្រូពេទ្យបេសកកម្មអង្គរសហរដ្ឋអាមេរិកការដកធ្មេញនេះមានរយៈពេល៦ថ្ងៃ ចាប់ពីថ្ងៃទី២រហូតដល់ថ្ងៃទី៦ ខែមករា ឆ្នាំ២០១៥ ដោយមិនគិតថ្លៃ។
លោកទន្តបណ្ឌិត មុំវិសាល នៅប្រចាំការនៅមន្ទីរពេទ្យបង្អែកក្រុងបាត់ដំបងបាននិយាយថាគាត់បានជាប់ជាទន្តបណ្ឌិតពេទ្យធ្មេញនេះមានរយៈពេល៦ឆ្នាំមកហើយ ពេលដែលក្រុមគ្រូពេទ្យបេសកកម្មអង្គសហរដ្ឋអាមេរិកចំនួន១៧៥នាក់ ដែលដឹកនាំដោយ លោក ដានី វង្ស ប្រធានគណៈប្រតិភូសុខាភិបាលបេសកកម្មអង្គរសហរដ្ឋអាមេរិកចុះមកសហការណ៍គ្នាជាមួយក្រុមគ្រូពេទ្យបង្អែកសិរីសោភ័ណ ក្រោមការសម្របសម្រួលពីក្រុមការងារខេត្ត និងមន្ទីរសុខាភិបាលខេត្តបានចុះមកពិនិត្យនិងព្យាបាលជម្ងឺទូទៅ មនុស្សចាស់ កុមារ ដាក់ដៃសិប្បនិម្មិតជូនជនពិការគ្មានដៃ ជាពិសេសដកធ្មេញជូនប្រជាពលរដ្ឋដោយមិនគិតថ្លៃនោះលោក មុំ វិសាល ក៏បានស្ម័គ្រចិត្តចូលរួមក្នុងក្រុមបេសកកម្មអង្គសហរដ្ឋអាមេរិកនេះផងដែរ ដើម្បីធ្វើការដកធ្មេញជូនប្រជាពលរដ្ឋនៅខេត្តបន្ទាយមានជ័យផងដែរ។ លោកបានបន្តថា ក្នុងការដកធ្មេញជូនប្រជាពលរដ្ឋនោះក្នុងមួយថ្ងៃអាចដកជូនប្រជាពលរដ្ឋចំនួនជាង១០០នាក់ ហើយក្នុងជាង១០០នាក់នេះ បើគិតជាទឹកប្រាក់ព្យាបាលសេវាឯកជនអស់ជាទឹកប្រាក់ជាង៣.០០០ដុល្លារទាំង ថ្លៃថ្នាំនិងថ្លៃដក។
លោកបានបន្តថា ក្រោយពេលដកធ្មេញជូនប្រជាពលរដ្ឋហើយនោះ លោកបានធ្វើការណែនាំឲ្យដុះធ្មេញក្នុងមួយថ្ងៃដុះធ្មេញយ៉ាងតិចបំផុតឲ្យបាន២ដងដើម្បីសំអាតសារជាតិសំណល់ដែលកាន់ជាប់ និងធ្មេញនិងដើម្បីការពារកុំឲ្យពុកធ្មេញ និងរបៀបដុះធ្មេញត្រូវដុះធ្មេញថ្នមៗដុះខាងក្រៅធ្មេញក្នុងនិងកន្លែងធ្មេញដែលត្រូវទំពាមួយៗប្រើចុងច្រាសដុះធ្មេញដើម្បីដុះផ្ទៃធ្មេញមួយៗនៃធ្មេញមុខ។ លោកបានបញ្ជាក់ទៀតថា នៅពេលថ្ងៃរសៀលប្រជាពលរដ្ឋខ្លះទីទាល់ក្រគ្មានថវិកាទិញបាយហូបក្រុមគ្រូពេទ្យបេសកកម្មអង្គរសហរដ្ឋអាមេរិកបានទិញនំបុ័ងសាច់ឲ្យហូបទៀតផង។ ប្រជាពលរដ្ឋរាប់ពាន់នាក់ដែលបានមកព្យាបាលជម្ងឺគ្រប់មុខដោយមើលឃើញទង្វើរបស់ក្រុមគ្រូពេទ្យបេសកកម្មអង្គសហរដ្ឋអាមេរិកព្យាបាលជំងឺរបស់ពួកគាត់ដោយយកចិត្តទុកដាក់ពុំខ្លាចពីការនឿយហត់នោះប្រជាពលរដ្ឋបានថ្លែងអំណរគុណយ៉ាងជ្រាលជ្រៅ និងវាយតំលៃខ្ពស់ចំពោះបេសកកម្មមនុស្សធម៌របស់អស់លោកមកកាន់ខេត្តបន្ទាយមានជ័យដើម្បីមកព្យាបាលជំងឺជូនប្រជាពលរដ្ឋដោយកាយវិការមនុស្សធម៌មិនយកកម្រៃ សូមមកឲ្យការព្យាបាលនេះប្រព្រឹត្តទៅដោយសុវត្ថិភាពសុខសប្បាយតាំងពីការព្យាបាលរហូតវិលត្រឡប់ទៅមាតុប្រទេសវិញ៕
គង្គា
0 Comments