ក្រោយពីរដ្ឋាភិបាលអាណត្តិទី៥ បានប្រសូតឡើងមក កម្ពុជាបានចាប់ផ្តើមនូវកំណែទម្រង់ស៊ីជម្រៅរបស់ខ្លួនមួយចំនួនធំ គួរឲ្យកត់សម្គាល់។ ជាការកែទម្រង់ ដែលធ្វើឡើងតាមសេចក្តីត្រូវការរបស់ប្រជាពលរដ្ឋកម្ពុជា គ្រប់និន្នាការនយោបាយ។ ការកែទម្រង់នេះ ធ្វើឲ្យមនុស្សមួយចំនួន ដែលធ្លាប់តែយល់ឃើញមិនល្អមកលើរដ្ឋាភិបាល បានភ្លឺភ្នែកកាន់តែច្បាស់ឡើងវិញ។ ជាក់ស្តែងវិស័យទេសចរណ៍ វិស័យឧស្សាហកម្មកាត់ដេរ ពាណិជ្ជកម្ម និងវិស័យអប់រំជាដើម បានចាប់ផ្តើមនូវកំណែទម្រង់របស់ខ្លួន ឲ្យស្របទៅតាមពេលវេលា និងតម្រូវការរបស់ប្រជាពលរដ្ឋក្នុងសម័យថ្មីនេះ។ ទាំងអស់នេះគឺសុទ្ធសឹងជារឿងល្អ របស់កម្ពុជាក្នុងឆ្នាំ២០១៤នេះ តែយ៉ាងណាមិញ រឿងល្អទាំងអស់នេះ ជារឿងដែលកើតឡើង ដោយចៃដន្យឬយ៉ាងណា?
ថ្មីៗនេះកាសែតក្នុងស្រុកបានចុះផ្សាយនូវស្នាដៃជាច្រើនរបស់រដ្ឋាភិបាលកម្ពុជា ជុំវិញការកែទម្រង់ដែលធ្វើឲ្យកម្ពុជាត្រូវបានគេទទួលស្គាល់។ ទាំងអស់នេះ មិនមែនជារឿង ដែលកើតឡើង ដោយចៃដន្យនោះទេ ប៉ុន្តែគ្រប់យ៉ាងគឺជាការកែទម្រង់មួយរបស់រដ្ឋាភិបាល ដែលចង់ឲ្យប្រជាពលរដ្ឋមានសេចក្តីសុខពោលគឺ សុខទាំងផ្លូវកាយ និងសុខទាំងផ្លូវចិត្ត។ យើងអាចនិយាយថា វាមិនមែនជារឿងចៃដន្យនៅត្រង់ថា អ្វីទាំងអស់នោះកើតឡើង ក្រោយពេល ដែលរដ្ឋាភិបាលអាណត្តិថ្មីប្រកាសថា នឹងធ្វើការកែទម្រង់លើគ្រប់វិស័យ ដើម្បីឲ្យកម្ពុជាក្លាយទៅជាប្រទេសអភិវឌ្ឍមួយក្នុងពេលអនាគតខាងមុខនេះ។
ចំពោះវិស័យអប់រំរបស់កម្ពុជា ដែលធ្លាប់បានសង្គមស៊ីវិល និងបក្សប្រឆាំងចាត់ទុកថាមានអំពើពុករលួយ ហើយគ្មានគុណភាព ពេលនេះគឺខុសពីមុនទាំងស្រុង ពោលគឺវិស័យអប់រំអាណត្តិថ្មីនេះ បានធ្វើឲ្យគេមើលឃើញច្បាស់នឹងភ្នែកថា ពិតជាការកែទម្រង់ជាប្រវត្តិសាស្ត្រលើវិស័យនេះមែន។ មិនត្រឹមតែប៉ុណ្ណោះ ការពង្រឹងគុណភាពអប់រំអាចឲ្យកម្ពុជាក្លាយជាប្រទេសដ៏ខ្លាំងមួយនៅលើឆាកតំបន់។ ការសម្រិតសម្រាំងគុណភាពធនធានមនុស្សគឺជាចំណុចចាប់ផ្តើមមួយដ៏ល្អ។ នៅពេលនេះប្រព័ន្ធអប់រំមួយ ដែលធ្លាប់តែមានការរិះគន់ បានក្លាយជាប្រព័ន្ធអប់រំមួយ ដែលទទួលបានការកោតសរសើរពីគ្រប់មជ្ឈដ្ឋាន។
ថ្មីៗនេះផងដែរ រដ្ឋាភិបាលកម្ពុជា ក៏បានដំឡើងប្រាក់ខែជូនកម្មករនិយោជិត ផ្នែកវាយនភ័ណ្ឌកាត់ដេរ និងផលិតស្បែកជើងចំនួន១២៨ដុល្លារក្នុងមួយខែ។ ជារឿងមិនធម្មតានោះទេ ដែលរដ្ឋាភិបាលកម្ពុជាបានសម្រេចដំឡើងប្រាក់ខែកម្មកររហូតដល់១០០% ក្នុងរយៈពេលមួយឆ្នាំ។ សូមបញ្ជាក់ថា ប្រាក់ខែកម្មករបានកើនឡើងតាំងពី៦០ដុល្លារ រហូតដល់ ១២៨ ដុល្លារអាមេរិក ក្រោយពីការបោះឆ្នោតឆ្នាំ២០១៣ បានបញ្ចប់។ តើនេះមិនមែនជាការចង់បានរបស់រដ្ឋាភិបាល ដើម្បីឲ្យប្រជាពលរដ្ឋមានជីវភាពធូរធារនោះទេ ឬយ៉ាងណា?
ស្របពេលដែល ប្រាក់ខែកម្មករបានដំឡើង ចំណែកឯតម្លៃប្រេងសាំងក៏បានធ្លាក់ចុះដែរ។ ទាំងអស់នេះ បានធ្វើឲ្យប្រជាពលរដ្ឋកម្ពុជាភាគច្រើនមានការសប្បាយចិត្តនឹងគោលនយោបាយរបស់រដ្ឋាភិបាល។ វាក៏ជាសញ្ញាប្រាប់ទៅមនុស្សគ្រប់និន្នការថា កម្ពុជាកំពុងឆ្ពោះទៅកាន់អ្វី ដែលប្រជាពលរដ្ឋចង់បាន។ នៅពេលខាងមុខនេះ រដ្ឋាភិបាលនឹងសង់កំពង់ផែទេសចរណ៍មួយនៅខេត្តកំពត នេះបើយោងតាមប្រភពព័ត៌មានក្នុងស្រុក។ ការសាងសង់នេះ ត្រូវបានមន្ត្រីពាក់ព័ន្ធបញ្ជាក់ថាវានឹងផ្តល់ផលប្រយោជន៍ជាច្រើនដល់កម្ពុជា ពោលគឺប្រទេសផ្សេងៗ ក្នុងតំបន់ នឹងចូលមកកម្សាន្តនៅកម្ពុជា។ ការសាងសង់នេះ នឹងបង្កើតការងារជាច្រើនដល់ប្រជាពលរដ្ឋកម្ពុជាទៀតផង។
និយាយពីផលិតផលផ្នែកកសិកម្មវិញ ពោលគឺអង្កររបស់កម្ពុជាឈ្នះជាអង្គរល្អបំផុតរបស់ពិភពលោក។ អង្ករផ្ការំដួលកម្ពុជាត្រូវបានគេជ្រើសរើសជាអង្ករក្រអូបគុណភាពល្អផ្តាច់គេរបស់ពិភពលោកក្នុងឆ្នាំ២០១៤។ វាគឺជាមោទនភាពជាតិផ្ទួនៗគ្នា របស់កម្ពុជាក្នុងឆ្នាំ២០១៤នេះ ក្រោយពីកម្ពុជាបានល្បីឈ្មោះលើវិស័យកីឡា ក្នុងកីឡាអាស៊ី ដោយកីឡាការនីខ្មែរម្នាក់បានយកមេដាយមាសសម្រាប់ប្រជាពលរដ្ឋខ្មែរទាំងអស់គ្នា។
ក្រៅពីវិស័យទាំងនេះ កម្ពុជាក៏មានទំនាក់ទំនងល្អជាមួយនឹងបណ្តាប្រទេសផ្សេងៗ ក្នុងតំបន់អាស៊ីអាគ្នេយ៍ក៏ដូចជាបណ្តាប្រទេសផ្សេងៗទៀតលើពិភពលោក។ ទំនាក់ទំនងល្អជាមួយបណ្តាប្រទេសផ្សេងៗ គឺជាសញ្ញាវិជ្ជមានសម្រាប់កម្ពុជា ក្នុងការទំនាក់ទំនងធ្វើពាណិជ្ជកម្មនៅក្នុងប្រទេសកម្ពុជា។ ស្របពេលដែលសមហរណកម្មសេដ្ឋកិច្ចអាស៊ានឈានចូលមកដល់ កម្ពុជាបានត្រៀមខ្លួនជាបណ្តើរៗ ទាំងហេដ្ឋារចនាសម្ព័ន្ធ និងធនធានមនុស្សផងដែរ។
ដូច្នេះ ស្នាដៃទាំងអស់ ដែលបានធ្វើឲ្យកម្ពុជាល្បីឈ្មោះ គឺកើតឡើងពីការខិតខំប្រឹងប្រែងរបស់រដ្ឋាភិបាល ដែលបានសន្យាធ្វើការកែទម្រង់ស៊ីជម្រៅ ហើយនេះជាផ្លែផ្កាក្នុងពេលបច្ចុប្បន្ន។ យើងទាំងអស់គ្នាគួរតែទទួលស្គាល់ថាផ្លែផ្កាទាំងអស់នេះ បានកើតឡើងជាបណ្តើរៗ ហើយចុះរហូតដល់រយៈពេល៤ឆ្នាំទៅមុខទៀត តើកម្ពុជានឹងមានការប្រែប្រួលកាន់តែខ្លាំងឡើងៗកម្រិតណា។ ដោយសារការជួយរកទីផ្សាររបស់រដ្ឋឲ្យប្រជាពលរដ្ឋ រួមទាំងការផ្តល់បច្ចេកទេសផ្សេងៗ ប្រជាពលរដ្ឋក៏គួរតែខិតខំដោយខ្លួនឯងដើមចាប់យកឱកាសវិនិយោគដែរ៕
0 Comments