ភ្នំពេញ ៖ ប្រទេសកម្ពុជាត្រូវបានគេមើលឃើញថា មានប្រជាពលរដ្ឋវ័យក្មេងច្រើន ដែលមានអាយុក្រោម៣០ឆ្នាំ ដែលជាវ័យបំពេញការងារ និងជាវ័យដែលត្រូវចូលរោងការផងដែរនោះ ក្នុងនោះគ្រាន់តែឆ្នាំ២០១៤កន្លងមកនៅរាជធានីភ្នំពេញមានអ្នករៀបអាពាហ៍ពិពាហ៍រហូតដល់៤.០០០គូ។
យោងតាមគេហទំព័រសុខភាពកម្ពុជាដែលបានដកស្រង់ប្រសាសន៍មន្ត្រីអត្រានុកូលដ្ឋានរាជធានីភ្នំពេញបានឲ្យដឹងថា នៅភ្នំពេញឆ្នាំ២០១៤អ្នករៀបការដែលបានចុះលិខិតអាពាហ៍ពិពាហ៍ជាផ្លូវការជិត៤.០០០គូ។ បើគិតទាំងអ្នករស់នៅជាមួយគ្នាដោយមិនរៀបការឬ មិនបានចុះលិខិតអាពាហ៍ពិពាហ៍ឬស្នេហាលួចលាក់គឺប្រហែលជាច្រើនជាងនេះ។ ចំណែកឯអ្នកលែងគ្នាវិញក៏មិនតិចដែរ។ មន្ត្រីអត្រានុកូលដ្ឋានដដែលបានបន្តថា ក្នុងឆ្នាំ២០១៤កន្លងមកនេះ នៅរាជធានីភ្នំពេញ មានប្រជាពលរដ្ឋបានរៀបអាពាហ៍ពិពាហ៍កូនចៅរបស់ខ្លួនចំនួន៣.៩៨៧គូ,កើត១១.៦៨៧នាក់ និងមានអ្នកស្លាប់ចំនួន២.១០៤នាក់ ដែលអ្នកស្លាប់ទាំងនោះរាប់បញ្ជូនទាំងអ្នកស្លាប់ដោយគ្រោះថ្នាក់ចរាចរណ៍ អ្នកស្លាប់ដោយជំងឺ និងចាស់ជរាផងដែរ។
នៅក្នុងរដូវរៀបអាពាហ៍ពិពាហ៍នេះ ប្រជាពលរដ្ឋម្នាក់ៗទាំងអ្នកមានជីវភាពធូរធារ និងមធ្យមពេលជួបគ្នាតែងតែសួរគ្នាទៅវិញទៅមកថា ខែនេះចូលធៀបការប៉ុន្មានរោងឬធៀប។ មានខ្លះទទួលបានរហូតដល់៣០ធៀបក៏មាន រីឯខ្លះទៀតទទួលបានជាង១០ធៀប។ ប៉ុន្តែយ៉ាងហោចណាស់ក្នុងគ្រួសារនីមួយក្នុងរដូវអាពាហ៍ពិពាហ៍ក៏ទទួលបានធៀបការ២ទៅ៣ដែរក្នុង១ខែ។
អ្នកដែលទទួលបានធៀបការច្រើន ត្រូវបានគេនាំគ្នានិយាយថា ជាមនុស្សដែលមានអ្នករាប់អានច្រើននិងញាតិមិត្តច្រើន តែកុំភ្លេចការចំណាយក៏ច្រើនដែរ បើក្នុងមួយខែចូលធៀបការតែ៣០នោះការចំណាយទៅវិញក៏មិនតិចដែរ ព្រោះថាសម្រាប់ការចូលរួមមង្គលការមួយត្រូវចំណាយយ៉ាងតិច២០ដុល្លារសម្រាប់បុរស តែបើស្រីៗវិញត្រូវគិតពីការចំណាយលើការផាត់មុខតែងខ្លួនសំលៀកបំពាក់និងគ្រឿងអលង្ការ។ តែសម្រាប់អ្នកទៅទាំងប្ដីប្រពន្ធការចងដៃទ្វេមួយជាពីរ។ ដូចនេះសម្រាប់អ្នកដែលមានប្រាក់ខែ២០០ទៅ៣០០ដុល្លារចាំបាច់ត្រូវខ្ចីគេបន្ថែម ដើម្បីដោះស្រាយជីវភាពផង និងសម្រាប់ចងដៃការផង៕
សំអឿន
0 Comments