បាត់ដំបង ៖ យ៉ាងហោចណាស់ក៏មានយុវជនម្នាក់ បានស្លាប់យ៉ាងអាណោចអាធ័មក្រោមទម្ងន់
នៃកង់រថយន្តក្រុង ក្នុងចំណោមជនរងគ្រោះចំនួន០៣នាក់ ខណៈដែលពួកគេបានជិះម៉ូតូឌុបគ្នា
ចេញពីផឹកស៊ី កាលពីវេលាម៉ោង១១និង៣០នាទីយប់ ថ្ងៃទី០៣ ខែមករា ឆ្នាំ២០១៥ ហើយបានបោះពួយចេញពីផ្លូវលំឆ្ពោះឡើងទៅលើផ្លូវជាតិលេខ៥ ត្រង់ចំណុចភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង ហើយត្រូវរថយន្តក្រុងបុកពីក្រោយតែម្តង។
យោងតាមរបាយការណ៍របស់មន្ត្រីនគរបាលនៃអធិការដ្ឋានស្រុកសង្កែបានបញ្ជាក់ថា នៅមុនពេលកើតហេតុគឺមានម៉ូតូមួយគ្រឿងម៉ាកវីវ៉ា បានជិះគ្នា០៣នាក់ ដែលពួកគេសុទ្ធតែស្ថិតក្នុងភាព
ស្រវឹង ដែលបានបើកបរយ៉ាងលឿនតាមបណ្តោយផ្លូវលំត្រង់ចំណុចខាងលើឆ្ពោះឡើងទៅលើផ្លូវជាតិ ដោយបានឆ្លងកាត់ទ្រូងថ្នល់ដើម្បីបត់ឆ្វេងទៅទិសខាងកើត ចៃដន្យនៅពេលនោះដែរ ស្រាប់តែមានរថយន្តក្រុងមួយគ្រឿងជារបស់ក្រុមហ៊ុន(វីរៈប៊ុនឆាន់)ដែលកំពុងបើកនរយ៉ាងលឿនក្នុងទិសដៅពីលិចទៅកើតឆ្ពោះទៅក្រុងភ្នំពេញ ហើយក៏បានបុកយ៉ាងពេញទំហឹងចំពីក្រោយ បណ្ដាលឲ្យម៉ូតូខ្ទាតចេញពីលើផ្លូវជាតិ ដោយឡែកយុវជនទាំង០៣នាក់ បានធ្លាក់ចូលទៅក្រោមកង់រថយន្តតែម្តង
ធ្វើឲ្យយុវជនម្នាក់ ត្រូវកង់រថយន្តកិនចំក្បាលបែកធ្លាយខួរពេញថ្នល់ ចំណែកយុវជន០២នាក់ទៀត
ក៏ត្រូវកង់រថយន្តកិនបាក់ជើងទាំងពីរផងដែរ។
ភ្លាមៗនោះដែរ បន្ទាប់ពីសមត្ថកិច្ចចរាចរស្រុកបានចុះទៅដល់គឺរថយន្តបានបើករត់គេចខ្លួនទាំងយប់បាត់ទៅហើយ ចំណែកអ្នករបួសដែលធ្ងន់ទាំង០២នាក់នោះក៏ត្រូវបានកម្លាំងដឹកបញ្ជូន
ទៅសង្គ្រោះនៅឯមន្ទីរពេទ្យខេត្តផងដែរ។ ចំពោះសពយុវជនម្នាក់ដែលមិនមានអ្នកណាស្គាល់អត្តសញ្ញាណ ត្រូវបានសមត្ថកិច្ចយកទៅរក្សាទុកនៅក្នុងវត្តអន្លង់វិលជាបណ្ដោះអាសន្នដើម្បីរង់ចាំស្រាវជ្រាវរកក្រុមគ្រួសារមកទទួលយកទៅធ្វើបុណ្យ។
សមត្ថកិច្ចបានឲ្យកម្ពុជាថ្មីដឹងថា ក្រោយពេលកើតហេតុនោះគឺកម្លាំងបានទាក់ទងទៅតាមបណ្ដាស្រុក និងខេត្តដែលស្ថិតនៅតាមបណ្តោយផ្លូវជាតិលេខ៥ ដើម្បីស្ទាក់ឃាត់រថយន្តដែលមាន
ស្លាកស្នាម និងភិនភាគខាងលើយកមកដោះស្រាយនៅខេត្តបាត់ដំបងវិញ រំលងបានតែប៉ុន្មានម៉ោង
ប៉ុណ្ណោះទើបសមត្ថកិច្ចនៅខេត្តពោធិ៍សាត់បានរាយការណ៍មកថា រថយន្តដែលពាក់ព័ន្ធនោះគឺកម្លាំងឃាត់ចាប់បានហើយ នៅត្រង់ចំណុចភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិ៍សាត់។
ចំណែកអ្នកបើកបរបានរត់គេចខ្លួនបាត់ទៅហើយនៅពេលដែលអ្នកដំណើរចុះមកមើលព្រោងព្រាតដោយសារតែមានឈាមនិងខួរនៅជាប់នឹងក្បាលរថយន្ត។
លុះព្រឹកឡើងកម្លាំងការិយាល័យចរាចរផ្លូវគោកខេត្តបាត់ដំបងបានចេញដំណើរទៅនាំយករថយន្តក្រុងនោះត្រឡប់មកវិញ ហើយក្នុងពេលនោះក្រុមគ្រួសារសពក៏បានមកទទួលយកផងដែរដោយសពមានឈ្មោះ អន អាត ភេទប្រុស អាយុ២៨ឆ្នាំ រស់នៅភូមិក្តុល សង្កាត់ក្តុលដូនទាវ
ក្រុង/ខេត្តបាត់ដំបង។ រីឯយុវជនដែលបាក់ជើងទាំងពីរនោះមានឈ្មោះ ផេង ខ្លឹង ភេទប្រុស អាយុ២៤ឆ្នាំ រស់នៅភូមិដាំស្ពៃ សង្កាត់ស្លាកែត ក្រុងបាត់ដំបង ចំណែកម្នាក់ទៀតដែលបាក់ជើងម្ខាងគឺពុំទាន់ស្គាល់អត្តសញ្ញាណឡើយទេ។ នេះហើយគឺជាលទ្ធផលនៃការផឹកស៊ី ហើយធ្វើការបើកបរទាំងយប់អធ្រាត្រខ្វះការប្រុងប្រយ័ត្ន៕
សោ និយមរ័ត្ន
0 Comments