កំពង់ឆ្នាំង ៖ រថយន្តទួរីសមួយគ្រឿងដឹកគ្រាប់សណ្ដែកលើសទម្ងន់ បានដាច់កង់ទៅមុខលែងរួចនៅចំពាក់កណ្តាលផ្លូវជាតិ បណ្ដាលឲ្យមានការចង្អៀត និងស្ទះចរាចរណ៍លើដងផ្លូវជាតិជាង១ម៉ោង។ ហេតុការណ៍នេះបានកើតឡើងកាលពីវេលាម៉ោង៩និង១៣នាទីព្រឹក ថ្ងៃទី១២ ខែមករា ឆ្នាំ២០១៥ នៅតាមបណ្តោយផ្លូវជាតិលេខ៥ ក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ។
សមត្ថកិច្ចនគរបាលមូលដ្ឋានបានឲ្យដឹងថា រថយន្តខាងលើនេះពាក់ស្លាកលេខភ្នំពេញ2J -3850 ពណ៌សំបកឪឡឹក ដែលកូនស្រីរបស់ម្ចាស់រថយន្តបានដឹកគ្រាប់សណ្ដែកចេញពីខេត្តពោធិ៍សាត់ ទៅលក់នៅស្រុកកោះធំក្នុងខេត្តកណ្ដាល លុះពេលបើកមកដល់ចំណុចកើតហេតុខាងលើ ស្រាប់តែកង់រថយន្តខាងក្រោយផ្នែកខាងឆ្វេងដាច់ចេញពីរថយន្ត ធ្វើឲ្យរថយន្តរបស់គាត់ធ្លាក់តួមួយចំហៀងអូសនិងថ្នល់ប្រមាណជា៥ម៉ែត្រទើបឈប់។ ជាមួយគ្នានោះដែរ ការុងសណ្ដែកដែលនៅក្នុងរថយន្តមួយចំនួនក៏បានធ្លាក់រាយប៉ាយពេញផ្លូវជាតិផងដែរ។
សមត្ថកិច្ចបន្តថា ការដាច់កង់រថយន្តខាងលើនេះ បណ្ដាលមកពីដឹកសណ្ដែកលើសទម្ងន់របស់រថយន្ត តែពុំបានបង្កឲ្យរងរបួសអ្នកណាឡើយ តែបានធ្វើឲ្យស្ទះចរាចរណ៍ជាង១ម៉ោងនៅលើផ្លូវជាតិ។ ករណីនេះសមត្ថកិច្ចបានធ្វើការអប់រំអ្នកបើកបរ ក៏ដូចជាម្ចាស់រថយន្តឲ្យយល់ពីការផ្ទុកទំនិញលើរថយន្ត និងឲ្យមានការប្រុងប្រយ័ត្នខ្ពស់ និងត្រូវចេះពិនិត្យរថយន្តរបស់ខ្លួនគ្រប់ពេលវេលាមុនពេលបើកបរ ដើម្បីបង្ការគ្រោះថ្នាក់ដល់អ្នកខ្លួនឯង និងដទៃដែលបើកបរនៅលើផ្លូវជាតិ៕ ឈៀង ថារិទ្ធ
0 Comments