កំពង់ឆ្នាំង ៖ ចោរឆក់ទូរស័ព្ទម្នាក់ ត្រូវបានមន្ត្រីកងរាជអាវុធហត្ថខេត្តដេញចាប់ខ្លួនបាន បន្ទាប់ពីរូបគេបានឆក់យកទូរស័ព្ទដៃម៉ាកអាយហ្វូនមួយគ្រឿងពីប្រជាពលរដ្ឋដែលកំពុងដើរដើរហាត់ប្រាណ កាលពីវេលាម៉ោង៧និង៣០នាទីយប់ ថ្ងៃទី១០ ខែមករា ឆ្នាំ២០១៥ នៅក្នុងសួនច្បារមុខទីបញ្ជាការដ្ឋានកងរាជអាវុធហត្ថខេត្តកំពង់ឆ្នាំង ស្ថិតក្នុងសង្កាត់ផ្អេរ ក្រុងកំពង់ឆ្នាំង។
មន្ត្រីកងរាជអាវុធហត្ថខេត្តកំពង់ឆ្នាំងបានឲ្យដឹងថា ចោរដែលឆក់ទូរស័ព្ទដៃរូបនេះមានឈ្មោះ យ៉ើ រ៉ហ្វាត់ ភេទប្រុស អាយុ២៥ឆ្នាំ ជនជាតិខ្មែរឥស្លាម ស្នាក់នៅភូមិឃ្លាំងប្រាក់ សង្កាត់ផ្អេរ ក្រុងកំពង់ឆ្នាំង។ ចំណែកម្ចាស់ទូរស័ព្ទដៃឈ្មោះ ប៊ុន ទី ភេទប្រុស រស់នៅក្នុងក្រុងកំពង់ឆ្នាំង។ នៅមុនពេលកើតហេតុម្ចាស់ទូរស័ព្ទកំពុងដើរហាត់ប្រាណនៅតាមសួនច្បារដើមពោធិមុខបញ្ជាការដ្ឋានកងរាជអាវុធហត្ថខេត្តកំពង់ឆ្នាំង នៅពេលកំពុងតែដើរហាត់ប្រាណ ក៏ស្រាប់តែមានចោរជាជនជាតិខ្មែរឥស្លាមខាងលើ បានមកដើរមកអែបៗជនរងគ្រោះ ហើយក៏ឆ្លៀតឧកាសឆក់ទូរស័ព្ទដៃម៉ាក IPhone5 បានរួចរត់គេចខ្លួនតាមផ្លូវនៅក្បែររបងទីបញ្ជាការដ្ឋានអាវុធហត្ថខេត្ត ភ្លាមៗនោះជនរងគ្រោះបានស្រែកឱ្យជួយ ហើយប្រជាពលរដ្ឋដែលនៅហាត់ប្រាណទីនោះមានការឆោឡោឡើង ផ្អើលដល់ កម្លាំងអាវុធហត្ថខេត្តក្នុងបញ្ជាការដ្ឋាន ហើយមន្ត្រីកងរាជអាវុធហត្ថខេត្តក៏បាននាំគ្នាចេញដេញតាមចាប់ខ្លួនចោររូបនេះបានភ្លាមៗតែម្តង។
ចោរថ្លើមធំខាងលើនេះ ត្រូវបានសមត្ថកិច្ចជំនាញកងអាវុធហត្ថខេត្តកសាងសំណុំរឿងតាមនីតិវិធីបញ្ជូនខ្លួនជនល្មើសទៅសាលាដំបូងខេត្តកំពង់ឆ្នាំង។ ចំណែកទូរស័ព្ទដៃត្រូវបានសមត្ថកិច្ចកងរាជអាវុធហត្ថខេត្តប្រគល់ជូនទៅម្ចាស់គេវិញ ដែលលោក ប៊ុន ធី ជាម្ចាស់ទូរស័ព្ទដៃបានថ្លែងអំណរគុណយ៉ាងជ្រាលជ្រៅចំពោះសមត្ថកិច្ចកងរាជអាវុធហត្ថខេត្តកំពង់ឆ្នាំងដែលបានឈឺឆ្អាលជួយបង្ក្រាបចាប់ខ្លួនចោរឆក់ខាងលើបានទាន់ពេលវេលា និងបានប្រគល់ទូរស័ព្ទដៃជូនលោកជាម្ចាស់វិញ៕ ( ឈៀង ថារិទ្ធ )
0 Comments