ប្រគល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋ ចំនួន ១.៨៣៨នាក់នៅសាលាខណ្ឌទួលគោក
ភ្នំពេញ ៖ អត្តសញ្ញាណប័ណ្ណសញ្ជាតិខ្មែរចំនួន ១.៨៣៨សន្លឹកត្រូវបានអាជ្ញាធរខណ្ឌទួលគោកយកមកប្រគល់ជូនប្រជាពលរដ្ឋរបស់ខ្លួនយកទៅប្រើប្រាស់សម្រាប់ជីវភាពប្រចាំថ្ងៃនេះក្រោយពីផលិតបានរួចរាល់ ដែលពិធីប្រគល់នេះត្រូវបានធ្វើឡើងកាលពីរសៀលថ្ងៃច័ន្ទ ទី១២ ខែមករា ឆ្នាំ២០១៥ នៅសាលាខណ្ឌទួលគោក។
ពិធីចែកអត្តសញ្ញាណប័ណ្ណនេះ ធ្វើឡើងដោយមានការចូលរួមពីលោក ឯក ឃុនដឿន អភិបាលនៃគណៈអភិបាលខណ្ឌទួលគោក លោក ម៉ែន សិរី ប្រធានក្រុមប្រឹក្សាខណ្ឌ លោកវរសេនីយ៍ត្រី ផន ផែង ស្នងការរងនៃស្នងការដ្ឋាននគរបាលរាជធានីភ្នំពេញ លោក ហ៊ុន សុធី អធិការនគរបាលខណ្ឌទួលគោក លោកវរសេនីយ៍ឯក មិន សុផេត នាយការិយាល័យអត្តសញ្ញាណប័ណ្ណនៃស្នងការដ្ឋាននគរបាលរាជធានីភ្នំពេញ ចៅសង្កាត់ និងនាយនគរបាលប៉ុស្តិ៍រដ្ឋបាលទាំង១០ រួមទាំងប្រជាពលរដ្ឋជាច្រើននាក់ផងដែរ។
លោក ឯក ឃុនដឿន អភិបាលខណ្ឌទួលគោក ក្នុងឱកាសនោះបានលើកឡើងដោយសំណូមពរឲ្យប្រជាជនដែលទើបតែទទួលបានអត្តសញ្ញាណប័ណ្ណសំគាល់ខ្លួន និងអ្នកដែលមានស្រាប់ ត្រូវថែរក្សាឲ្យបានគង់វង្សជៀសវាងការបាត់ ដែលធ្វើឲ្យពិបាកក្នុងការប្រើប្រាស់នៅពេលត្រូវការ។ លោកក៏បានស្នើឲ្យប៉ុស្តិ៍រដ្ឋបាល សង្កាត់ ត្រូវស្រង់ស្ថិតិប្រជាជនដែលជិតគ្រប់អាយុធ្វើប័ណ្ណសំគាល់ខ្លួនឲ្យបានច្បាស់លាស់ ដើម្បីឲ្យខាងជំនាញងាយស្រួលក្នុងការធ្វើបន្តជូនពួកគាត់។
ដោយឡែកលោក ហ៊ុន សុធី អធិការនគរបាលខណ្ឌទួលគោក ក៏បានលើកឡើងផងដែរថា ការងារផ្តល់អត្តសញ្ញាណប័ណ្ណសញ្ជាតិខ្មែរក្នុងខណ្ឌទួលគោក គិតមកដល់បច្ចុប្បន្ន គឺបានផ្តល់ឲ្យប្រជាពលរដ្ឋប្រើប្រាស់បានចំនួន ១១១.៩៦២នាក់ ក្នុងនោះប្រុស ៥៤.៥៧៣នាក់។ ហើយលើកនេះចែកជូនប្រជាពលរដ្ឋប្រើប្រាស់បានចំនួន ១.៨៣៨នាក់ ក្នុងនោះមានប្រុស៨៧៦នាក់។ ជាមួយគ្នានោះដែរ ចំពោះអ្នកដែលនៅសេសសល់មិនទាន់ទទួលបាន ខាងការិយាល័យជំនាញកំពុងជំរុញការងារផលិត ដើម្បីយកចែកជូនប្រជាពលរដ្ឋយកទៅប្រើប្រាស់នៅពេលខាងមុខ។
លោកបន្តថា ប្រជាពលរដ្ឋដែលគ្រប់អាយុហើយ តែមិនទាន់ទទួលបានអត្តសញ្ញាណប័ណ្ណ ឬអ្នកមានហើយបានបាត់ ឬខូច ឬហួសសុពលភាពនោះ ត្រូវមកចុះឈ្មោះនៅប៉ុស្តិ៍នគរបាលរដ្ឋបាលរបស់ខ្លួនដើម្បីធ្វើឡើងវិញ ហើយលោកក៏បានសំណូមពរឲ្យអ្នកដែលមានអត្តសញ្ញាណប័ណ្ណហើយ ត្រូវថែរក្សាឲ្យបានល្អ ជៀសវាងបាត់ ឬខូច ព្រោះថាបើបាត់បង់ដោយការធ្វេសប្រហែស ហើយទៅធ្វើឡើងវិញនោះតាមច្បាប់ត្រូវពិន័យជាប្រាក់ថែមទៀតហើយវាក៏ធ្វើអោយខាតបង់ពេលវេលាផងដែរ៕
ស្រីរ័ត្ន
0 Comments