ចំណូលពន្ធប្រចាំឆ្នាំលើសផែនការធ្វើឱ្យអគ្គនាយកដ្ឋានពន្ធដារទទួលបានការកោតសរសើរ
ភ្នំពេញ ៖ នៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធ ប្រចាំត្រី មាស និងប្រចាំឆ្នាំ២០១៤ នៅរាជធានីភ្នំពេញ កាលពីថ្ងៃទី១២ខែមករា ឆ្នាំ២០១៥ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសម្តែងនូវការអបអរសាទរ និងកោតសរសើរចំពោះថ្នាក់ដឹកនាំ មន្ត្រីរាជការរបស់អគ្គនាយកដ្ឋានពន្ធដារ ដែលបានខិតខំប្រឹងប្រែងបំពេញភារកិច្ចធ្វើឱ្យលទ្ធផល នៃការប្រមូលចំណូលពន្ធប្រចាំឆ្នាំ២០១៤ សម្រេចបានលើសផែនការនោះ។
នៅឆ្នាំ២០១៤អគ្គនាយកដ្ឋានពន្ធដារប្រមូលចំណូលផ្ទៃក្នុងបានចំនួន៤.២៥១.១៦១លានរៀល ត្រូវជា១.០៦២,៧៩លានដុល្លារ ស្មើនឹង ១០៦,៩៤%នៃផែនការច្បាប់ បើប្រៀបធៀបនឹងឆ្នាំ២០១៣ឃើញថា ការប្រមូលចំណូលពន្ធដារបង់ចូលថវិកាជាតិ សម្រាប់ឆ្នាំ២០១៤កើន ឡើងចំនួនស្មើនឹង១៧,៩៣% ។ ក្នុងនោះថវិកាថ្នាក់ជាតិបានចំនួនស្មើ នឹង១០៦.៩០% និងថវិការដ្ឋបាលថ្នាក់ក្រោមជាតិបានចំនួនស្មើនឹង ១០៧.០%។
ឯកឧត្តមរដ្ឋមន្ត្រីបានវាយតម្លៃខ្ពស់ និងគាំទ្រចំពោះការខិតខំប្រឹងប្រែងប្រមូលចំណូលពន្ធដារ ដែលមានការកើនឡើងលើសផែនការគួរ ជាទីពេញចិត្ត និងបានផ្តល់អនុសាសន៍ណែនាំបន្ថែមដល់ថ្នាក់ដឹកនាំ និងប្រធានអង្គភាពពន្ធដារគ្រប់លំដាប់ថ្នាក់ និងមន្ត្រីពន្ធដារទាំងអស់ ឱ្យខិតខំពង្រឹងការអនុវត្តន៍ច្បាប់ វិន័យការងារ និងក្រមសីលធម៌វិជ្ជា ជីវៈមន្ត្រីពន្ធដារឱ្យបានល្អប្រសើរ តាមរយៈការផ្តល់សេវាអ្នកជាប់ពន្ធ ប្រកបដោយប្រសិទ្ធភាព និងភាពទន់ភ្លន់ តែម៉ឺងម៉ាត់ ដោយគោរពច្បាប់ និងបទបញ្ញត្តិជាគោល ធ្វើយ៉ាងណាឱ្យអ្នកជាប់ពន្ធរីករាយក្នុង កិច្ចសហការបង់ពន្ធជូនរដ្ឋ និងកិច្ចពង្រឹងរដ្ឋបាលសារពើពន្ធ ដើម្បីការ ប្រមូលពន្ធឱ្យកាន់តែទទួលបានប្រសិទ្ធភាពខ្ពស់ និងអនុវត្តន៍ទៅតាម ស្មារតីចំនួន០៤គឺ ការធ្វើការងារជាក្រុម ការប្រកាន់ខ្ជាប់នូវក្រមសីល ធម៌វិជ្ជាជីវៈមន្ត្រីពន្ធដារ សូមកុំមើលរំលងនូវកំហុសខ្លួនឯង និងស្មារតី បុរេសកម្ម ដើម្បីឈានទៅសម្រេចបានតាមផែនការក្នុងច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០១៥។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គ នាយកនៃអគ្គនាយកដ្ឋានពន្ធដារបានរាយការណ៍ថាក្នុងខែធ្នូឆ្នាំ២០១៤ អគ្គនាយកដ្ឋានពន្ធដារបានប្រមូល និងបង់ពន្ធចូលថវិកាជាតិបានចំ នួន៤១៤.៣១៥លានរៀល គិតជាដុល្លារចំនួន១០៣,៥៨លានដុល្លារ ដែលចំណូលនេះមានការកើនឡើងជាងខែវិច្ឆិកា ឆ្នាំ២០១៤ស្មើនឹង ៣៦,៥៣%។ បើប្រៀបធៀបទៅនឹងចំណូលពន្ធសម្រាប់ខែធ្នូ ឆ្នាំ ២០១៣ឃើញថា ការប្រមូលចំណូលពន្ធបង់ចូលថវិកាជាតិប្រចាំខែ ធ្នូ ឆ្នាំ២០១៤មានការកើនឡើងស្មើនឹង១៧,៩៣%។
ក្នុងរយៈពេលដូចគ្នាឆ្នាំ២០១៣ និងឆ្នាំ២០១៤ឃើញថា ក៏មានការកើនឡើងនូវចំណូលពន្ធតាមប្រភេទពន្ធសំខាន់ៗ មួយចំនួនដូចជា ពន្ធលើប្រាក់បៀវត្សមានការកើនឡើងប្រមាណ២៩,៦% ពន្ធលើប្រាក់ ចំណេញមានការកើនឡើងប្រមាណ២៣,៩% អាករលើតម្លៃបន្ថែម មានការកើនឡើងប្រមាណ៨,៧% និងអាករពិសេសមានការកើន ឡើងប្រមាណ១៣,៣%។ ចំពោះចំណូលពន្ធតាមសកម្មភាពអាជីវកម្ម មានការកើនឡើងស្ទើរតែទាំងអស់ ក្នុងនោះរួមមាន ផ្នែកភេសជ្ជៈកើន ឡើងប្រមាណ១៤,៩% សេវាហិរញ្ញវត្ថុកើនឡើងប្រមាណ២២,៨% ទូរគមនាគមន៍កើនឡើងប្រមាណ២,៣% ផ្នែកស្ថាបត្យកម្ម និងសំណង់ កើនឡើងប្រមាណ៤៤,៣%ផលិតគ្រឿងប្រើប្រាស់កើនឡើងប្រមាណ ២៩,២% ផលិតសម្លៀកបំពាក់កើនឡើងប្រមាណ៤៨,១% នីហរ័ណ អាហរ័ណកើនឡើងប្រមាណ១០,៨% ផ្នែកសណ្ឋាគារ និងផ្ទះសំណាក់ កើនឡើងប្រមាណ៤៥,៥% ផលិតថ្នាំជក់កើនឡើងប្រមាណ១៤,៥% អាជីវកម្មអចលនទ្រព្យកើនឡើងប្រមាណ១២៨,២% អាកាសយានដ្ឋាន និងកំពង់ផែកើនឡើងប្រមាណ១៥,០% លក់ភេសជ្ជៈកើនឡើង ប្រមាណ៣៨,១% លក់សម្ភារការិយាល័យកើនឡើងប្រមាណ៣៨,៥% ផលិតម្ហូបអាហារកើនឡើងប្រមាណ៧៥,១% ផ្នែកលក់គ្រឿងយន្ត កើនឡើងប្រមាណ៤៥,៩% លក់ផលិតផលឱសថកើនឡើងប្រមាណ ១៤៥,២% និងលក់គ្រឿងសំណង់កើនឡើងប្រមាណ១.៤១២,៤%៕
ស្នាយពល
0 Comments