លួន សុខខេង អ្នកប្រដាល់ក្លឹបអាស៊ីកីឡា នឹងឡើងប្រកួតទូទាត់បំណុលជាមួយផល សុផាត អ្នកប្រដាល់ក្លឹបកងរាជអាវុធហត្ថរាជធានីភ្នំពេញ នារសៀលថ្ងៃអាទិត្យទី០៤ ខែមករា ឆ្នាំ២០១៥ខាងមុខនេះ នៅលើសង្វៀនរោងសៀកទល់មុខរដ្ឋសភា។
សុខខេង ធ្លាប់វាយចាញ់ផល សុផាត ដោយពិន្ទុម្តង កាលពីថ្ងៃទី០៩ ខែកក្កដា ឆ្នាំ២០១១ និងលើកទី២ វាយចាញ់ក្នុងទឹកទី៣ក្នុងការប្រកួតសងសឹកថ្ងៃទី២១ ខែមេសា ឆ្នាំ២០១៣។ តាំងពីពេលនោះមក ពួកគេទាំងពីរពុំដែលប៉ះគ្នាទៀតឡើយ។ លួន សុខខេង ឥឡូវនេះមិនដូចពីមុននោះទេគេមានការរីកចម្រើនជាងមុនច្រើនណាស់។ មុនគេចេះវាយតែដៃម្ខាងប៉ុណ្ណោះ តែឥឡូវគេចេះទាំងដៃ ទាំងជើង ជង្គង់កែងទាំងអស់។ ការប្រកួតចុងក្រោយរបស់សុខខេង គឺវាយស្មើជាមួយឡេះ តើក អ្នកប្រដាល់ក្លឹបពុទ្ធសេរីវង្សកីឡា។
ចំណែក ផល សុផាត វិញ ខុសពីសុខខេង ដែលពីមុនគេខ្លាំង តែឥឡូវគេធ្លាក់ចុះបន្តិច ពិសេសគឺធ្លាក់ខាងផ្នែកកម្លាំងកាយសម្បទា ដោយសារតែគេមានអាយុច្រើន។ ទោះជាយ៉ាងនេះក៏ដោយ ក៏សុផាតគេនៅតែវាយបានល្អដដែល គ្រាន់តែឆាប់អស់ស៊ុហ្វប៉ុណ្ណោះ ហើយការប្រកួតរបស់គេ ក៏នៅតែល្អដែរ ក្នុងការឡើងសង្វៀនប៉ុន្មានប្រកួតកន្លងមកនេះ។ ការប្រកួតចុងក្រោយរបស់ផល សុផាត គឺវាយឈ្នះចៅ ផលឌឿ អ្នកប្រដាល់ក្លឹបសំរោងកោងកីឡាខេត្តបាត់ដំបងដោយពិន្ទុ។
ចាំមើល តើលួន សុខខេង គេអាចសងសឹកផល សុផាត បានសម្រេចឬអត់ សម្រាប់ការជួបគ្នាលើកនេះ ?
ម៉ន ចាន់ដារ៉ា ដែលជាអ្នកប្រដាល់មកក្លឹបការិយាល័យទី៥ កងទ័ពជើងគោក ត្រូវគេផ្គូផ្គងឲ្យជួបប្រកួតជាមួយសល់ ពិសិដ្ឋ អ្នកប្រដាល់ក្លឹបកុសលកីឡា។ អ្នកប្រដាល់ទាំងពីរនាក់នេះ មិនធ្លាប់ដែលមានប្រវត្តិជួបគ្នាទេពីមុនមក។
រវាងអ្នកប្រដាល់ទាំងពីរនេះ ពិសិដ្ឋជាអ្នកប្រដាល់ចាស់វស្សា តែចាន់ដារ៉ា គេជាអ្នកប្រដាល់ជើងថ្មី តែមានផ្លែល្អ និងខ្លាំង។
ចាន់ដារ៉ា បើគិតពីកេរ្តិ៍ឈ្មោះក្នុងពិភពប្រដាល់ គេមិនដល់សល់ ពិសិដ្ឋទេ។ ដារ៉ា ធ្លាប់ប៉ះជើងខ្លាំងៗច្រើនកន្លងមក ហើយបើពិនិត្យមើលលទ្ធផលប្រកួតរបស់គេវិញនោះ គឺចាញ់ច្រើនជាងឈ្នះ។
ការប្រកួតចុងក្រោយរបស់ម៉ន ចាន់ដារ៉ា គឺវាយឈ្នះយ៉ាម ឡយ ដោយពិន្ទុ កាលពីថ្ងៃទី២៦ ខែធ្នូ ឆ្នាំ២០១៤ កន្លងមកនេះ។ រីឯការប្រកួតចុងក្រោយរបស់សល់ ពិសិដ្ឋ វិញ គឺវាយឈ្នះសួង សុវណ្ណថា អ្នកប្រដាល់ក្លឹបកីឡាក្រសួងការពារជាតិដោយពិន្ទុ ក្នុងការជួបគ្នាថ្ងៃទី២៨ ខែធ្នូ ឆ្នាំ២០១៤។ សល់ ពិសិដ្ឋ គេប្រកួតច្រើនឆ្នាំហើយ ម្ល៉ោះហើយបទពិសោធន៍ និងកលល្បិចក្នុងការប្រកួតរបស់គេមិនធម្មតាឡើយ។ សម្រាប់ការជួបគ្នាលើកនេះ អ្នកណាឈ្នះ អ្នកណាចាញ់ ពុំអាចទាយមុនបានឡើយ។
ស្រម៉ៃ សួន អ្នកប្រដាល់សាកលអាជីពមកពីក្លឹបកងរាជអាវុធហត្ថរាជធានីភ្នំពេញ នឹងជួបប្រកួតជាមួយ ស្រ៊ុន ពិសី អ្នកប្រដាល់សាកលអាជីពមកពីក្លឹបកីឡាក្រសួងការពារជាតិក្នុងទម្ងន់៦៧គីឡូក្រាម។ ក្នុងការប្រកួត៦ទឹកនោះ ស្រ៊ុន ពិសី ទំនងជាមិនអាចឈ្នះស្រម៉ៃ សួន នោះទេ ព្រោះស្រម៉ៃសួនគេវាយរហ័សនិងលឿនជាង។
ចំណែក ម៉ន វណ្ណនី អ្នកប្រដាល់ក្លឹបការិយាល័យទី៥កងទ័ពជើងគោក នឹងជួបប្រកួតជាមួយហេង ពន្លឺ អ្នកប្រដាល់ក្លឹបព្រៃទទឹងខេត្តបាត់ដំបង។ រវាងពួកគេទាំងនេះ ជាអ្នកប្រដាល់ជើងថ្មីដូចគ្នា ដូច្នេះសម្រាប់ការជួបគ្នានេះ ពុំដឹងថានរណាឈ្នះ អ្នកណាចាញ់នោះឡើយ៕
0 Comments