ក្រុមចោរធ្វើសកម្មភាពប្លន់យកម៉ូតូMSX ពីបុរសម្នាក់បានសម្រេចដោយសុវត្តិភាពបំផុត
ភ្នំពេញ ៖ កាលពីវេលាម៉ោង២និង៥៥នាទីរំលងអធ្រាត្រឈានចូលថ្ងៃទី១៣ ខែមករា ឆ្នាំ២០១៥ នៅចំណុចមុខទីស្តីការគណៈរដ្ឋមន្ត្រីតាមបណ្តោយផ្លូវសហព័ន្ធរុស្ស៊ីស្ថិតក្នុងសង្កាត់មិត្តភាព ខណ្ឌ៧មករា។ មានក្រុមចោរប្លន់ប្រដាប់អាវុធមានគ្នា៣នាក់ជិះម៉ូតូ២គ្រឿងប្រដាប់ដោយកាំភ្លើងខ្លី៣ដើមបានធ្វើសកម្មភាពភ្ជង់ប្លន់យកម៉ូតូMSX ពីបុរសម្នាក់បានសម្រេចហើយគេចខ្លួនបាត់ដោយសុវត្ថិភាព។
ជនរងគ្រោះឈ្មោះ មាស វណ្ណដែន ភេទប្រុស អាយុ២៨ឆ្នាំស្នាក់នៅម្តុំរង្វង់មូលទួលគោកខណ្ឌទួលគោកជិះម៉ូតូម៉ាកMSX ពណ៌សគ្នាស្លាកលេខ។ ចំណែកជនសង្ស័យមានគ្នា៣នាក់ជិះម៉ូតូ២គ្រឿងមិនចាំស្លាកលេខប្រដាប់ដោយកាំភ្លើងខ្លី៣ដើមមិនចាំម៉ាក។
ជនរងគ្រោះបានឲ្យដឹងថា មុនពេលកើតហេតុរួបគេបានជិះម៉ូតូម៉ាកMSX ពណ៌សគ្នាស្លាកលេខដែលទើបតែនិងទិញ ជិះធ្វើដំណើរតាមបណ្តោយផ្លូវសហព័ន្ធរុស្ស៊ីក្នុងទិសដៅពីលិចទៅកើតក្នុងបំណងត្រឡប់ទៅផ្ទះ។ ខណៈមកដល់ចំណុចមុខទីស្តីការខណៈរដ្ឋមន្ត្រីស្រាប់តែមានជនសង្ស័យ៣នាក់ជិះម៉ូតូ២គ្រឿងមិនចាំម៉ាកបានជិះមកក្បែរហើយកៀរឲ្យម៉ូតូរបស់ជនរងគ្រោះឈប់រួចក៏ដកកាំភ្លើងខ្លីមកភ្ជង់គំរាមមិនឲ្យស្រែកហើយបានធ្វើសកម្មភាពប្លន់យកម៉ូតូនិងឆក់យកខ្សែកផ្លាកទីនមួយខ្សែទម្ងន់ប្រហែលជិត៣ជីហើយនាំគ្នាជិះម៉ូតូគេចខ្លួនបាត់ដោយសុវត្ថិភាព។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុនិងនាំជនរងគ្រោះទៅកាន់ប៉ុស្តិ៍នគរបាលរដ្ឋបាលមិត្តភាពដើម្បីដាក់ពាក្យបណ្តឹងងាយស្រួលតាមចាប់ក្រុមជនសង្ស័យយកមកផ្តន្ទាទោសតាមផ្លូវច្បាប់។
គួរបញ្ជាក់ផងដែរថា ក្នុងរយៈពេលត្រឹមតែ២៥នាទីមានករណីក្រុមចោរប្លន់ប្រដាប់អាវុធប្លន់យកម៉ូតូអស់២គ្រឿងក្នុងភូមិសាស្ត្រទឹកដីខណ្ឌដូនពេញនិង៧មករាតែសមត្ថកិច្ចគ្មានសមត្ថភាពតាមចាប់ជនសង្ស័យបានសូម្បីតែម្នាក់។
ប្រជាពលរដ្ឋបានសំណូមពរដល់អាជ្ញាធរមានសមត្ថកិច្ចមេត្តាជួយល្បាតដាមដងផ្លូវអោយបានច្រើនផង ពួកក្រុមចោរប្លន់ភាគច្រើនតែងតែធ្វើសកម្មភាពនៅពេលយប់និងទៀបភ្លឺ៕
ឌួងវិរះជ័យ
0 Comments