បណ្ដារដ្ឋមន្ត្រីការពារប្រទេសរបស់អង្គការណាតូ បានព្រមព្រៀងគ្នានៅថ្ងៃព្រហស្បតិ៍ ដើម្បីពង្រីកទ្វេដងនូវទំហំរបស់កងកម្លាំងតបតរបស់សម្ព័ន្ធភាព ហើយនឹងបង្កើតកងកម្លាំងប្រតិកម្មរហ័សថ្មីមួយដែលមានកងទ័ព៥.០០០នាក់ ដើម្បីប្រឈមមុខនឹងការប្រកួតប្រជែងពីប្រទេសរុស្ស៊ី និងពួកជ្រុលនិយមឥស្លាម។
អគ្គលេខាធិការអង្គការណាតូ លោក ចន ស្តូលថេនប៊ឺក (Jens Stoltenberg) និយាយថា"សេចក្តីសម្រេចចិត្តនោះ ត្រូវបានគេធ្វើនៅក្នុងអំឡុងពេលប្រជុំរយៈពេលមួយថ្ងៃនៅទីបញ្ជាការសម្ព័ន្ធភាពនៅក្រុងប្រ៊ុនសែលនោះនឹងធ្វើឲ្យប្រាកដថា យើងមានកងកម្លាំងពិតប្រាកដនៅចំកន្លែងនិងចំពេលវេលា"។
លោកបាននិយាយប្រាប់អ្នកយកព័ត៌មានថា ឥឡូវអង្គការណាតូនឹងអាចការពារសម្ព័ន្ធមិត្តទាំងអស់ប្រឆាំងការគំរាមណាមួយពីខាងកើតឫពីខាងត្បូងនោះ។
លោក ស្តូលថេនប៊ឺកនិយាយថា កងកម្លាំងតបតទាំងស្រុងរបស់អង្គការណាតូ ត្រូវបានបង្កើនពីកងទ័ព១៣-០០០នាក់ ទៅ៣០.០០០នាក់ ហើយកងកម្លាំងប្រតិកម្មរហ័សរបស់ខ្លួនត្រូវចាប់ផ្តើមបញ្ជូនក្នុងរយៈពេល៤៨ម៉ោង។
រដ្ឋមន្ត្រីការពារប្រទេសសហរដ្ឋអាមេរិក លោក ឆក់ហាហ្គេល (Chuck Hagel) និងសមភាគីរបស់លោកមកពីប្រទេសជាសមាជិក២៧ប្រទេសទៀតរបស់អង្គការណាតូ ក៏បានសម្រេចឲ្យមានការបង្កើតមជ្ឈមណ្ឌលបញ្ជានិងត្រួតពិនិត្យនៅក្នុងរដ្ឋធានីរបស់រដ្ឋបាល់ទិក៣ ប្រទេសលីទុយហានី អេស្តូនី និងប្រទេសលីតូនី ក៏ដូចជា នៅប៉ូឡូញ រ៉ូម៉ានី និងប៊ុយហ្ការីដែរ៕
រឹទ្ធ
0 Comments