ភ្នំពេញ ៖ ព្រឹត្តិការណ៍ប្រកួតប្រដាល់ដណ្ដើមខ្សែក្រវាត់លីអូទម្ងន់៦០គីឡូក្រាម នៅលើសង្វៀនរោងសៀកមុខរដ្ឋសភា នៅថ្ងៃអាទិត្យទី០៧ ខែកុម្ភៈ ឆ្នាំ២០១៥នេះ ជាការប្រកួតជម្រុះជុំទី២ សប្ដាហ៍ទី៣ ។ ជុំទី២នេះ មានចំនួន២គូ ដែលជាការប្រកួតរវាង ផង់ សុភ័ស្ស អ្នកប្រដាល់ក្លិបតាឡីដំរីមានរិទ្ធ និងផាន់ សារុន អ្នកប្រដាល់ក្លិបគជសារកីឡា និងមួយគូទៀត សួង សុវណ្ណថា អ្នកប្រដាល់ក្លិបក្រសួងការពារជាតិ ជួប ថន វាសនា អ្នកប្រដាល់ក្លិបនាគមានជ័យ។
ផង់ សុភ័ស្ស កាលពីប្រកួតជុំទី១-បានវាយឈ្នះ សួង សុវណ្ណថា ដោយស្វ័យប្រវត្តិ ដោយសារសុវណ្ណថាអវត្តមាន ហើយពេលនោះអ្នកគ្រប់គ្រងកម្មវិធីបានយក សុខ សុវណ្ណ ក្លិបកងពលតូចលេខ៣១ឲ្យឡើងប្រកួតជាមួយ ផង់ សុភ័ស្ស ហើយ សុភ័ស្ស ឈ្នះក្នុងទឹកទី៣។
សម្រាប់ការជួប ផាន់ សារុនលើកនេះ សុភ័ស្ស មិនដឹងថាជួបសំណាងល្អបានឈ្នះ សារុន ទៀតឬអត់នោះទេ? ព្រោះផាន់ សារុន គេល្អនិងខ្លាំងជាង។ រវាង ផង់ សុភ័ស្ស និង ផាន់ សារុននេះ ពុំដែលជួបគ្នាទេកន្លងមក។ តែទោះជាយ៉ាងនេះក៏ដោយ ក៏ក្រុមអ្នកវិភាគអះអាងដែរថា ផង់ សុភ័ស្សមិនអាចឈ្នះ ផាន់ សារុន នោះឡើយសម្រាប់ជំនួបគ្នានេះ។
ផាន់ សារុន ជាអ្នកប្រដាល់ដែលមានកណ្ដាប់ដៃល្អនិងទាត់ខ្លាំង ចិត្តប្រដាល់ក៏ធំថែមទៀត។ កាលពីប្រកួតជម្រុះជុំទី១-បានវាយឈ្នះ ថន វាសនា អ្នកប្រដាល់ក្លិបនាគមានជ័យក្នុងទឹកទី៤។
ទោះជាយ៉ាងណា សម្រាប់ជំនួបរវាង ផាន់ សារុន និង ផង់ សុភ័ស្ស ក្នុងការប្រកួតជម្រុះជុំទី២នេះ គេមានជំនឿទុកចិត្តថា សារុននឹងឈ្នះការប្រកួតនេះ។
ចំពោះការប្រកួតជម្រុះមួយគូទៀតនោះ ថន វាសនា អ្នកប្រដាល់ក្លិបនាគមានជ័យនឹងជួបជាមួយ សួង សុវណ្ណថា អ្នកប្រដាល់ក្លិបក្រសួងការពារជាតិ។ ពួកគេពីរនាក់នេះធ្លាប់ប៉ះគ្នាម្តងហើយកាលពីថ្ងៃទី០២ ខែវិច្ឆិកា ឆ្នាំ២០១៤ ដោយ ថន វាសនា ចាញ់ សួង សុវណ្ណថាដោយពិន្ទុ។
ថន វាសនា គេបាន១ពិន្ទុ បន្ទាប់ពីការប្រកួតជុំទី១ គេបានវាយចាញ់ ផាន់ សារុន ក្នុងទឹកទី៤ នោះ។ ឯ សួង សុវណ្ណថា គេមិនមានបានពិន្ទុទេ ដោយការប្រកួតជុំទី១ គេបានបោះបង់ការប្រកួតពេលត្រូវប្រកួតជាមួយ ផង់ សុភ័ស្សនោះ។
សួង សុវណ្ណថា ទំនងជាមិនអាចយកឈ្នះ ថន វាសនា ដូចមុននោះទេ សម្រាប់ការជួបគ្នាក្នុងជម្រុះខ្សែក្រវាត់នេះ ព្រោះថាវាសនាឥឡូវនេះវាយខ្លាំងជាងមុន ហើយថែមទាំងមិនចេះខ្លាចថែមទៀត ឯការវាយរបស់គេក៏ច្បាស់ជាងមុនដែរ។ ទោះជាយ៉ាងណា ថន វាសនា ធ្លាប់ចាញ់ សុវណ្ណថាម្តងហើយ។ លើកនេះមិនដឹងថា នរណាជាអ្នកឈ្នះនោះទេ ព្រោះការប្រកួតខ្សែក្រវាត់គឺអត់មានហ៊ានប្រហែសរៀងៗខ្លួន ដើម្បីសន្សំពិន្ទុ។
ការប្រកួតជម្រុះវិលជុំ ក្នុងព្រឹត្តិការណ៍ប្រកួតប្រដាល់ដណ្ដើមខ្សែក្រវាត់លីអូបៀរ ទម្ងន់៦០ គីឡូក្រាម ដែលមានអ្នកប្រដាល់ចំនួន៨រូបនោះ នឹងត្រូវជួបគ្នាទាំងអស់គឺក្នុងម្នាក់ៗត្រូវប្រកួត៧ប្រកួត ដោយអ្នកដែលមានពិន្ទុច្រើនជាងគេ ពីលេខ១ដល់លេខ៤ នឹងត្រូវបានឡើងទៅប្រកួតបន្តវគ្គពាក់កណ្ដាលផ្តាច់ព្រ័ត្រនិងផ្តាច់ព្រ័ត្រ៕
វិសិទ្ធ
0 Comments