កំពង់ឆ្នាំង ៖ បុរសម្នាក់បានរងរបួសធ្ងន់ សង្ស័យថាស្រវឹងបើកម៉ូតូទៅបុករថយន្តក្រុងដែលកំពុងបន្ថយល្បឿនក្នុងទិសដៅច្រាស់គ្នាកណ្ដាលយប់។ ករណីគ្រោះថ្នាក់ចរាចរណ៍នេះបានកើតឡើងនៅ វេលាម៉ោង១០និង២០នាទីយប់ ថ្ងៃទី០៤ ខែកុម្ភៈ ឆ្នាំ២០១៥ នៅតាមជាតិលេខ៥ចន្លោះគីឡូម៉ែត្រ៧៨និង៧៩ ស្ថិតក្នុងភូមិអណ្ដូងជ្រៃ ឃុំអណ្ដូងស្នាយ ស្រុករលាប្អៀរ។
សមត្ថកិច្ចនគរបាលចរាចរណ៍ស្រុករលាប្អៀរបាននិយាយថា ជនរងគ្រោះមានឈ្មោះ ជា សារ៉េត អាយុ៤៥ឆ្នាំ មានទីលំនៅភូមិពោធិ ឃុំពោធិ ស្រុកកំពង់លែង។ មុនពេលកើតហេតុជនរងគ្រោះបានជិះម៉ូតូម៉ាកសង់កូរ៉េ ពណ៌ក្រហមគ្មានស្លាកលេខ ក្នុងដំណើរពីជើងទៅត្បូង ក្នុងភាពស្រវឹង ស្រាប់តែមកដល់ចំណុចកើតហេតុបានរ៉េចង្កូតទៅស្តាំឆ្វេងដៃ ស្របពេលជាមួយគ្នានោះមានរថយន្តក្រុងមួយគ្រឿងពាក់ស្លាកលេខភ្នំពេញ 3B. 8673 បើកបរមកពីត្បូងទៅជើងក្នុងដំណើរច្រាសទិសគ្នា ហើយក៏បានបុកគ្នាតែម្តង បណ្ដាលឲ្យរងរបួសធ្ងន់។
សមត្ថកិច្ចបានបញ្ជាក់ឲ្យដឹងថា សំណាងល្អដែរដោយរថយន្តបានបន្ថយល្បឿន ហើយពេលឃើញម៉ូតូបើកសំដៅមករកខ្លួនបែបនេះ អ្នកបើករថយន្តក៏ព្យាយាមជាន់ហ្វ្រាំងទាំងបង្ខំឈប់ នៅតែម៉ូតូមកបុករថយន្តពេញទំហឹងតែម្តង បណ្ដាលឲ្យអ្នកជិះម៉ូតូរងរបួសធ្ងន់ ត្រូវបានគេដឹកទៅសង្គ្រោះនៅមន្ទីរពេទ្យខេត្ត។
ក្រោយពេលកើតហេតុអ្នកបើករថយន្តបានរត់គេចខ្លួនបាត់ ចំណែកមធ្យោបាយទាំង២គ្រឿងត្រូវបាសមត្ថកិច្ចនគរបាលយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តដើម្បីកសាងសំណុំរឿងដោះស្រាយតាមផ្លូវច្បាប់៕
( ឈៀង ថារិទ្ធ )
0 Comments