កំពង់ឆ្នាំង ៖យុវជន២នាក់បានរងរបួសធ្ងន់នៅក្នុងហេតុការណ៍គ្រោះថ្នាក់ចរាចរណ៍មួយដែលម៉ូតូបានបើកជែងរថយន្តមួយ ហើយទៅបុករថយន្តមួយមកពីមុខទៀត។ ហេតុការណ៍នេះបានកើតឡើងនៅវេលាម៉ោង១និង៤៥នាទីរសៀល ថ្ងៃទី៤ ខែកុម្ភៈ ឆ្នាំ២០១៥ នៅលើជាតិលេខ៥ចន្លោះបង្គោលគីឡូម៉ែត្រលេខ៤០ និង៤១ ស្ថិតក្នុងភូមិពោធិរិទ្ធិក្រៃ ឃុំស្វាយ ស្រុកសាមគ្គីមានជ័យ។
សមត្ថកិច្ចនៅកន្លែងកើតហេតុបាននិយាយឲ្យដឹងថា បុរសដែលរងរបួសធ្ងន់ខាងលើមានឈ្មោះ អូនពួយ អាយុ២៣ឆ្នាំ និងម្នាក់ទៀតមិនត្រូវបានគេស្គាល់ឈ្មោះនោះឡើយ ពួកគេជិះម៉ូតូម៉ាកហុងដាសេ១២៥សេរី២០១២ ពណ៌ខ្មៅ ពាក់ស្លាកលេខកំពង់ឆ្នាំង1D.0132 ជិះក្នុងទិសដៅពីជើងទៅត្បូង។ ដោយឡែករថយន្តម៉ាកហ៊ីយ៉ាន់ដាយ ពណ៌ខៀវ២តោនកន្លះ ពាក់ស្លាកលេខPP.3A9377 បានបើកពីត្បូងទៅជើងបញ្ច្រាសទិសគ្នា។
អ្នកដែលបានឃើញហេតុការណ៍នេះបានឲ្យដឹងថា នៅមុនពេលកើតហេតុគេឃើញយុវជន២នាក់ខាងលើជិះម៉ូតូក្នុងល្បឿនយ៉ាងលឿន ដោយបើកជែងរថយន្តមួយពីមុខហើយបានជ្រុលទៅបុកនិងរថយន្តមួយទៀតមកពីមុខដែលនៅក្នុងចំណែកផ្លូវម្ខាង បណ្ដាលឲ្យយរងរបួសធ្ងន់ទាំង២នាក់តែម្តង ចំណែកម៉ូតូបានខូចខាងមុខទាំងស្រុង។
ក្រោយពេលកើតហេតុជនរងគ្រោះត្រូវបានសមត្ថកិច្ចហៅរថយន្តដឹកយកទៅសង្គ្រោះបន្ទាន់នៅមន្ទីរពេទ្យបង្អែកស្រុក ដោយឡែកម្ចាស់រថយន្តបានចុះរត់គេចខ្លួនបានបន្សល់ទុករថយន្តចោលនៅកន្លែងកើតហេតុ។ ករណីនេះសមត្ថកិច្ចនគរបាលចរាចរណ៍ស្រុកបានចុះដល់កន្លែងកើតហេតុធ្វើការវាស់វែងតាមបច្ចេកទេស រួចនាំបានយករថយន្តនិងម៉ូតូយកមករក្សាទុកនៅប៉ុស្តិ៍នគរបាលរដ្ឋបាលស្វាយដើម្បីដោះស្រាយតាមនីតិវិធី៕
ឈៀង ថារិទ្ធ
0 Comments