មជ្ឈដ្ឋានអ្នកគាំទ្រដែលនិយម តាមដានសង្គមសិល្បៈបានលើកឡើងស្រដៀងគ្នាថា ទោះបីជាពេលនេះ លោក ខាត់ ជេមន៍ កំពុងតែជ្រកក្រោមទ្រនំដំបូលរបស់ផលិតកម្មល្បីឈ្មោះសាន់ដេក៏ពិត មែន ប៉ុន្តែកំណើននៃការចេញបទចម្រៀង គឺហាក់ដូចជាមានភាពរង្វើល គឺផ្ទុយដាច់គ្នាស្រឡះពីតារាចម្រៀងប្រុស-ស្រី ផ្សេងទៀតនៅក្នុងផលិតកម្មសាន់ដេ ដែលតែងមានបទចម្រៀងចេញជាហែហូរដូចជា ៖ តារាចម្រៀង ខេមរៈ សិរីមន្ត និង ឆាយ វិរៈយុទ្ធ ជាដើម។
មជ្ឈដ្ឋានខាងក្រៅមួយចំនួនបាន មើលឃើញថា អតីតម្ចាស់បទរបាំចងស្នេហ៍ លោក ខាត់ ជេមន៍ ខណៈនេះហាក់ដូចជាពុំទាន់ទាញនូវប្រជាប្រិយភាពរបស់លោកបានមកវិញ នៅឡើយទេ បន្ទាប់ពីបាត់បង់ឱកាសមួយរយៈក្នុងការបញ្ចេញបទចម្រៀង។ ម្យ៉ាងទៀតពេលនេះ តារាចម្រៀង ខាត់ ជេមន៍ ក៏នៅមិនទាន់លេចមុខលេចមាត់ដូចកាលពីនៅផលិតកម្មចាស់នោះដែរ។
គេនៅចាំបានថា តារាចម្រៀង ខាត់ ជេមន៍ កាលពីប៉ុន្មានឆ្នាំមុន មិនថាឡើយយុវវ័យនោះទេសូម្បីតែក្មេងតូចៗក៏ស្គាល់ និងបានគាំទ្រច្រើនគួរសមផងដែរ។
មិនតែប៉ុណ្ណោះ លោក ជេមន៍ ក៏ទទួលបានការកោតសរសើរផងដែរពីសំណាក់ទស្សនិកជនដោយបានផ្ដល់ងារជា កំពូលតារាសម្លេងល្អចម្រៀងបានពីរោះទៀតផង។
ប៉ុន្តែផ្ទុយពីនេះ ក្រោយទទួលបានភាពល្បីល្បាញក្នុងអាជីពអ្នកចម្រៀងមិនទាន់បានយូរ ប៉ុន្មានផង ក៏មានដំណឹងអាក្រក់ចេញមកថា ផលិតកម្មឆ្នាំងបាយ រ៉ក ប្រកាសបិទទ្វារផ្អាកផលិតបទ ចម្រៀងបន្តទៀត ជាហេតុនាំឲ្យតារាប្រុសរូបនេះគាំងដំណើរការចម្រៀងមួយសន្ទុះធំ ទម្រាំនឹងរកបានផលិតកម្មថ្មីចូលជ្រកវិញនោះ។
ទោះបីជាយ៉ាងណាក្តី គេមិនទាន់អាចទស្សន៍ទាយបានទេថា តើ ខាត់ ជេមន៍ អាចស្តាបានប្រ ជាប្រិយភាពកម្រិតណាមកវិញនោះទេ ខណៈដែលលោកកំពុងតែឈជើងនៅជាមួយផលិតកម្មសាន់ដេ ដែលជាក្រុមហ៊ុនធំ មានគ្រឹះរឹងមាំ និងប្រជុំទៅដោយតារាល្បីដូចជា ៖ លោក ខេមរៈ សិរីមន្ត, ឆាយ វីរៈយុទ្ធ ,កែវ វាសនា និងតារាចម្រៀង នីកូ ….។
លោក ខាត់ ជេមន៍ ជាតារាចម្រៀងមួយដួងដែលធ្លាប់ទទួលបានការគាំទ្រ និងមានប្រជាប្រិយភាពនៅក្នុងវិស័យសិល្បៈ តាមរយៈការច្រៀងនៅក្នុងផលិតកម្មរ៉កនាពេលកន្លងមក។ ហើយអំឡុងពេលនេះ លោកបានប្រែខ្លួនមកចូលនៅក្នុងផលិតកម្មសាន់ដេដែលជាផលិតកម្មមួយ កំពុងមានឈ្មោះល្បី និងប្រមូលផ្ដុំដោយតារាល្បីៗប្រុស-ស្រីឯទៀត៕
0 Comments