ភ្នំពេញ ៖
បន្ទាប់ពីមានបណ្ដាញសារព័ត៌មានក្នុងស្រុកមួយចំនួនបានធ្វើការ
ចុះផ្សាយជុំវិញរឿងរ៉ាវជីវិតស្នេហាឯកជនរបស់តារាសម្ដែង
និងជាពិធីការិនីកញ្ញា គង់ វង្សយ៉ាទី
ដោយបានដាក់ការសង្ស័យលើរូបនាងថា
បានលួចលាក់សាងសម្ពន្ធភាពស្នេហ៍ជាមួយបុរសវ័យជាង៤០ឆ្នាំម្នាក់មាន
ងារជាមន្ត្រីនៅក្នុងក្រសួងមហាផ្ទៃនោះ
ឥឡូវត្រូវបានអ្នកម្ដាយរបស់តារាសម្ដែង គង់ វង្សយ៉ាទី គឺអ្នកស្រី
ចរិយា ចេញមុខមកបំភ្លឺបញ្ជាក់ប្រាប់ពីការពិត។
ជួបជាមួយកម្ពុជាថ្មីតាមទូរស័ព្ទ
នៅរសៀលថ្ងៃទី២៣ ខែមិថុនា ឆ្នាំ២០១៥នេះ អ្នកស្រី ចរិយា
ត្រូវជាម្ដាយរបស់ពិធីការិនីវ័យក្មេងប្រចាំស្ថានីយទូរទស្សន៍
ប៉ុស្តិ៍CTN គង់ វង្សយ៉ាទី
បាននិយាយរៀបរាប់ប្រាប់ថា កូនអ៊ុំ យ៉ាទី
មិនដែលធ្លាប់មានទំនាក់ទំនងស្នេហាឬមួយក៏មានបុរសណាម្នាក់មកចាំ
ជួយឧបត្ថម្ភទេ គឺអត់មានតែម្ដង។ ចំណែករឿងគេសង្ស័យថា យ៉ាទី
មានបុរសអ្នកធ្វើការងារនៅក្រសួងមហាផ្ទៃតាមស្រលាញ់
និងតែងមកចាំទទួលយកចេញទៅក្រៅញ៉ាំអាហារជាមួយគ្នានោះក៏គ្មានដែរ។
អ្នកស្រី ចរិយា បាននិយាយដោយបានសម្ដែងអារម្មណ៍បែបភ្ញាក់ផ្អើលទៀតថា ពុទ្ធោ..! ក្មួយ
ហើយបុរសម្នាក់ដែលគេយល់ច្រឡំនេះ គឺជាប៉ារបស់យ៉ាទី កូនអ៊ុំទេ
ព្រោះប្ដីខ្ញុំ គាត់ធ្វើការនៅក្រសួងមហាផ្ទៃ ហើយឪពុក-កូនពីរនាក់នេះឧស្សាហជិះឡានទៅណាមកណាជាមួយគ្នាណាស់ដោយពេលខ្លះគាត់ក៏ធ្លាប់ជូន យ៉ាទី ទៅកន្លែងធ្វើការផងដែរ។
អ្នកស្រីម្ដាយរបស់តារាសម្ដែង គង់
វង្សយ៉ាទី បានបញ្ជាក់ថា នេះគ្រាន់តែជាការយល់ច្រឡំតែប៉ុណ្ណោះ
ហើយបើមិនជឿទេ អាចតាមដានបាន។ ម្យ៉ាងទៀត យ៉ាទី
ក៏មិនដែលចេញដើរទៅណាមកណាតែម្នាក់ឯងដែរ
គឺគ្រប់ពេលតែងមានវត្តមានអ្នកស្រីទៅជាមួយជានិច្ច
មិនថាទៅថតសម្ដែងឬមួយចូលរួមកម្មវិធីអីនោះឡើយ។
អ្នកស្រី ចរិយា បានអះអាងថា
អ្នកស្រីហ៊ានស្បថជូន បើសិនជាកូនស្រីរបស់ខ្លួនតារាសម្ដែងកញ្ញា គង់
វង្សយ៉ាទី
ធ្លាប់មានទំនាក់ទំនងស្នេហាជាមួយបុរសដែលគេសង្ស័យខាងលើនោះ
គឺអ្នកស្រីស្បថឲ្យស្លាប់ខ្លួនតែម្ដង។
ប៉ុន្តែយ៉ាងណាអ្នកស្រីក៏បានបញ្ជាក់ហើយបញ្ជាក់ទៀតថា
កូនស្រីគាត់កញ្ញា គង់ វង្សយ៉ាទី
គឺពុំធ្លាប់មានចំណងស្នេហាជាមួយបុរសណាម្នាក់ធ្វើការងារនៅ
ក្រសួងមហាផ្ទៃនោះឡើយ។ ចំណែកឯ បុរសម្នាក់ដែលគេសង្ស័យនោះ
គឺត្រូវជាឪពុកនាង។
សូមជម្រាបជូនថា
កាលពីថ្មីៗកន្លងមកនេះ
មានសារព័ត៌មានក្នុងស្រុកមួយចំនួនបានចុះផ្សាយស្រដៀងគ្នា
ដោយបានលើកឡើងថា តារាសម្ដែងកញ្ញា គង់ វង្សយ៉ាទី
កន្លងមកធ្លាប់បង្ហាញភាពស្និទ្ធស្នាលផ្អែមល្ហែមជាមួយបុរសម្នាក់ជា
មន្ត្រីកំពុងបម្រើការងារនៅក្នុងក្រសួងមហាផ្ទៃ។ ជាប្រចាំ បុរសម្នាក់នេះតែងឧស្សាហបើកឡាននាំនាងទៅដើរលំហែកម្សាន្ត និងចូលញ៉ាំអាហារនៅតាមកន្លែងទំនើបៗទៀតផង។
ប៉ុន្តែក្រោយពីមានការចុះផ្សាយ
ព័ត៌មានជុំវិញសាច់រឿងខាងលើនេះ ត្រូវបានម្ដាយតារាសម្ដែង គង់
វង្សយ៉ាទី ចេញមុខបដិសេធន៍ជំនួសកូនស្រីថា
ពុំមែនជាការពិតដូចការលើកឡើងនេះទេ
គឺគ្រាន់តែជាការយល់ច្រឡំប៉ុណ្ណោះ៕
0 Comments