បាត់ដំបង ៖ បុរសម្នាក់ដែលប្រជាពលរដ្ឋបានស្គាល់យ៉ាងច្បាស់ថា ជាជនដែលចូលចិត្តផឹកស្រាស្រវឹងខួបរាល់ថ្ងៃ បានដួលបោកក្បាលរមៀលធ្លាក់ចូលក្នុង អណ្តូងបាតអូរលង់ទឹកស្លាប់ ហើយត្រូវបានគេប្រទះឃើញកាលពីវេលាម៉ោង៦និង៣០នាទីព្រឹក ថ្ងៃទី២៧ខែកក្កដា ឆ្នាំ២០១៥ ត្រង់ចំនុចភូមិថ្នល់បត់ ឃុំអូររំដួលស្រុកភ្នំព្រឹក ខេត្តបាត់ដំបង បន្ទាប់ពីជននេះបានផឹកស្រាឡើងស្រវឹងកាលពីយប់ហើយបានដើរចេញពីវង់ផឹកស៊ីបាត់មួយយប់ទល់ភ្លឺ។
តាមការអះអាងពីប្រជាពលរដ្ឋដែលរស់នៅក្នុងភូមិជាមួយគ្នាបាននិយាយថា ជនរងគ្រោះនេះមានឈ្មោះ ទន់ ប៊ុនធឿន ភេទប្រុស អាយុ៣៧ឆ្នាំ រស់នៅក្បែរចំនុចកើតហេតុខាងលើ ហើយកាលពីយប់ថ្ងៃទី២៦ គឺមានការជួបជុំផឹកស្រាសរហូតដល់ស្រវឹងធ្លាក់ភ្នែក ម្យ៉ាងវិញទៀតបុរសរូបនេះគឺជាជនស្រវឹងខួបគឺផឹកគ្មានថ្ងៃណាស្វាងឡើយ។
ប្រភពដដែលបានបន្តថា នៅពេលចប់កម្មវិធីប្រហែលជាម៉ោងរំលងអធ្រាត្រ ពេលនោះជនរងគ្រោះបានវិលត្រឡប់ទៅផ្ទះទាំងសភាពទ្រេតទ្រោតផង ប៉ុន្តែមិនបានប៉ុន្មាននាទីផងក្រុមគ្រួសារបាននាំគ្នាផ្អើលមកសួររកដោយមិនឃើញជនរងគ្រោះត្រឡប់ទៅផ្ទះ ទើបមានការឆោឡោឡើងដោយ ម្នាក់ៗនាំគ្នាដើររកតាមដុប តាមព្រៃតែទោះបីជាយ៉ាងណា ក៏នៅតែរកមិនឃើញដដែល។
លុះព្រឹកឡើងទើបមានការភ្ញាក់ផ្អើល ដោយសារតែមានគេប្រទះឃើញជនរងគ្រោះដេកស្លាប់នៅក្នុងទឹកអណ្តូង ដែលមានជម្រៅប្រហែល២ម៉ែត្រ គឺជាអណ្តូងដែលប្រជាពលរដ្ឋបានជីកនៅបាតអូរជិតអូរព្រំដែនថៃ ដែលមានចម្ងាយពីភូមិប្រហែល២៥០ម៉ែត្រសម្រាប់យកទឹកប្រើប្រាស់ ទើបនាំគ្នារាយការណ៍ទៅកម្លាំងសមត្ថកិច្ចដើម្បីចុះត្រួតពិនិត្យ។
លោកវរសេនីយ៍ត្រី សារ៉េត វិសេដ្ឋ អធិការរងនគរបាលស្រុកភ្នំព្រឹក បានធ្វើការសន្និដ្ឋានក្រោយពេលពិនិត្យនៅកន្លែងកើតហេតុថា ជនរងគ្រោះអាចមានភាពស្រវឹងខ្លាំងហើយបានដើរទៅដល់មាត់អូរក៏បានរអិលដួលបោកក្បាលទៅនឹងដុំថ្មព្រមទាំងបានរមៀលធ្លាក់ពីមាត់អូរទៅដល់បាតអូរហើយក៏ធ្លាក់ចូលទៅក្នុងអណ្តូងតែម្តង។
ក្រោយពេលធ្វើកោសល្យវិច័យរួចមក សមត្ថកិច្ចបានធ្វើការប្រគល់សពទៅឲ្យក្រុមគ្រួសារដើម្បីនាំយកទៅធ្វើបុណ្យតាមប្រពៃណីហើយ៕
ជនស្រវឹងខួបដើរដួលធ្លាក់ក្នុងអណ្ដូងបាតអូរ ស្លាប់ក្នុងទឹកមួយយប់ទល់ភ្លឺ
0 Comments