*ម៉ន លីហ៊ួរ ជួបជើងថ្មី ម៉ា ចាបចាន់
ប្រដាល់ ៖ សេង ស្រឿន អ្នកប្រដាល់ក្លិបព្រះខ័នរាជ នឹងជួបសងសឹក សុខ សុវណ្ណ អ្នកប្រដាល់ជើងចាស់ក្លិបកងពលតូចលេខ៣១ នាល្ងាចថ្ងៃសុក្រ ទី៣១ ខែកក្កដា ឆ្នាំ២០១៥នេះ នៅលើសង្វៀនបាយ័នស្ទឹងមានជ័យ។
កាលពីជួបគ្នាលើកមុន(២៥មេសា២០១៥) សេង ស្រឿន វាយចាញ់ សុខ សុវណ្ណ ក្នុងលក្ខណៈប្រផឹតប្រផើយតែប៉ុណ្ណោះ ធ្វើឲ្យគេមិនអស់ចិត្តសុំឡើងជួបសងសឹកវិញនៅពេលនេះ។ សេង ស្រឿន ចាញ់នៅក្រោមថ្វីជើងទាត់របស់ សុវណ្ណ និងភាពរហ័សរហួនជាមួយនឹងតិចនិកប្រកួតខ្ពស់ផងដែរ។
សេង ស្រឿន ចង់ឈ្នះ សុខ សុវណ្ណ នោះ គឺមានតែវិធីម្យ៉ាងគត់ គឺត្រូវសម្រុកចូលវាយប្ដូរកែង ទើបអាចមានផ្លូវឈ្នះកើត។ ព្រោះថា បើវាយតាមសម្រួល ឬតាមប្លង់បច្ចេកទេសនោះ គឺមិនអាចទៅរួចជាមួយ សុវណ្ណ នោះឡើយ។
ចាំមើល សេង ស្រឿន អាចយកឈ្នះ សុខ សុវណ្ណ សងសឹកបានវិញឬអត់? សុវណ្ណ ប្រកួតចុងក្រោយនេះ វាយចាញ់អ្នកប្រដាល់ថៃដោយពិន្ទុ ឯការប្រកួតចុងក្រោយរបស់ សេង ស្រឿន វិញ គឺវាយចាញ់ ឆៃ សារ៉ា អ្នកប្រដាល់ក្លិបក្រសួងការពារជាតិ ក្នុងទឹកទី២។ ជាការពិបាកសន្និដ្ឋានដែរចំពោះ សេង ស្រឿន ដែលអាចយកឈ្នះ សុខ សុវណ្ណ នោះ ព្រោះ ស្រឿន វាយចាញ់ទាំង សារ៉ាដែលជាអ្នកប្រដាល់ស្រករក្រោយផងនោះ។
ម៉ន លីហ៊ួរ អ្នកប្រដាល់ក្លិបការិយាល័យទី៥កងទ័ពជើងគោក នឹងត្រូវជួបប្រកួតជាមួយ ម៉ា ចាបចាន់ អ្នកប្រដាល់ជើងថ្មីមកពីក្លិបអន្លង់វែង ខេត្តឧត្តរមានជ័យ។ ម៉ា ចាបចាន់នេះ មិនដែលឮឈ្មោះ និងមិនដែលស្គាល់មុខម្ដងណាឡើយ ដោយសារគេមិនដែលឡើងមកប្រកួតនៅភ្នំពេញនាពេលកន្លងមក។
ទោះជាយ៉ាងណា ម៉ន លីហ៊ួរ ដែលជាជើងឯកខ្សែក្រវាត់គូបូតា មិនអាចមើលស្រាលចំពោះអ្នកប្រដាល់ចំណូលថ្មី ម៉ា ចាបចាន់ នេះបានឡើយ ដោយសារថា ចាប់ចាន់ តាមការឲ្យដឹងនោះ គឺគេវាយមានផ្លែល្អដែរ។
លីហ៊ួរ ប្រកួតចុងក្រោយនេះ គេវាយឈ្នះ ជ័យ វណ្ណះ ក្លិបឃ្លាំងមឿងកីឡាខេត្តពោធិ៍សាត់ដោយពិន្ទុ។ ចំណែក ម៉ា ចាបចាន់ មិនមានកំណត់ត្រាប្រកួតឲ្យដឹងនោះទេ។ ចាំមើលការជួបគ្នាលើកដំបូងនេះ តើនរណាជាអ្នកឈ្នះនោះ?
ប៊ី ចាន់ណា អ្នកប្រដាល់ក្លិបព្រះខ័នរាជ នឹងជួបប្រកួតជាមួយ ចាន់ ឆាយម៉ៅ អ្នកប្រដាល់ក្លិបនិរោធមានជ័យ ដោយជួបក្នុងទម្ងន់៦៣,៥០០គីឡូក្រាម។ អ្នកទាំងពីរនាក់នេះ ពុំធ្លាប់ជួបគ្នាទេពីមុនមក។ រវាងពួកគេពីរនាក់នេះ តាមការកត់សម្គាល់នោះ ប៊ី ចាន់ណា ប្រហែលជាមិនអាចឈ្នះ ឆាយម៉ៅ នោះទេ?
ចាន់ ឆាយម៉ៅ ជាជើងខ្លាំងមួយរូបដែរ។ ការប្រកួតចុងក្រោយរបស់គេ គឺវាយឈ្នះ ដេត សីហា ក្លិបកុមារទេពមានរិទ្ធក្នុងទឹកទី៣។ ចំណែកឯការប្រកួតចុងក្រោយរបស់ ប៊ី ចាន់ណា វិញ គេប្រកួតឈ្នះ ពុទ្ធ សុជាតិ ក្លិបពុទ្ធសេរីវង្សកីឡាដោយពិន្ទុ។
ចៅ រស់ អ្នកប្រដាល់ក្លិបសុភានូមានជ័យ នឹងជួបប្រកួតជាមួយ ចាន់ សាន់ អ្នកប្រដាល់ក្លិបនិរោធមានជ័យ។ អ្នកប្រដាល់ពីរនាក់នេះ មិនធ្លាប់ជួបគ្នាទេកន្លងមក។ ចៅ រស់ ជាអ្នកប្រដាល់ដែលប្រកួតមិនចេះខ្លាចញញើតនោះទេ។ ដូច្នេះលើកនេះ ចាន់ សាន់ ដែលជាអ្នកប្រដាល់ជើងថ្មីនោះ មិនដឹងថាអាចទៅរួច ឬមិនរួចជាមួយ ចៅ រស់ នោះឡើយ៕
សេង ស្រឿន ជួបសងសឹក សុខ សុវណ្ណ លើសង្វៀនស្ទឹងមានជ័យ
0 Comments