ភ្នំពេញ ៖ អតីតពិធីការិនីធ្លាប់មានប្រជាប្រិយភាព និងកេរ្តិ៍ឈ្មោះលេចធ្លោនៅក្នុងកម្មវិធី”A1 concert”កញ្ញា តេង លក្ខិណា ដែលត្រូវបានរសាត់ខ្លួនមកទើរក្រោមដំបូលរបស់ផលិតកម្មល្បីឈ្មោះគួរសមM និងត្រូវប៉ះជាមួយតារាប្រុស-ស្រីល្បីៗដែលជាជើងខ្លាំងជាច្រើនដួងមកនោះ ត្រូវបានមហាជនដែលនិយមតាមដានវិស័យសិល្បៈបាននាំគ្នាលើកឡើងថា តេង លក្ខិណា ពិតជាពិបាកក្នុងការប្រជែងដណ្ដើមយកភាពលេចធ្លោដូចកាលពីនៅធ្វើពិធីការិនីណាស់។
កញ្ញា តេង លក្ខិណា ជាតារាស្រីមួយដូងដែលធ្លាប់ទទួលបានភាពលេចធ្លោកាលពីនាងឈរជើងនៅទូរទស្សន៍ប៉ុស្តិ៍CTN ក្នុងកម្មវិធី”A1concert”ហើយកាលនោះ នាងក៏ជាតារាសម្ដែងកំពូលដែលឈានមុខក្នុងជូរតារាប្រុស-ស្រីជាច្រើននាក់ផ្សេងទៀតផងដែរ។ ប៉ុន្តែខណៈដែលកេរ្តិ៍ឈ្មោះ និងការគាំទ្រកំពុងតែមានសន្ទុះឈានឡើងនោះ ក៏ស្រាប់តែនាងប្រកាសផ្អាកពីសិល្បៈមួយរយៈដើម្បីយកពេលទៅបើកមុខជំនួញផ្ទាល់ខ្លួន ទើបធ្វើឱ្យកេរ្តិ៍ឈ្មោះរបស់នាងធ្លាក់ចុះទៅវិញ គួរឲ្យស្តាយផងដែរ។
ក្រោយពីកញ្ញា តេង លក្ខិណា បានផ្ដាច់ខ្លួនរើបង្វេចចាកចេញពីសិល្បៈអស់មួយរយៈធំមកនោះ នាងប្រកាសចូលសិល្បៈជាថ្មី ហើយក៏មានឱកាសធ្វើជាតារាចម្រៀងចូលទៅជ្រកក្រោមដំបូលផលិតកម្មM ដើម្បីរកឱកាសស្តារឡើងវិញនូវកេរ្តិ៍ឈ្មោះល្បី និងឆក់យកប្រជាប្រិយភាពពីទស្សនិកជនមកវិញ តែអ្វីដែលមហាជនមើលឃើញនោះ គឺនាងត្រូវប្រឈមមុខជាខ្លាំងក្នុងការប្រជែងជាមួយតារាជើងចាស់ដែលល្បីៗឈ្មោះនៅទីនោះ។
ក្រុមអ្នកតាមដានរឿងរ៉ាវរបស់តារាល្បីៗបានសង្កេតឃើញថា អតីតតារាសម្ដែង និងពិធីការិនីធ្លាប់លេចធ្លោនៅក្នុងវិស័យសិល្បៈកាលពីប៉ុន្មានឆ្នាំមុន នាង តេង លក្ខិណា ក្រោយពីផ្ដាច់ខ្លួនផ្អាកពីសិល្បៈមួយខ្យល់ធំហើយមកជ្រកក្រោមទ្រនំថ្មីMយ៉ាងណាយ៉ាងក្តី ប៉ុន្តែរហូតមកដល់ពេលនេះ គេនៅមិនទាន់ឃើញនាងស្តារបានប្រជាប្រិយភាពមកវិញនៅឡើយទេ ខណៈថ្មីៗនេះ នាងទើបទទួលរងនូវការរិះគន់រឿងច្រៀងមិនពីរោះផងដែរនោះ។
គួរបញ្ជាក់ថា រហូតមកទល់ពេលនេះ គឺមានរយៈពេលជាង១ឆ្នាំមកហើយដែលអតីតពិធីការិនី និងជាតារាសម្ដែងសំឡេងស្រទន់សាច់.ស ម៉ដ្ឋ រលោង កញ្ញា តេង លក្ខិណា បានវិវត្តន៍ខ្លួន ទៅជាតារាចម្រៀងជ្រកក្រោមដំបូងផលិតកម្ម M ។ ប៉ុន្តែទោះបីជាយ៉ាងណា សន្ទុះកេរ្តិ៍ឈ្មោះ និងប្រជាប្រិយភាពរបស់នាង ហាក់គ្មានភាពលេចធ្លោទាល់តែសោះ ផ្ទុយទៅវិញនាងបែរជាកាន់តែមាន ភាពស្ងប់ស្ងាត់ជាងមុនទៅទៀត ខណៈដែលការរិះគន់មានកាន់តែច្រើន។
កម្ពុជាថ្មី បានព្យាយាមភ្ជាប់ទូរស័ព្ទទំនាក់ទំនងទៅកាន់អតីតតារាសម្ដែង និងជាតារាចម្រៀងរបស់ផលិតកម្ម M កញ្ញា តេង លក្ខិណា ជាច្រើនដង ដើម្បីសួរនាំជុំវិញរឿងនេះដែរ ប៉ុន្តែលេខទូរស័ព្ទប្រព័ន្ធ០១៥ របស់នាងដែលធ្លាប់ប្រើមិនអាចទាក់ទងបានទេ នៅព្រឹកថ្ងៃទី២៥ ខែកក្កដា ឆ្នាំ ២០១៥នេះ៕
តេង លក្ខិណា បាត់មុខទៅណាហើយ ក្រោយពីរងការរិះគន់
0 Comments