តាមរយៈប្រព័ន្ធទូរស័ព្ទកាលពីព្រឹកមិញនេះ ស្ត្រីម្នាក់ឈ្មោះ ភារ៉ាត់ ដែលអះអាងថាជាម្ដាយរបស់តារាសិល្បៈនាង ខៀវ សុខារ៉ាវី បានឲ្យដឹងថា អាវី កូនស្រីរបស់គាត់ ពិតជាបានផ្អាកពីការងារសិល្បៈមែន ដោយមិនមានការដាក់បម្រាមពីនរណាម្នាក់នោះឡើយ ពោល ដើម្បីនៅមើលថែរូបគាត់ជាម្តាយចាស់ជរា ណាមួយដោយមានការទទូចស្នើសុំពីបងប្អូននៅអាមេរិកឲ្យនាងឈប់ពីសិល្បៈផងនោះ នាងក៏សម្រេចចិត្តផ្អាកមួយរយៈសិន ពីព្រោះនៅស្រុកខ្មែរគាត់រស់នៅតែពីរនាក់នឹងកូនស្រីគាត់។ អ្នកស្រី ភារ៉ាត់ បញ្ជាក់ថា នេះគឺជាមូលហេតុដែលកូនស្រីគាត់ អាវី ផ្ដាច់ខ្លួនពីអាជីពសិល្បៈសូមមហាជនកុំមានការយល់ច្រឡំអំពីរឿងផ្សេង។
ម្ដាយ ខៀវ សុខារ៉ាវី និយាយទៀតថា គាត់ក៏មិនចង់ឲ្យកូនស្រីសស្រាក់សស្រាំនឹងការងារសិល្បៈនោះទេ ស្របពេលដែលមុខជំនួញក្នុងដៃក៏រវល់ គឺមិនចង់ឃើញកូនស្រីនឿយហត់ងាកមកមើលថែគាត់ផង មើលការខុសត្រូវហាងផង និងការងារសិល្បៈផង ដូច្នេះ បើឈប់បានក៏ឈប់ទៅ ហើយណាមួយគាត់ក៏មិនចង់ឮការរិះគន់ ក៏ដូចជារឿងអាស្រូវមកលើជីវិតកូនស្រីគាត់នោះដែរ។ ដោយឡែក ពាក់ព័ន្ធបញ្ហាការបែកបាក់គ្រួសាររបស់កូនស្រី អ្នកស្រីមិនបានបញ្ជាក់លម្អិតទេដោយអ្នកស្រីបានឆ្លើយតបនឹង«កម្ពុជាថ្មី»ថា រាល់ព័ត៌មានដែលកើតឡើងចំពោះអ្នកសិល្បៈដូចកូនអ្នកស្រី គឺជារឿងធម្មតាទៅហើយ ដោយអ្នកស្រីក៏មិនប្រកាន់ខឹងអ្វីដែរ ហើយសង្ឃឹមថា ការផ្អាកពីសិល្បៈរបស់ អាវី កូនអ្នកស្រីលើកនេះ នឹងមិនមានពាក្យចចាមអារ៉ាមនោះឡើយ៕
ខៀវ សុខារ៉ាវី ដកឃ្លាពីអាជីពសិល្បៈ សង្ស័យមានអ្នកដាក់បម្រាម
0 Comments