អង្គការកុមារ Unicef បានឲ្យដឹងនៅក្នុងសន្និសីទកាសែតមួយ នាទីក្រុងហ្សឺណែវ កាលពីថ្ងៃសុក្រថា កុមារចំនួន៣៦៥នាក់ ត្រូវបានសម្លាប់ និង៤៨៤នាក់បានរងរបួស នៅក្នុងប្រទេសយេមែន ចាប់តាំងពីមានយុទ្ធនាការវាយប្រហារតាមច្រកអាកាសដឹកនាំដោយអារ៉ាប៊ីសាអ៊ូឌីត និងកងកម្លាំងគាំទ្រដោយរដ្ឋាភិបាលដើម្បីប្រឆាំងជាមួយពួកឧទ្ទាមហ៊ូធី ចាប់តាំងពីថ្ងៃទី២៦ ខែមីនារហូតមក។
លោកគ្រីស្តូប ប៊ូលីរ៉ាក គឺជាអ្នកនាំពាក្យរបស់ Unicef បាននិយាយប្រាប់ក្រុមអ្នកសារព័ត៌មានថា ចន្លោះពីថ្ងៃទី២៦ ខែមីនា និង១៦ ខែកក្កដា មានកុមារចំនួន៣៦៥នាក់ បានបាត់បង់ជីវិត ហើយកុមារ៤៨៤នាក់ទៀត បានរងរបួស។
គួរបញ្ជាក់ថា រដ្ឋដែលក្រីក្របំផុតនៅក្នុងតំបន់ឧបទ្វីបអារ៉ាប់មួយនេះ បានជួបប្រទះភាពរំជើបរំជួលច្រើនឆ្នាំមកហើយ ប៉ុន្តែក្រោយសង្គ្រាមប៉ុន្មានខែរវាងក្រុមសកម្មប្រយុទ្ធហ៊ូធី និងកងកម្លាំងគាំទ្រដោយរដ្ឋាភិបាល ប្រជាជន និងកុមារយេមែន បានប្រឈមនឹងស្ថានភាពដ៏គ្រោះថ្នាក់បំផុត ហើយបើយោងតាមសេចក្តីរាយការណ៍ពីអង្គការ Unicef បានឲ្យដឹងថា កុមារប្រហែល៥សែននាក់ កំពុងជួបកង្វះអាហាររូបត្ថម្ភ ក្នុងនោះនោះកុមារជាង១.៨លាននាក់ មិនបានចូលរៀនក្នុងរយៈពេលជាង២ខែកន្លងមកនេះ។
លោកគ្រីស្តូប បានបញ្ជាក់ទៀតថា នៅមុនពេលជម្លោះ អត្រាចុះឈ្មោះចូលរៀនមានចំនួន៧៩ភាគរយនៅក្នុងប្រទេសយេមែន ខណៈដែលកុមារគ្រប់អាយុចូលរៀនចំនួន២លាននាក់ អត់បានចូលរៀន ដោយសារតែភាពក្រីក្រ ការប្រកាន់ជាតិសាសន៍ និងជម្លោះ។ ដូច្នេះ ហើយអង្គការរបស់លោក ទទូចសុំឲ្យភាគីទាំងអស់គួរតែគោរពដល់សុវត្ថិភាពសាលារៀនដើម្បីអាចផ្ដល់ឱកាសដល់កុមារបានរៀនសូត្រនឹងគេ៕
កុមារចំនួន៣៦៥នាក់បាត់បង់ជីវិត និង៤៨៤នាក់រងរបួសក្នុងជម្លោះនៅយេមែន
0 Comments