សៀមរាប ៖ ក្នុងដំណើរបំពេញបេសកកម្មរបស់លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និង លោក ឃឹម ប៊ុនសុង អភិបាលនៃគណៈអភិបាលខេត្ត រួមដំណើរដោយលោក អស់លោក លោកស្រីជារដ្ឋលេខាធិការ ថ្នាក់ដឹកនាំមន្ទីរ អាជ្ញាធរស្រុក បានជួបធ្វើការសំណេះសំណាលជាមួយបងប្អូនប្រជាសហគមន៍ ទាំងបីភូមិ នៃឃុំកំពង់ភ្លុក ស្រុក ប្រាសាទបាគង ខេត្តសៀមរាប កាលពីរសៀលថ្ងៃទី ២០ ខែ កក្កដា ឆ្នាំ២០១៥។
ក្នុងកិច្ចស្វាគមន៍របស់លោកភូសំអាតអភិបាលនៃគណៈអភិបាលស្រុកប្រាសាទបាគង បានបញ្ជាក់អំពីស្ថានភាពសន្តិសុខនិងជីវភាពរស់នៅរបស់ប្រជាជនក្នុងឃុំកំពុងភ្លុក ដែលមានមុខរបរជាប្រជានេសាទរួមនឹងការដឹកជញ្ជូនភ្ញៀវទេសចរណ៍ចូលទស្សនាកម្សាន្ត ក្នុងតំបន់ទេសចរណ៍ធម្មជាតិកំពុងភ្លុក។
មានប្រសាសន៍នោះដែរលោកឃឹមប៊ុនសុងក៏បានគូសបញ្ជាក់ថា ការងារអភិវឌ្ឍន៍តំបន់រមណីយដ្ឋានធម្មជាតិនេះមានការអភិវឌ្ឍន៍យឺតយ៉ាវកន្លងមក។ លោកបានបន្តទៀតថា ចំពោះករណីនេះប្រមុខរាជរដ្ឋាភិបាលក៏ដូចអាជ្ញាធរខេត្តក៏បានគិតគូរយកចិត្តទុកដាក់ ពីផលប្រយោជន៍របស់ប្រជាជននៅក្នុងសហគមន៍បានស្វែងរកដៃគូ វិនិយោគក្នុងកិច្ចអភិវឌ្ឍន៍នៅក្នុងមូលដ្ឋានកំពង់ភ្លុកនេះ។ម្យ៉ាងទៀតយើងត្រូវបានទទួលការវិនិយោគរបស់ក្រុម ហ៊ុនមួយនៅក្នុងតំបន់កំពុងភ្លុកនេះហើយដោយមានការប្រទាញប្រទង់របស់ក្រុមហ៊ុនវិនិយោគពីរ ដោយពុំមានផែនការអភិវឌ្ឍន៍ឲ្យច្បាស់លាស់របស់ខ្លួន បានធ្វើឲ្យមានការយឺតយ៉ាវយ៉ាងនេះ។ លោកឃឹម ប៊ុនសុង ក៏បានធ្វើការពន្យល់ណែនាំដល់បងប្អូនប្រជាសហគមន៍ទាំងបី ដើម្បីឲ្យមានទេសចរណ៍ចូលមកទស្សនាកម្សាន្តនៅក្នុងតំបន់របស់ខ្លួនយើងត្រូវរក្សាឲ្យបាននូវសន្តិសុខ សណ្តាប់ធ្នាប់ និង ធ្វើបរិស្ថាន អនាម័យក្នុងភូមិ ឃុំរបស់ខ្លួន សំខាន់ការ ចូលរួមអនុវត្តគោលនយោបាយភូមិឃុំ មានសុវត្ថិភាព។
ម្យ៉ាងទៀតចំពោះបងប្អូនដែលមានបំណងចង់ចូលក្នុងសមាគមកាណូតទេសចរណ៍ សូមអញ្ជើញមកទំនាក់ទំនងជាមួយប្រធានសមាគម ដើម្បីពិនិត្យមើលពីលក្ខណៈ សណ្ឋានភាពទូក កាណូត តើធានាសុវត្ថិភាពក្នុងការដឹកជញ្ជូនភ្ញៀវទស្សនាកម្សាន្តហើយក៏មិនបានប្រកាន់នូវពូជសាសន៍ និន្នាការនយោបាយអ្វីឡើយ។
ក្នុងការសំណេះសំណាលនោះ លោកបណ្ឌិតថោងខុនក៏បានគូសបញ្ជាក់ថា អេកូទេសចរណ៍នៅតំបន់កំពុង ភ្លុក សម្បូរទៅជីវៈចម្រុះ ក្នុងការទាក់ទាញដល់ភ្ញៀវទេសចរណ៍ចូលមកទស្សនាកម្សាន្ត គួរណាស់តែប្រជាពលរដ្ឋ នៅក្នុងសហគមន៍កំពុងភ្លុក បានទទួលផលជាច្រើនពីវិស័យទេសចរណ៍ ក្នុងការប្រមូលចំណូលប្រចាំថ្ងៃ ។ ក្នុងនោះ លោកបណ្ឌិតក៏បានលើកឡើងផងដែរថា ផលប្រយោជន៍ដែលទទួលបាន តាមរយៈការធ្វើនូវវត្ថុអនុស្សាវរីយ៍ លក់ ជូនដល់ភ្ញៀវ ដោយនៅក្នុងតំបន់បងប្អូន សម្បូរទៅដោយវត្ថុធាតុដើម ដែលងាយស្រួលក្នុងការផលិតរបស់ខ្លួន។
លោកបណ្ឌិត ថោង ខុន ក៏បានលើកឡើងថា ក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី បានផ្តល់គម្រោងផែនការ ស្ថាបនាផ្លូវប្រវែង ១៦គីឡូម៉ែត្រ តភ្ជាប់ពីឃុំរលួស មកឃុំកំពុងភ្លុកដែលធ្វើឡើងដោយក្រសួងអភិវឌ្ឍន៍ជនបទជូនដល់បងប្អូនក្នុងឃុំកំពុងភ្លុកនេះ នៅឆ្នាំ២០១៦ខាងមុខ។ លោកបណ្ឌិតក៏បានលើកឡើងពីសេវាទាំងបួន ក្នុងការបម្រើដល់វិស័យទេសចរណ៍ ដោយកត្តានេះហើយទើបយើងទាមទារនូវអ្នកវិនិយោគក្នុងការចូលរួមអភិវឌ្ឍន៍នៅក្នុងតំបន់នេះ ហើយក៏ជាតំបន់អេកូទេសចរណ៍តាមរយៈការធ្វើសេវាកម្មទេសចរណ៍។ ដើម្បីឲ្យតំបន់កំពុងភ្លុក កាន់តែទាក់ទាញនូវអារម្មណ៍ភ្ញៀវទេសចរណ៍ជាតិអន្តរជាតិចូលមកទស្សនាកម្សាន្ត ដែលជាប្រភពចំណូលមិនចេះរីងស្ងួតរបស់បងប្អូនឃុំកំពុងភ្លុកត្រូវបងប្អូនចូលរួមធ្វើការថែរក្សាបរិស្ថាន អនាម័យក្នុងភូមិសំខាន់បញ្ឈប់ការកាប់ទន្ទ្រានព្រៃលិចទឹកយកដីធ្វើកម្មសិទ្ធិត្រូវនាំគ្នាចូលរួមក្នុង ការអភិរក្សព្រៃលិចទឹកឲ្យបានគង់វង្ស ពីព្រោះជាប្រភពចំណូលរបស់បងប្អូន ក៏ដូចប្រទេសជាតិទាំងមូលផងដែរ៕
ពិធីសំណេះសំណាលជាមួយប្រជាសហគមន៍ឃុំកំពុងភ្លុក
0 Comments