កណ្ដាល ៖ ដីព្រៃលិចទឹករាប់លានហិកតានៅក្នុងទឹកដីខេត្តកណ្តាល ពិសេសតំបន់ព្រៃលិចទឹកនៅតំបន់អតីតឡូត៍នេសាទកំពុងរងការបំផ្លិចបំផ្លាញយ៉ាងរង្គាលពីសំណាក់ពួកឈ្មួញមានប្រាក់ និងមានអំណាចធំៗជាច្រើននាក់ ដែលកំពុងដាក់គ្រឿងចក្រឈូសឆាយហ៊ុមព័ទ្ធលើកជាទំនប់ធ្វើកម្មសិទ្ធិផ្ទាល់ខ្លួន និងកំពុងធ្វើឲ្យរាស្ត្រក្រីក្រជួបការលំបាកក្នុងការប្រកបមុខរបរអាជីពចិញ្ចឹមជីវិតប្រចាំថ្ងៃរបស់ពួកគាត់ ដោយការដើរបេះត្រកួនព្រលិត រាវខ្យង ខ្ចៅ ឬដាក់លបមងសន្ទូចលែងបានដូចពីមុនទៀតហើយ ព្រោះតំបន់បឹងបួទាំងនោះបានក្លាយជាដីកម្មសិទ្ធិផ្ដាច់មុខរបស់ពួកអ្នកមានអំណាច និងមានប្រាក់អស់ទៅហើយនោះ។
ទន្ទឹមនឹងមានសកម្មភាពឈូសឆាយព្រៃលិចទឹក ដែលជាជម្រកត្រីពងកូន ជាទីសម្បត្តិរដ្ឋយ៉ាងអនាធិបតេយ្យបែបនេះ នាពេលកន្លងមក អាជ្ញាធរខេត្តស្រុកមួយចំនួន ហាក់បីដូចជាបណ្ដែតបណ្ដោយឲ្យពួកឈ្មួញទាំងនោះធ្វើសកម្មភាពយ៉ាងអនាធិបតេយ្យបំផុតទំនងជាទួលបាននូវលាភសក្ការៈខ្លះហើយមើលទៅ។
មេឈ្មួញធំៗដែលបានបំពានយកដីបឹងដីរដ្ឋ និងដីរាស្ត្រទាំងនោះត្រូវអ្នកស្រុកស្គាល់ឈ្មោះ មានដូចជា លោកជំទាវ សៀង ចាន់ហេង (ហៅយាយហេង) ប្រធានក្រុមហ៊ុនហេងអភិវឌ្ឍន៍ មានលំនៅដ្ឋានក្រុងតាខ្មៅ គឺបានយកទាំងដីរដ្ឋដីរាស្ត្ររាប់ពាន់ហិកតានៅតំបន់ទំនប់ ៩២‑៩៣‑៩៤ ស្រុកកណ្តាលស្ទឹងចូលមកដីស្រុកស្អាង ចំណុចខាងលិចភ្នំស្អាងក្នុងតំបន់អតីតឡូត៍នេសាទលេខ១ ស្ថិតនៅឃុំស្អាងភ្នំ ព្រំប្រទល់ឃុំអំពៅព្រៃ ស្រុកកណ្តាលស្ទឹង។
លោកជំទាវ កុក អាន (ហៅយាយរឿន) បានទៅព័ទ្ធដីព្រៃលិចទឹកនៅបឹងស្លាបទាអតីតឡូត៍លេខ១ ឃុំក្រាំងយ៉ូវរាប់រយហិកតា។
លោកសុខ រិទ្ធី ជាមន្ត្រីយោធាបានទៅទន្ទ្រានយកដីព្រៃលិចទឹកនៅខាងចុងវត្តប្រាសាទប្រាំបឹងធំស្ថិតក្នុងអតីតឡូត៍លេខ៣ ស្រុកកៀនស្វាយ រាប់រយហិកតា ហើយដីនោះកន្លងមកក៏មានទំនាស់ជាមួយលោកឧកញ៉ាឈន សារណេ និងឈ្មោះ ឈាង ប៉ាក់សួ ផងដែរនាពេលថ្មីៗនេះ។
លោកជុំ ប៊ុនណារ៉ូង លោកវេជ្ជបណ្ឌិតកែវសានបានទៅព័ទ្ធយកដីព្រៃនៅចុងព្រែកប្រសាទប្រាំ ចុងព្រែកតាតិន ចុងព្រែកតាជ័រព្រៃទាហានស៊ៅ ស្ថិតនៅឃុំស្វាយប្រទាល ស្រុកស្អាង រាប់ពាន់ហិកតា។
លោកឧកញ៉ា ឡោក ហួ ធ្វើការនៅព្រឹទ្ធសភាក៏បានដាក់គ្រឿងចក្រជាច្រើនគ្រឿងបំពានយកដីរដ្ឋ ដីរាស្ត្រពីស្រុកកៀនស្វាយធ្លាក់ដល់ដល់ស្រុកលើកដែក ស្រុកកោះធំ រាប់ពាន់ហិកតា។ ដីដែលលោក ឡោក ហួ ព័ទ្ធយក ស្ថិតនៅតំបន់ឡូត៍នេសាទលេខ (៣‑៤‑៥‑៦‑៧)។
ស្ត្រីឈ្មោះច្រេង សៀក (ហៅយាយសៀក) រស់នៅភូមិលេខ៣ ឃុំត្រើយស្លាក៏បានទៅទន្ទ្រានយកដីនៅចំណុចខាងលិចខ្នងអាងយុវជន រាប់រយហកតាផងដែរ។
ឈ្មោះ ហ៊ុន អៀង, ឈ្មោះ ចីម គី ជាមេភូមិលេខ៩ ឃុំត្រើយស្លាក៏បានទៅព័ទ្ធទន្ទ្រានយកដីព្រៃលិចទឹកនៅខាងកើតខ្នងអាងពាមសូ អតីតឡូត៍លេខ៣‑៤ជាច្រើនហិកតាផងដែរ និងឈ្មោះ តាម៉ាប់ ហៅថៅកែហាប់ ផ្ទះនៅផ្សារព្រែកឃ្លោងក៏បានទៅលើកទំនប់ជីកប្រឡាយ តំបន់ប្រឡាយ ៧៥ អតីតឡូត៍លេខ ៣ជាច្រើនហិកតាផងដែរ។
លោកចៅ តុល មេបញ្ជាការរងកងអង្គរក្ស ក៏បានរំលោភយកដីរាប់សិបហិកតានៅតំបន់មុខស្រះ៣៨ទួលរាជា ឃុំពោធិបាន ស្រុកកោះធំ អតីតឡូត៍លេខ ៥‑៦ រួមជាមួយឈ្មោះ នួន សាវីមន្ត្រីយោធាអង្គរក្ស ថ្នាក់ផ្កាយផងដែរ។
ឈ្មោះប៊ុន ច័ន្ទគ្រឹស្នា មន្ត្រីយោធាអង្គរក្ស ថ្នាក់ផ្កាយក៏បានទៅហ៊ុមព័ទ្ធយកដីព្រៃលិចទឹក អតីតឡូត៍លេខ ៤‑៥ ស្ថិតនៅឃុំត្រើយស្លា និងឃុំប្រសាទរាប់រយហិកតា និងកំពុងបញ្ជូនគ្រឿងចក្រជាច្រើនគ្រឿងដើម្បីឈូសឆាយយកដីបន្តទៀត ហើយបច្ចុប្បន្ន កំពុងប្រឈមមុខទំនាស់ជាមួយប្រជាពលរដ្ឋរាប់រយគ្រួសារនៅឃុំប្រាសាទភូមិជ្រោយឫស្សី។
គួរបញ្ជាក់ថា រាល់ដីព្រៃលិចទឹកទាំងអស់ ដែលត្រូវបានធ្លាក់ដល់កណ្តាប់ដៃឈ្មួញធំៗខាងលើនោះ ត្រូវបានគេប្រើគ្រឿងចក្រជីកជាប្រឡាយលើកទំនប់ហ៊ុមព័ទ្ធជុំវិញជិតជុំ រួចធ្វើប៉ុស្តិ៍យាមដាក់កងកម្លាំងប្រដាប់អាវុធ មានទាហាន ប៉េអឹម ប៉ូលិស ប្រដាប់ដោយអាវុធវែងខ្លី បាញ់បោះ យ៉ាងអនាធិបតេយ្យនៅតាមគោលដៅដីនីមួយៗ មិនអនុញ្ញាតឲ្យប្រជាពលរដ្ឋណាម្នាក់ចេញចូលទៅធ្វើការនេសាទ ឬបេះត្រកួនព្រលឹត ឬរាវខ្យងខ្ចៅ ដាក់លបមង សន្ទូច បានដូចពីមុនៗទៀតទេលុះត្រាណាតែបង់ប្រាក់ឲ្យក្រុមអ្នកយាមដីនោះជាមុន ទើបបើកទូកឆ្លងកាត់ឬធ្វើការនេសាទបាន។
ខណៈពួកឈ្មួញធំៗបានធ្វើសកម្មភាព ដណ្ដើមដីបឹង ដីរដ្ឋយកធ្វើកម្មសិទ្ធិរៀងៗខ្លួន យ៉ាងអនាធិបតេយ្យនោះ កន្លងមកថ្មីៗនេះលោកម៉ៅ ភិរុណ ដែលបានឡើងជាចៅហ្វាយខេត្តបានបញ្ជាទៅលោកអភិបាលស្រុកនានាពិសេសជំនាញជលផលខណ្ឌកណ្តាលដើម្បីធ្វើការឃាត់ចាប់គ្រឿងចក្របែបអនាធិបតេយ្យទាំងនោះ។
បើតាមការបញ្ជាក់ពីលោក សេង ធីម ជំនាញផ្នែកជលផលបាសាក់បានឲ្យដឹងថា ចាប់ពីចុងខែឧសភា និងដើមខែមិថុនា ឆ្នាំ២០១៥ នេះកម្លាំងជលផលសហការជាមួយអាជ្ញាធរ ឃុំស្រុក ប៉ូលិស ប៉េអឹមចុះធ្វើការបង្ក្រាបគ្រឿងចក្រមកដល់ថ្ងៃទី១១ ខែមិថុនា ឆ្នាំ២០១៥នេះបានចំនួន២៥គ្រឿងហើយបានរក្សាទុកដើម្បីចាំការពិន័យដោយស្រាយទៅតាមនីតិវិធីច្បាប់។ ក្នុងនោះចាប់នៅស្រុកល្វាឯម អេស្កាវ៉ាទ័រ ចំនួន២គ្រឿងនៅស្រុកកៀនស្វាយអេស្កាវ៉ាទ័រចំនួន៣គ្រឿង នៅស្រុកស្អាងចំនួន៥គ្រឿង និងនៅស្រុកកោះធំ ចំនួន១៣គ្រឿង៕
ពួកឈ្មួញមានប្រាក់ មានអំណាចកំពុងទន្ទ្រានយកដីព្រៃលិចទឹកយ៉ាងអនាធិបតេយ្យ
0 Comments