Ad Code

ស៊ីម៉ាក់ ឈ្នះជាលើកដំបូង បឹងកេត បន្ថែម ៣ ពិន្ទុ បៀលប្រាយ ទ័ព ស្វាយរៀង និង ខេមបូឌានថៃហ្គ័រ បានម្នាក់១ពិន្ទុ


ក្រុមបាល់ទាត់​ចំណូល​ថ្មី​មជ្ឈមណ្ឌល​កំចាត់មីន​ក​ម្ពុ​ជា (ស៊ីម៉ាក់) អា​ចរក​ជ័យជម្នះ​បានជា​លើកដំបូង​ក្នុង​ដើមរដូវ​កាល​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ២០១៥ (Metfone Cambodian League ឬ MCL 2015) នៅក្នុង​សប្ដាហ៍​ប្រកួត​ទី ៧ នេះ ស្របពេល​ក្រុម​បឹងកេត​អង្គរ រកបាន ៣ ពិន្ទុ​បន្ថែម ហើយ​ក្រុម​បៀ​ល​ប្រាយ​យូ​ណាយ​ធី​ត ក្រុម​ក្រសួងការពារជាតិ (ទ័ព) ក្រុម​ស្វាយរៀង​អែ​ហ្វ​ស៊ី និង​ក្រុម​ខេ​ម​បូ​ឌា​ន​ថៃ​ហ្គ័​រ រកបាន​ម្នាក់ ១ ពិន្ទុ​ដូចគ្នា។

សម្រាប់​ក្រុមបាល់ទាត់​ស៊ីម៉ាក់ បាន​យកឈ្នះ​ក្រុម​ម្ចាស់ផ្ទះ វេ​ស្ទើ​ន​ភ្នំពេញ លើ​ទីលាន​ស្មៅ​សិប្ប​និមិត្ត​ម្ដុំ​ខណ្ឌទួលគោក ដោយ​លទ្ធផល ៣ ទល់ ។ នេះ​ជា​ជ័យជម្នះ​របស់​ក្រុម​ចំណូល​ថ្មី​ដែល​ដឹកនាំ​ដោយ​លោកគ្រូ​បង្វឹក មាស សំអឿន ក្រោយ​ប្រកួត​បាន ៦ លើក​កន្លងមក​បាន​ត្រឹម​ស្មើ ៣ លើក និង ចាញ់ ៣ លើក។ ៣ គ្រាប់​របស់​ក្រុម​ស៊ីម៉ាក់ រកបាន​ដោយ​កីឡាករ រុន រ៉ានី, កីឡាករ ជនជាតិ​អាមេរិក Janzen Anthony Robert និង កីឡាករ ផាង ស៊ុន​លី ហើយ ១ គ្រាប់​របស់​វេ​ស្ទើ​ន​ភ្នំពេញ រកបាន​ដោយ​កីឡាករ Matthew Osa។

ចំណែក​ក្រុម​បឹងកេត​អង្គរ បន្ត​ជ័យជម្នះ​ជា​លើក​ទី៦ របស់ខ្លួន ក្រោយ​យកឈ្នះ​ក្រុម​ណាហ្គា​វើ​ល ដោយ​លទ្ធផល ១ ទល់ ០ នៅលើ​ទីលាន​កីឡដ្ឋាន​កងយោធពល​ខេមរភូមិន្ទ (ស្ដា​ត​ចាស់)។ ខ្សែប្រយុទ្ធ សុខ ផេង របស់​ក្រុម​បឹងកេត បា​នរក​គ្រាប់​បាល់​ជ័យជម្នះ​តាំងពី​ក្នុង​តង់​ទី១ មកម្ល៉េះ។ លទ្ធផល​នេះ​បាន​ជួយ​ក្រុម​ដែលមាន​ប្រភព​មកពី​ខេត្តកំពង់ចាម មួយ​នេះ​ឈរ​កំពូល​តារាង​បណ្ដោះអាសន្ន ត្រឹម​សប្ដាហ៍​ទី៧ នេះ។

សម្រាប់​ប្រកួត​រវាង​ក្រុម បៀ​ល​ប្រាយ​យូ​ណា​ធី​ត ជាមួយ​ក្រុម​ក្រសួងការពារជាតិ (ទ័ព) បាន​ត្រឹម​ម្នាក់ ១ ពិន្ទុ ក្រោយ​ប្រកួត​ស្មើគ្នា​ដោយ​លទ្ធផល ០ ទល់ ០ នៅលើ​ទីលាន​មជ្ឈមណ្ឌល​និង​សាលា​បាល់ទាត់​ជាតិ​បាទី ក្នុង​ខេត្តតាកែវ។

ដោយឡែក​គូប្រកួត​ចុងក្រោយ​ដែល​រៀបចំឡើង​នៅ​កីឡដ្ឋាន​ខេត្តស្វាយរៀង ក្រុម​ម្ចាស់ផ្ទះ​ខេត្តស្វាយរៀង បាន​ត្រឹម​ម្នាក់ ១ ពិន្ទុ​ដូចគ្នា ក្រោយ​ប្រកួត​ស្មើគ្នា ២ ទល់ ២ ជាមួយ​ក្រុម​ខេ​ម​បូ​ឌា​ន​ថៃ​ហ្គ័​រ។ កីឡាករ​ជនជាតិ​ជប៉ុន Tani  Reijin និង ប្រធាន​ក្រុម ប្រាក់ មុន្នី​ឧ​ត្ត​ម បា​នរក​គ្រាប់​បាល់​ម្នាក់ ១ គ្រាប់​ឱ្យ​ក្រុម​ស្វាយរៀង​អែ​ហ្វ​ស៊ី ហើយ​កីឡាករ សាំង សុ​ភ័​ក្រ និង កីឡាករ សុខ ចាន់​រស្មី បា​នរក​គ្រាប់​បាល់​ឱ្យ​ក្រុម​ខេ​ម​បូ​ឌា​ន​ថៃ​ហ្គ័​រ៕

MCL-2015-Week-7-Result-Table


ស៊ីម៉ាក់ ឈ្នះជាលើកដំបូង បឹងកេត បន្ថែម ៣ ពិន្ទុ បៀលប្រាយ ទ័ព ស្វាយរៀង និង ខេមបូឌានថៃហ្គ័រ បានម្នាក់១ពិន្ទុ

Post a Comment

0 Comments

Close Menu