សៀមរាប ៖ ស្ត្រីខ្មែរម្នាក់ឈ្មោះហេង សំណាង អាយុ២៩ឆ្នាំ មានទីកំណើតនៅភូមិស្វាយ ឃុំស្វ៊ាង ស្រុកពញាឮ ខេត្តកណ្តាល ដែលត្រូវបានមេខ្យល់នាំយកទៅរៀបការជាមួយបុរសជនជាតិចិននៅខេត្តហ្វូជាន ត្រូវបានបញ្ជូនត្រឡប់មកប្រទេសកម្ពុជាវិញហើយ នៅថ្ងៃទី២៥ ខែកក្កដា ឆ្នាំ២០១៥ តាមជើងយន្តហោះ K6659 ដោយចេញពីទីក្រុងក្វាងចូវ វេលាម៉ោង១៣និង២៥នាទី និងបានមកដល់អាកាសយានដ្ឋានអន្តរជាតិសៀមរាបនៅវេលាម៉ោង១៥រសៀល។ នេះបើតាមការឲ្យដឹងតាមរយៈលិខិតរបស់អគ្គកុងស៊ុលកម្ពុជា ផ្ញើជូនមករដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កម្ពុជា។
ការមកដល់ប្រទេសកំណើតវិញ របស់ស្ត្រីខ្មែររងគ្រោះម្នាក់នេះ ត្រូវបានលោក ជា ហេង នាយរងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋានខេត្តសៀមរាប ទៅទទួលយក និងនាំសាមីជនរងគ្រោះមកកាន់ការិយាល័យ ដើម្បីសាកសួរ និងកសាងសំណុំរឿង បញ្ជូនទៅមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប អនុវត្តតាមនីតិវិធី ដើម្បីឲ្យគ្រួសារជនរងគ្រោះមកទទួលជួបជុំគ្រួសារវិញ។
បើតាមការរៀបរាប់របស់ស្ត្រីរងគ្រោះនោះបានឲ្យដឹងថា ខ្លួនបានចាកចេញពីអាកាសយានដ្ឋានអន្តរជាតិភ្នំពេញប្រទេសកម្ពុជា ទៅកាន់គោលដៅនៅវេលាម៉ោង១២យប់ ថ្ងៃទី០១ ខែសីហា ឆ្នាំ២០១៤។ ដំណើររឿងនេះ ស្រី្តរងគ្រោះបានរាយការណ៍ជូនសមត្ថកិច្ចថា ដំបូងមានស្ត្រីម្នាក់ដែលធ្វើការជាមួយគ្នានៅរោងចក្រឯរាជធានីភ្នំពេញ ថាមានចំណាប់អារម្មណ៍ចង់ទៅបេះតែនៅស្រុកចិនដែរឬទេ ? ប្រាក់ខែពី៣០០ទៅ៥០០ដុល្លារ។ បន្ទាប់មកមានបុរសម្នាក់ទាក់ទងជាមួយស្ត្រីរងគ្រោះរហូតដល់មានការយល់ព្រម។
ស្រី្តរងគ្រោះបាននិយាយថា ពេលទៅដល់សុងស៊ី ( គាត់បញ្ជាក់ថា គាត់មិនស្គាល់ថា ទីកន្លងដែលខ្លួនទៅដល់នោះ ជាខេត្ត ជាស្រុកអ្វីទេ គឺដឹងត្រឹមតែថា តំបន់សុងស៊ី )។ ស្រី្តរងគ្រោះបានបន្តទៀតថា ពេលទៅដល់ទីនោះ ឥតមានបានធ្វើការងារបេះតែអ្វីទេ គឺគេចាប់បង្ខំឲ្យខ្លួនយកប្តីជនជាតិចិនតែម្តង គឺយកប្តីឥតមានរៀបការអ្វីទាំងអស់ ដោយឲ្យចូលខ្លួនទៅបម្រើគេក្នុងនាមជាប្រពន្ធ និងបម្រើគ្រួសារគេដូចទាសករតែម្តង។
ស្រី្តរងគ្រោះម្នាក់នេះ បានឲ្យដឹងដែរថា គាត់បានប្រកែក ឥតមានយល់ព្រមតាមការចាប់បង្ខំនោះទេ ក៏ប៉ុន្តែបុរសជនជាតិចិននោះ បាននិយាយថា បើចង់ត្រឡប់ទៅប្រទេសកម្ពុជាវិញ ត្រូវសងសំណង៥ ០០០ដុល្លារ។ ដូច្នេះគឺជនរងគ្រោះ មិនមានជម្រើសផ្សេងឡើយ គឺត្រូវតែរស់នៅជាទាសករនៅក្នុងគ្រួសារបុរសជនជាតិនោះតែម្តងទៅ។
ស្រី្តរងគ្រោះ ហេង សំណាង បាននិយាយបន្តថា ទីបំផុតក៏ដាច់ចិត្តលួចរត់ទៅរកអគ្គកុងស៊ុលកម្ពុជាប្រចាំនៅទីក្រុងក្វាងចូវឲ្យជួយ ដោយជិះឡានធ្វើដំណើរអស់១០០០លុយចិន។ ដោយការជួយជ្រោមជ្រែងអន្តរាគមន៍ពីសំណាក់អគ្គកុងស៊ុលកម្ពុជា ប្រចាំនៅទីក្រុងក្វាងចូវ ជាចុងបញ្ចប់ ក៏ត្រូវបានមកដល់ប្រទេសកម្ពុជាវិញ នារសៀលថ្ងៃទី២៥ ខែកក្កដាឆ្នាំ២០១៥។
លោកជា ហេង នាយរងការិយាល័យប្រឆាំងការជួញដូរមនុស្ស និងការពារអនីតិជន បានបញ្ជាក់ថា ករណីបញ្ជូនស្រី្តរងគ្រោះទៅកាន់ក្រុមគ្រួសារវិញ តាមរយៈមន្ទីរសង្គមកិច្ចនោះ មន្ទីរសង្គមកិច្ចខេត្តសៀមរាបពុំបានទទួលយកទេ ព្រោះជាប់រវល់ថ្ងៃសៅរ៍ ដូច្នេះសមត្ថកិច្ចបានទំនាក់ទំនងជាមួយគ្រួសារស្ត្រីរងគ្រោះដោយផ្ទាល់ ដើម្បីរង់ចាំទទួលយក។ ស្ត្រីរងគ្រោះ បានធ្វើដំណើរតាមរថយន្តក្រុងទៅជួបក្រុមគ្រួសារខ្លួនវិញ នៅល្ងាចថ្ងៃដដែលនោះ៕
ស្ដាប់ការរៀបរាប់របស់ស្ត្រី ដែលចាញ់បោកមេខ្យល់យកទៅរៀបការជាមួយជនជាតិចិន
0 Comments