ប្រទេសលីបេរីយ៉ា បានឲ្យអ្នកជំងឺ Ebola ចុងក្រោយចំនួន៤នាក់ ចាកចេញពីមន្ទីរពេទ្យវិញហើយ កាលពីថ្ងៃចន្ទ នាំឲ្យប្រទេសដែលស្ថិតនៅតំបន់អាហ្រ្វិកខាងលិចមួយនេះ លែងមានករណី Ebola ដែលត្រូវបានគេដឹងទៀតហើយ។
បុរស២នាក់ និងក្មេងប្រុស២នាក់ ជាចំណែកនៃករណីឆ្លង Ebola ថ្មីទាំង៦នាក់ ត្រូវបានចាកចេញពីមន្ទីរពេទ្យ ELWA II Clinic ក្នុងក្រុង Monrovia បន្ទាប់ពីទទួលបានការតាមដានត្រួតពិនិត្យពេញលក្ខណៈរួចមក។
ប្រទេសលីបេរីយ៉ា ត្រូវបានប្រកាសថា បានឆ្លងផុតពីការចម្លងរាលដាលកាលពីថ្ងៃទី០៩ ខែឧសភា គឺរយៈពេល៦សប្ដាហ៍ បន្ទាប់ពីមានមួយករណីចុងក្រោយបង្អស់កើតមានឡើងបានបាត់បង់ជីវិតទៅនោះ។ ប៉ុន្ដែយុវជនម្នាក់អាយុ១៧ឆ្នាំ បានបាត់បង់ជីវិតទៅនៅឯស្រុក Margibi ជាប់ឆ្នេរសមុទ្រនៅដំណាច់ខែមិថុនា បន្ទាប់ពីចម្លងវីរុសទៅហើយមនុស្ស៥នាក់ផ្សេងទៀត ក្នុងនោះក៏មានម្នាក់ទៀតក៏បានស្លាប់ទៅដែរ។
អ្នកជំងឺដែលត្រូវបានរកឃើញនោះមានអាយុចាប់ពី៩ឆ្នាំទៅដល់២៤ឆ្នាំ មកពីភូមិដូចគ្នាពេលដែលករណីចម្លងថ្មីបានកើតឡើង។
មន្ទីរពេទ្យ ELWA II បាននិយាយថា មនុស្ស៤នាក់ ដែលត្រូវបានគេគិតថា មានទំនាក់ទំនងដោយផ្ទាល់ជាមួយនឹងអ្នកជំងឺទាំងប៉ុន្មាននាក់នោះ ក៏ត្រូវបានឲ្យចេញពីមន្ទីរពេទ្យដូចគ្នា ព្រោះតែបានរួចចាកផុតពីការចម្លងនោះហើយ ពេលដែលនៅមានមនុស្ស៦នាក់ផ្សេងទៀតកំពុងតែ ដាក់ឲ្យស្ថិតនៅក្រោមការតាមដាន។
ក្រុមអ្នកវិទ្យាសាស្ដ្រជឿជាក់ថា ការងើបរើឡើងវិញនូវវីរុសមរណៈ Ebola នោះវាផ្ដើមចេញមកពីប្រភពអ្នកនៅរស់រានមានជីវិតម្នាក់ ដែលនៅផ្ទុកវីរុសនៅក្នុងខ្លួននៅឡើយ។ Ebola បានឆ្លងទៅមនុស្ស២៧,៧០០នាក់ ព្រមទាំងបានផ្ដាច់ជីវិតអស់ជាង១១,៣០០នាក់ នៅប្រទេសលីបេរីយ៉ា ព្រមទាំងប្រទេសជិតខាងមានហ្គីណេ និងសៀរ៉ាឡេអូន នេះបើយោងតាមទិន្នន័យជាផ្លូវការផ្សព្វផ្សាយទូលំទូលាយ ថ្វីបើចំនួនពិតប្រាកដវិញមិនអាចប៉ាន់ស្មានបាននោះ៕
AFP
អ្នកជំងឺ Ebola នៅលីបេរីយ៉ា៤នាក់ចុងក្រោយ បានចាកចេញពីមន្ទីរពេទ្យវិញហើយ
0 Comments