កណ្តាល ៖ ប្រជាពលរដ្ឋរស់នៅភូមិក្នុងព្រែក ភូមិព្រែកគយ ភូមិព្រែកថ្មី និងឃុំរកាខ្ពស់ស្រុកស្អាងបានបញ្ចេញកំហឹងប្រាប់អ្នកកាសែតឲ្យដឹងថា នៅតាមមូលដ្ឋានរបស់ពួកគាត់សព្វថ្ងៃនេះមានឈ្មួញរកស៊ីជីកអាចម៍ដីលក់ដ៏ទំនើងចំនួន២នាក់ កំពុងធ្វើព្យុះភ្លៀងអាងអំណាចអ្នកធំនៅពីក្រោយហើយកំពុងធ្វើសកម្មភាពយ៉ាងអនាធិបតេយ្យបំផុតពេញម៉ាស្រុកស្អាង ដែលការធ្វើអាជីវកម្មពួកគេធ្វើបានយ៉ាងដុះស្លែរហូតដល់ពេលនេះគ្មានច្បាប់ទម្លាប់អ្វីទាំងអស់។
ពលរដ្ឋបាននិយាយឲ្យដឹងថា អាឈ្មួញពីរនាក់នោះ ទី១‑ឈ្មោះ ឆាយ កាតឿ ទី២ឈ្មោះ ប៉េង ថន (ហៅអាពាល) មានទីលំនៅភូមិព្រែកតូច ឃុំព្រែកគយ ឈ្មួញទាំងពីរនេះដើរអួតអាងតាមតុកាហ្វេផ្សារព្រែកតូចក្តែងៗថា គ្មានអាណាហ៊ានបិទអាជីវកម្មពួកគេបានទេ ព្រោះគេបានបង់លុយឲ្យលោកចៅហ្វាយស្រុក ចៅហ្វាយខេត្ត និងមន្ទីរជំនាញអស់ហើយ ពួកកាសែត ពួកអាទូរទស្សន៍វាចុះផ្សាយអីចុះទៅ គេមិនឈឺក្បាលទេ សំខាន់ឲ្យតែអាជ្ញាធរយកលុយវា គឺគេដឹកបានម៉ាស៊េរីមិនទើសក្បាលអ្វីពួកអាកាសែតហ្នឹងទេ។
ប្រជាពលរដ្ឋបានបន្តថា សព្វថ្ងៃនេះ ឈ្មោះ ឆាយ កាតឿ និងឈ្មោះ ប៉េង ផន ហៅអាពាល កំពុងប្រើប្រាស់គ្រឿងចក្រធ្វើអាជីវកម្មដោយគ្មានច្បាប់ទម្លាប់អ្វីទាំងអស់ ហើយរថយន្តដឹកដីរបស់ពួកគេកំពុងដឹកដាក់លើសទម្ងន់កំណត់មិនគោរពតាមការណែនាំរបស់ជំនាញដឹកដាក់ហូរហៀរកំពប់ពេញទ្រុងឡានធ្លាក់អាចម៍ដីរាយប៉ាយពេញថ្នល់ជាតិ២១បេ ក្លាយជាផ្លូវដីសុទ្ធទ្រូងផ្លូវមួយចំនួនត្រូវប្រះស្រាំស្ពានមួយចំនួនត្រូវទ្រុឌទ្រោម និងខូចខាតជាអន្លើៗ ផ្លូវមួយចំនួននៅមូលដ្ឋានឃុំព្រែកគយ ឃុំរការខ្ពស់ត្រូវខូចខាតស្ទើរទាំងស្រុងដោយសារតែសកម្មភាពដឹកដីយ៉ាងទំនើងរបស់ឈ្មោះ ពាល និងឈ្មោះ ឆាយ ខាងលើនេះ។
បច្ចុប្បន្នអាជីវកម្មពួកគេកំពុងជីកដីនៅខាងក្រោយវត្តត្រពាំងឈូក ឃុំព្រែកគយ ហើយឡានដីឈ្មោះ ពាល កំពុងដឹកយកមកចាក់លុបដីបឹងនៅតំបន់ទួលក្រសាំង ឃុំរកសារខ្ពស់យ៉ាងអនាធិបតេយ្យបំផុត គ្មានអាជ្ញាធរជំនាញស្រុក ឬខេត្តហ៊ានហាមឃាត់ពួកគេបានម្តងណាឡើយ ទើបធ្វើឲ្យឈ្មួញទំនើងទាំងពីរនាក់ខាងលើ ហ៊ានធ្វើទាំងបំពានច្បាប់ទម្លាប់បែបនេះ ខណៈដែលមានភាពអនាធិបតេយ្យ ហើយអាជ្ញាធរជំនាញស្រុកមិនធ្វើការទប់ស្កាត់សោះបែបនេះបានធ្វើឲ្យពលរដ្ឋធ្វើការរិះគន់យ៉ាងចំៗថា អាជ្ញាធរជំនាញស្រុក ខេត្ត ច្បាស់ជាទទួលបាននូវលាភសក្ការៈពីឈ្មួញទំនើងទាំងនោះហើយ មើលទៅ បានជាសម្ងំនៅស្ងាត់ឈឹងដូចមានឆ្នុកចុកអញ្ចឹង។
ពាក់ព័ន្ធនឹងការរិះគន់ខាងលើ អ្នកយកព័ត៌មានបានសួរទៅលោក យ៉ែន វន្ថា អភិបាលរងស្រុកស្អាងតាមការស្នើសុំរបស់ប្រជាពលរដ្ឋថា សុំឲ្យធ្វើការផ្អាកសកម្មភាពដឹកជញ្ជូនមួយរយៈសិនព្រោះតែកំពុងបង្កផលប៉ះពាល់យ៉ាងធ្ងន់ធ្ងរចំពោះបរិស្ថាន ពិសេសអាជីវកម្មទាំងពីរនេះ ពុំទាន់មានច្បាប់ទម្លាប់ត្រឹមត្រូវផងនោះ ខណៈនោះលោកយ៉ែន វន្ថា អភិបាលរងស្រុកបានបញ្ជាក់ប្រាប់តាមទូរស័ព្ទថា មិនអីទេ ចាំឲ្យជំនាញចុះទៅមើល ប៉ុន្តែរយៈពេល១អាទិត្យទៅហើយ សកម្មភាពឈ្មួញខាងលើនៅយ៉ាងគឃ្លើនដដែរ។
ប្រជាពលរដ្ឋមានជំនឿលើលោកម៉ៅ ភិរុណ ជាចៅហ្វាយខេត្តកណ្តាលយ៉ាងមុតមាំ ពួកគាត់បានសំណូមពរយ៉ាងទទូចមេត្តាឲ្យលោកអភិបាលខេត្តជួយមានវិធានការលើឈ្មួញទំនើងខាងលើនេះ ព្រោះកន្លងមកសាលាខេត្តចេញសេចក្តីជូនដំណឹងរួចមកហើយគ្រប់អាជីវកម្មជីដីដឹកដី ដឹកខ្សាច់ ថ្ម ទាំងអស់ត្រូវបញ្ឈប់សកម្មភាពទាំងអស់ ហើយឲ្យទៅធ្វើច្បាប់អាជីវកម្មថ្មីឲ្យបានត្រឹមត្រូវដោយប្រគល់ភារកិច្ចនេះឲ្យអាជ្ញាធរ និងជំនាញតាមស្រុកទាំងអស់ធ្វើការទប់ស្កាត់ និងបញ្ឈប់ជាបន្ទាន់។
ប៉ុន្តែរហូតពេលនេះនៅស្រុកស្អាងមិនត្រូវបានផ្អាកអាជីវកម្មអត់ច្បាប់ណាបានមួយឡើយ សកម្មភាពដឹកជញ្ជូននៅតែរលូនដដែល អាជ្ញាធរ និងជំនាញរ៉ែថាមពល គឺចុះទៅធ្វើកិច្ចសន្យាហើយយកតែលុយពីពួកឈ្មួញតែប៉ុណ្ណោះ ករណីនេះសូមមេត្តាលោកអភិបាលខេត្តមេត្តាជ្រាប និងមានវិធានការផងទាន៕
ប្រជាពលរដ្ឋ ៖ ឈ្មួញដឹកដីលក់ដ៏ទំនើងពីរនាក់ កំពុងបំផ្លាញផ្លូវថ្នល់ទូទាំងស្រុកស្អាង
0 Comments