ភ្នំពេញ ៖ ដោយផ្អែកតាមការធ្វើបទបង្ហាញរបស់ក្រុមបច្ចេកទេសលើបញ្ហាព្រំដែនជាមួយវៀតណាម កាលពីរសៀលថ្ងៃទី២១ ខែកក្កដា ឆ្នាំ២០១៥ នៅសាលាខេត្តត្បូងឃុំ បានបញ្ជាក់ថា ចំណុច១៦.៦ ហិតាពិតជាស្ថិតនៅក្នុងទឹកដីប្រទេសវៀតណាមប្រាកដមែន ហើយការទទួលបានតំបន់១០០ ហិតាមកវិញ គឺដោយសារការសម្របសម្រួលតាមការរស់នៅជាក់ស្តែងរបស់ប្រជាពលរដ្ឋ ហើយបើផ្អែកតាមខ្សែផែនទីតំបន់១០០ ហិតា ក៏ស្ថិតនៅក្នុងទឹកដីរបស់វៀតណាមដែរ។
នៅក្នុងការធ្វើបទបង្ហាញអំពីការងារបោះបង្គោលព្រំដែនជូនដល់មន្ត្រីនៃស្ថាប័នពាក់ព័ន្ធទាំងនោះ លោក ឡាយ សៀងលី អនុប្រធានអចិន្ត្រៃយ៍នៃលេខាធិការកិច្ចការព្រំដែនទទួលបន្ទុកការងារបោះបង្គោលព្រំដែនខេត្តត្បូងឃុំ ទល់ជាមួយខេត្តតៃនិញ ប្រទេសវៀតណាមនោះ បានលើកឡើងថា នៅក្នុងភូមិសាស្ត្រ ខេត្តត្បូងឃុំមានបង្គោលព្រំដែនចំនួន៥៣ បង្គោល ស្ថិតនៅលើទីតាំងដីចំនួន៥២ ទីតាំង ដែលក្រុមការងារនៃគណៈកម្មការបោះបង្គោលខណ្ឌសីមារវាងប្រទេសទាំងពីរបានព្រមព្រៀងគ្នាធ្វើការបោះបង្គោលព្រំដែនរួចហើយ។
លោកបន្តថា ក្រុមការងារកិច្ចការព្រំដែននៃប្រទេសទាំងពីរ ក៏បានធ្វើការសិក្សាគ្នាផងដែរ ដើម្បីបោះបង្គោលតូចៗចំនួនជាង១០០ បង្គោលបន្ថែមទៀត។
ទោះជាយ៉ាងណា នៅក្នុងបានធ្វើបទបង្ហាញអំពីកិច្ចការព្រំដែននោះលោក ឡាយ សៀងលី បានផ្តោតទៅលើបង្គោលព្រំដែនលេខ៩៤ និងលេខ៩៥ ស្ថិតនៅភូមិជើង ឬភូមិថ្មី ឃុំជាំ ស្រុកមេមត់ខេត្ត ត្បូងឃុំ ដែលថ្មីៗនេះមានវិវាទជាមួយអាជ្ញាធរវៀតណាម ដោយខាងវៀតណាមបានប្រើប្រាស់ថ្នាំពុលបំផ្លាញផលដំណាំរបស់កសិករខ្មែរនៅតំបន់១៦,៦ហិតា។ តាមរយៈបទបង្ហាញនោះ នៅចំណុចចាប់ពីបង្គោលព្រំដែនលេខ៩៤ ដល់៩៥ នឹងធ្វើការបោះបង្គោលតូចៗចំនួន៧ បង្គោលបន្ថែមទៀត នៅលើចំណុចកាច់ចុះកាច់ឡើង បែបធ្មេញរណា ដើម្បីកុំឲ្យប្រជាពលរដ្ឋពិបាកយល់ ឬពិបាកចំណាំថា ត្រង់ណាជាដីរបស់វៀតណាម ត្រង់ណាជាដីរបស់កម្ពុជា។
លោក ឡាយ សៀងលី បញ្ជាក់ដែរថា បើផ្អែកលើផែនទីភូមិសាស្ត្រឥណ្ឌូចិនខ្នាត១ លើ១០០ ពាន់ នៅចំណុចដីចំនួន១០០ ហិតា ក៏ចូលទៅក្នុងទឹកដីវៀតណាមដែរ ប៉ុន្តែដោយផ្អែកទៅលើការកាន់កាប់ជាក់ស្តែងរបស់ប្រជាពលរដ្ឋកម្ពុជា គណៈកម្មការព្រំដែនប្រទេសទាំងពីរ ក៏បានឯកភាពគ្នាកែសម្រួលព្រំដែនព្រំដែន នៅចន្លោះបង្គោល៩៤.៩៥ ដោយប្រើពាក្យថា “ខ្សែបន្ទាត់ព្រំដែនផ្អែកតាមការរស់នៅជាក់ស្តែង” ស្របតាម MOU ឆ្នាំ២០១១។
លោកបញ្ជាក់ថា មកដល់ឆ្នាំ២០១៥ ប្រជាពលរដ្ឋកម្ពុជា យើងក៏បានដាំដំណាំនៅចំណុច១៦,៦ ហិតា ដែលនាំឲ្យវៀតណាមមានប្រតិកម្ម ហើយបានបាញ់ថ្នាំពុលបំផ្លាញដំណាំរបស់កសិករយើងតែម្តង។
នៅក្នុងការធ្វើបទបង្ហាញនោះដែរ លោក ឡុង វិសាលោ រដ្ឋលេខាធិការក្រសួងការបរទេសមានប្រសាសន៍បញ្ជាក់ថា ឆ្លងតាមការលើកឡើងរួមទាំងសំណួរចម្លើយ អាចបញ្ជាក់បានថា បញ្ហានៅចំណុចភូមិជើង ឃុំជាំ ស្រុកមេមត់ នោះ ពិតជាបានច្បាស់លាស់អស់ហើយ។ លោកបញ្ជាក់ថា នៅចំណុចខាងលើនេះ ជាចំណុចដ៏ក្តៅដែលគណបក្សសង្គ្រោះជាតិបានយកមកប្រើប្រាស់ក្នុងការវាយប្រហារមកលើរាជរដ្ឋាភិបាលផ្ទុយពីការពិតទាំងស្រុង ហើយជាការវាយប្រហារបែបឃោរឃៅទៀតផង។ លោករដ្ឋលេខាធិការបានបញ្ជាក់ថា ផែនទីដែលរាជរដ្ឋាភិបាលប្រើប្រាស់ គឺជាផែនទីពិតប្រាកដ បោះពុម្ពដោយវិទ្យាស្ថានភូមិសាស្ត្របារាំងឆ្នាំ១៩៥១ ខ្នាត១លើ១០០ ពាន់ ហើយលោក ឡុង វិសាលោ បញ្ជាក់ទៀតថា បើលោក សម រង្ស៊ី មានផែនទីនៅត្រូវបង្ហាញផែនទីនោះ យកផ្ទៀងផ្ទាត់ជាមួយផែនទីដែលរាជរដ្ឋាភិបាលមាន។
ទោះជាយ៉ាងណានៅក្នុងការធ្វើបទបង្ហាញនោះ លោកអភិបាលស្រុកមេម៉ត់បានលើកឡើងដែរថា នៅក្នុងស្រុកមេម៉ត់មានចំនួន១០១ គីឡូម៉ែត្របានជាប់ព្រំប្រទល់ជាមួយវៀតណាម ហើយនៅពេលបោះបង្គោលរួចហើយ នៅមានការមិនយល់លើបញ្ហាមួយចំនួន ទាក់ទងនិងបញ្ហាខ្សែបន្ទាត់ព្រំដែន ដែលប្រជាពលរដ្ឋទាំងសងខាងចេះតែចេញចូលមិនទាន់ដឹងច្បាស់ថា ត្រង់ណាជាខ្សែបន្ទាត់ព្រំដែន ជាពិសេសនៅចន្លោះបង្គោលលេខ៩៤ និង៩៥ ដែលមានបញ្ហាបាញ់ថ្នាំបំផ្លាញដំណាំកសិករនោះ។
ជាមួយនឹងការលើកឡើងខាងលើនេះ លោកអភិបាលបានស្នើឲ្យគណៈកម្មការពន្លឿនការបោះបង្គោលព្រំដែនតូចៗបន្ថែមនោះឲ្យបានលឿន ដើម្បីកំណត់ឲ្យបានច្បាស់។
សូមបញ្ជាក់ថា នៅពេលដែលកើតមានព្រឹត្តិការណ៍នៅភូមិជើង ឃុំជាំ ស្រុកមេមត់ នោះ លោក សម រង្ស៊ី បានទៅជួបលោកឧបនាយករដ្ឋមន្ត្រី ហោ ណាំហុង នៅទីស្តីការក្រសួងការបរទេសពិភាក្សាវប្បធម៌សន្ទនា ប៉ុន្តែទន្ទឹមនៅដែរ លោក សម រង្ស៊ី បានឲ្យសមាជិករបស់ខ្លួននៅក្រៅប្រទេសធ្វើការវាយប្រហាររាជរដ្ឋាភិបាល និងវាយប្រហារលោកឧបនាយករដ្ឋមន្ត្រី ហោ ណាំហុង ទាក់ទងនិងបញ្ហាព្រំដែន ដោយផ្តើមចេញពីចំណុចបញ្ហាវិវាទនៅភូមិជើង ឃុំជាំ ដែលលោកឧបនាយករដ្ឋមន្ត្រីបានផ្ញើលិខិតជូនសម្តេចប្រធានរដ្ឋសភាទាក់ទងបញ្ហាវិវាទនៅភូមិជើងឃុំជាំនោះ ដែលអាជ្ញាធរវៀតណាមបាញ់ថ្នាំពុលបំផ្លាញដំណាំកសិករខ្មែរចំនួន១៦,៦ ហិតានោះ ហើយតាមរយៈបទបង្ហាញរបស់ក្រុមជំនាញកិច្ចការ ព្រំដែនចំរុះបានបង្ហាញថា ដីទំហំ១៦,៦ ហិតានៅភីមិជើង ឃុំជាំ ស្រុកមេមត់ នោះ ពិតជាស្ថិតនៅក្នុងដីវៀតណាម ដូច្នេះការពន្យល់បកស្រាយរបស់លោក ហោ ណាំហុង ទាក់ទងបញ្ហានោះជូនសម្តេចប្រធានរដ្ឋសភា គឺពិតជាត្រឹមត្រូវ៕
ក្រុមបច្ចេកទេសព្រំដែនបញ្ចប់ការសង្ស័យលើចំណុច១៦.៦ហិតាដែលស្ថិតនៅភូមិជើងឃុំជាំស្រុកមេមត់
0 Comments